Suluet 13 - Bibilia Buk na Ŋun nagon koti luŋu a

Abarama ko Loto a rekin

¹ A Abarama ŋiörö kaŋo i jur lo Ejipeto ko nakwan nanyit, ko ŋo liŋ lo gwon ko lepeŋ kulo, a Loto Köti moraddi ko nye, a se liŋ iti tojo i swöt lo Loki.

² A Abarama gwe a kwörinit parik ko toro ’bo, ko pödö, ko dakap.

³ a nye jölöni jölö, a ŋiörö i swöt lo Loki tojo Betele, i pirit na gwoŋdi kemia nanyit a kokwe nu, i kiden na Betele ko Ai,

⁴ tojo i nu pirit ’yuret na rubaŋgajin nagon nye a tetenakiŋdya a kokwe nu; a Abarama luŋgi karin ti MATAT nyu.

⁵ a Loto Köti logon a moraddu ko lepeŋ lo gwe ko yidin, ko kisuk, se ko kemialan.

⁶ A ŋilu jur tine jukin se i si ’da nase i pirit na geleŋ; kogwon toro ’bo kase jore, a se tine bulo si ’da i pirit na geleŋ,

⁷ a mömörotu gwe kata i kiden na kayukuk ti toro ’bo ti Abarama ko na kayukuk ti toro ’bo ti Loto. A i ŋinu diŋit a ŋutu ti Kanana ko ti Periji si ’dani i ŋilu jur.

⁸ A Abarama kulyani ko Loto adi, Ti mömörötu gwe ’bayin i kiden nikaŋ ko do boŋo, ko i kiden na kayukuk kwe ko kulok; kogwon yi a luŋasirik.

⁹ Kak na liŋ maŋina, ti gwon sona le? Koraddi mugun kaŋo koyo. Ko do tu i swot lo kadoŋe, a nan de iti i swot lo lutaten; a ko do tu i swot lo lutaten, a nan de iti i swöt lo kadoŋe.

¹⁰ A Loto ’bi ’yi konyen kanyit ki i woŋu, a nye meddi jur liŋ lo kare ’Yardene, a ŋinu kak gwe a nadon gwoso melesen na MATAT, iŋkoi, gwoso jur lo Ejipeto ko ŋuto tu tojo Soar ŋinu diŋit gwon a kokwe nagon MATAT a ko nyuŋ koŋu Sodoma ko Gomora nu.

¹¹ Nyena a Loto wulökiŋdye mugun jur liŋ lo kare Yardene, a Loto jölöjine jölöji i swot lo ’yure, a se reki rekin ka ’de ka ’de.

¹² A Abarama si ’dani i jur lo Kanana, ama a Loto si ’dani i köjinö ti jur lo kare, a toyuöddi kemia nanyit tojo ko Sodoma.

¹³ a Ŋutu ti Sodoma gwe a katoronyak lorok a Iwoŋgu ko MATAT i komor.

¹⁴ A MATAT kulyani ko Abarama i mukök nagon Loto aje koraddu mugun kaŋo ko lepeŋ nu adi, ’Bili konyen kulok ki i pirit na gwoŋdi do kata na, ko wöŋi tojo ko lobot, ko loki, ko ’yure, ko tokotyaŋ;

¹⁵ kogwon kak liŋ nagon do memet nu, nan mo titikin do ko i nyakwariat kulok ŋupi ŋupi.

¹⁶ A nan mo tiŋdi nyakwariat kulok i gwon jore gwoso ŋutu na kak; anyen ko Ŋutu bubulö keŋdya ŋutu na kak, a nyakwariat kulök koti mo kenani kena.

¹⁷ Ŋine ki, woroddi jur i tojolan nanyit ko i tugalaŋ nanyit, kogwon nan mo titikin do lepeŋ

¹⁸ A Abarama toyuöddi kemia nanyit, a tu si ’dani nyona ko kaden logon a rinö ti Mamure, Keberon yu; a nye dipakiŋdye MATAT pirit ’yuret na rubaŋgajin nyu.