Suluet 12 - Bibilia Buk na Ŋun nagon koti luŋu a

Ŋun a luŋgu Abarama

¹ A MATAT kulyani ko Abarama adi, Ŋiörö kapo i jur losu, ko i karu kasu ko kase munyi mede, tojo i jur logon nan mo kwekwekin do lu.

² A nan mo tuŋduŋdye kaŋo konut jur duma, a nan mo ’boroji do, a töduma ’yi karin kunök, anyen do mo gwon a ’boriet.

³ A nan mo ’boroji Ŋutu logon ’boroja do kilo, a nan mo lömbi nye logon lömbu do lo; a kötumitön liŋ ti kak mo mo ’yi nan i ’boroja na se gwoso na ’boroji nan do na.

⁴ Nyena a Abarama ŋine ŋien, gwoso nagon MATAT aje kulyari ko lepeŋ nu; a Loto koti moraddi ko lepeŋ. A Abarama gwe ko kiŋajin merya buryo wot mukanat na ŋiöddi nye kaŋo Karan nu.

⁵ A Abarama ’dumuŋdye Sarai nakwan nanyit, ko Loto ŋuro lo luŋaser lonyit, ko toro ’bo liŋ nagon se a tutun kunu, se ko Ŋutu logon se a ryö Karan yu kulu; a se ŋiörö tojo i jur lo Kanana. A se ko ’dure i jur lo Kanana,

⁶ a Abarama lwöŋöddi ŋilu jur, a iti tojo i pirit na gwon Sekeme yu, tojo i ködini logon a ri lo gwon More yu lu. A i ŋinu diŋit a Ŋutu ti Kanana gwe i ŋilu jur.

⁷ a MATAT puköki ko Abarama, a kulyani adi, Nan titin nyakwariat kulök lo jur. A Abarama dipakiŋdye MATAT ’yuret na rubaŋgajin nyu, ŋilo a MATAT logon a pukökin ko lepeŋ lo.

⁸ A nye ŋine ŋien nyu tojo i mere i swöt lo ’yure lo Betele, a nye ’beggi kemia nanyit nyu, a Betele gwe i swöt lo tokotyaŋ, a Ai gwe i swot lo ’yure. A nye dipakiŋdye MATAT nene ’yuret na rubaŋgajin nyu, a nye luŋgi karin ti MATAT.

⁹ A Abarama Köti jölöjine ŋerot tojo i swöt lo Loki.

Abarama i jur lo Ejipeto

¹⁰ A kak gwe a dyaŋ, a Abarama iti tojo Ejipeto, anyen tu mönuŋdyö nyu, kogwon kak gwe a dyaŋ parik.

¹¹ A nagon nye gwe nyona ko lupö Ejipeto nu, a nye kulyani ko nakwan nanyit Sarai adi, Mete, nan a den adi do a ŋuto nakwekwelen i meta;

¹² a mo gwe sona, ko Ŋutu ti Ejipeto mo a meddya do, a se mo kulyani adi, Ŋina a nakwan nanyit; nyena a se mo tatuje nan, ama a se mo kölökiŋdye do jörun.

¹³ Böŋö kulyani adi do a kiaser nio, anyen kulya kwe böŋö wörö ’bura kogwon kulya kunök, ko anyen se böŋö kölökiŋdyö nan i gwon jörun kogwon kulya kunök.

¹⁴ A na ’durökiŋdye Abarama Ejipeto nu, a Ŋutu ti Ejipeto meddi adi ŋina nakwan kwekwelen parik.

¹⁵ A Ŋutu ti Paro logon a kimak kulo ko meddi lepeŋ, a se pupurakiŋdye Paro kulya kanyit, a nu nakwan joŋani ko Paro mede.

¹⁶ A Paro koŋdi Abarama ’bura kogwon kulya ti ŋina nakwan; a Abarama gwe ko yidin, ko dwönin, ko kaineki mönikön, ko ’dupi lyan ko nawate, ko kaineki nawate se ko kamilojin.

¹⁷ A MATAT riŋge Paro ko mede nanyit ko twanajin iŋgo kogwon kulya ti Sarai nakwan na Abarama.

¹⁸ A Paro luŋgi Abarama a pipije lepeŋ adi, Na ŋo a nyo nagon do a konakin nan na? Nyö nagon do ti takin nan adi nye a nakwan inot?

¹⁹ Ko nyo nagon do a kulya adi nye a kiösur a nan joŋgi lepeŋ a nakwan nio? Nyenagon soŋinana mana nakwan inot, joŋgi lepeŋ ko morgi kiko ilot.

²⁰ a Paro saŋi Ŋutu kanyit i kulya ti Abarama; a se nyömöddi lepeŋ a kölöddi lepeŋ i tu mora ko nakwan nanyit se ko ŋo liŋ lo gwon ko lepeŋ kulu.