Saumajin 97 - Bibilia Buk na Ŋun nagon koti luŋu a

Ŋun a kasaranit lo ŋo liŋ

¹ MATAT tutumatyan; ti kak lyöŋi lyöŋön! Ti tikönyö jore nyolani nyola!

² ’Dikolo ko mudwe gömökindyö lepeŋ kiden; si ’daet na tumatyan nanyit gwo ’dan i kulya na rigwo ko i ’duŋgö na ŋutet gwogwo.

³ Kimaŋ wöröji kanyit ŋerot, a ’yuŋe merok kanyit i swötön liŋ.

⁴ Meme ’dekta na kipya lonyit lo ki pararaundya i kak; a kak iŋge met, a iŋge böböndu.

⁵ Merya köti a lusökö gwoso su ’bi ko MATAT i komor, iŋkoi, ko MATAT lo kak ’bukuluŋ i komor.

⁶ ’Dikolo a tukökindyö kulya kanyit na rigwo, ko gweyajin liŋ ti ŋutu a meddya minyo lonyit.

⁷ Ŋutu liŋ lo kwakwaddu nyömuejin lo gigiru kulo a wuju yu na kusik, se logon yuöggu ’börik ko nyömuejin lo gwon a ŋo kana kulo wuju yu na kusik; ŋunyen liŋ a dulaki kak ko lepeŋ i komor.

⁸ Ŋutu ti Siona a yiŋga, a nyolani nyola, turön ti Yuda a lyöŋön, kogwon ’duŋesi kunök ti putesi ŋon MATAT.

⁹ Kogwon do MATAT gwon a duma totoŋun kak ’bukuluŋ; do gwon ko todumalan totoŋun kulye ŋunyen liŋ.

¹⁰ MATAT nyanyar ŋutu logon maman kulya narok kilo; nye titiju ru na katwöyök kanyit; nye lo lwökundyö se kaŋo i könisi ti ŋutu lorok.

¹¹ ŋun pararakindya i ŋutu lo rigwo, nye tindu lyöŋön i ŋutu lo gwon gwogwo i töilyet.

¹² Ta ŋutu lo rigwo, lyöŋi ta ko MATAT, pupurje ta karin kanyit nake!