Saumajin 9 - Bibilia Buk na Ŋun nagon koti luŋu a

Ŋun ŋuŋura kogwon lepeŋ ’duŋgö rigwo

¹ Nan tindu do MATAT tinate ko töili lio liŋ; nan tukökindyö kitajin sörösi kunök liŋ.

² Nan gwon ko lyöŋön a nan yuöggi do, do logon a Katoŋanit lo ki liŋ, nan yulukindyö do puresi ’dindya karin kunök!

³ Na pukundye do nu a merok kwe yitöni bot, a seuŋ kököŋukö a se twatwane twatwa.

⁴ Kogwon do a jundyö nan i kulya kwe na ’but; do a si ’daki i si ’daet na tumatyan a ’duŋge ŋutet rigwo.

⁵ Do aje riŋga jurön, do aje tukaŋu ŋutu lorok; do aje bubutöddu karin kase kaŋo asut.

⁶ Merok aje toliki, se a kölöki i yaya ritu ŋupi; do aje tupö köjinö kase liŋ kak; ma ’di yeyeŋ na lepeŋat aje böŋöri’kin asut.

⁷ Ama MATAT a si ’da a mor ŋupi, nye aje tetendya si ’daet na tumatyan nanyit ’duŋet na putet;

⁸ a nye ’duŋge kulya ti ŋutu liŋ ti na kak ko torigwo, iŋkoi, a nye lilije kulya ti gweyajin ti ŋutu gwogwo.

⁹ MATAT gwon a ŋirit ’danaet nago i se logon a ruda, nye a bilili lojo ki i diŋitan delyaesi.

¹⁰ A se logon deden karin kunok kilo yinikindye ’börik konut, kogwon do MATAT a ko kö ŋutu lo ga ’yu do kilo.

¹¹ Yulukindye MATAT pupuresi, nye logon si ’da Siona lo! Laikindye kulya ti kitajin kanyit i kiden na gweyajin ti ŋutu!

¹² Kogwon Ŋun a ko böŋö gwien na ŋutu lo sasanya; lepeŋ a yeyeju se a robbi rima kase.

¹³ Pon MATAT, ti ’busan inot gwe köyö; do lo ’bilikindya nan ki i kötumitön ti twan, meddi ŋoŋesi kwe i pisarikin nio,

¹⁴ anyen nan bubulö goddya puresi kunök liŋ, anyen nan bubulö lyöŋön i lwökit inot i kötumitön ti köji na Siona.

¹⁵ Jurön a ’dirörö kak i meyi nagon se a ’bok na; mokosi kase a ’depakindya go i boyi nagon se a lokakin ’börik na.

¹⁶ MATAT a tindu mugun i dena, a nye ’duŋge ŋutet; ŋutu lorok a loka ko kita na kon se ko könisi kase.

¹⁷ Ŋutu lorok a yitö bot i ŋirit na mulöko, iŋkoi, jurön liŋ logon böböŋö Ŋun kilo.

¹⁸ Kogwon ŋutu lo yöŋö ŋo kilo molu ti böŋö i kin diŋitan liŋ, a yenesi ti lomerika molu tine ’duddyö ŋupi.

¹⁹ Pon MATAT, ŋine ki! Ti ŋutu gwe ti kondya ’börik a ti riŋit! Ti kulya ti jurön ’duŋökine konut i komor.

²⁰ Pon MATAT, tindi se i kujönö; ti jurön dendi ’börik adi se tuŋ a ŋutu kana!