Saumajin 83 - Bibilia Buk na Ŋun nagon koti luŋu a

Ŋutu ti Yisaraele mo ’yu Ŋun i te ’ya na merok kase

¹ Pon Ŋun, ko si ’da taliŋ; ko yiŋa taliŋ kode ko gwon taliŋ ŋon Ŋun!

² Kogwon meddi, merok kulök wo woŋon; iŋkoi, se logon mandu do kilo ’doggu kusik kase ki.

³ A se tetendi mwön nase naron i ŋutu kulök; a se tujamaki ko ’börik i ŋutu kulök logon do a gaju kilo.

⁴ A se kulyani adi, Po ta, ti yi tukaŋi se an se gwon a jur köti; ti karin ti Yisaraele gwe ti yeyeŋ köti kwöŋ!

⁵ Merok a tujamakin i ŋirit na geleŋ ko töili geleŋ; a se tetenakindye tomoret nase i do:

⁶ kilo a ŋutu ti Edom, ko ti Yisamaele, ko ti Moaba, ko ti Agari;

⁷ ko ti Gebala, ko ti Amon, ko ti Amalek, ko ti Pelesete, se ko ŋutu lo si ’da Turo yu kulu;

⁸ jur lo Asura köti a mora ko se i ŋirit na geleŋ; lepeŋat liŋ a ŋarakindya nyakwariat ti Loto.

⁹ Konakindye se gwoso nagon do köju a konakindye ŋutu ti Midi-yan nu, ko gwoso nagon do a konakindye Sisera ko Yabin i kare Kison,

¹⁰ logon a tukara Ene-dor yu, a se worani gwoso woro i kujöŋ.

¹¹ Tindi ŋutu lokukwön kase i gwon gwoso Orep ko Jeeba, iŋkoi, tindi kimak kase liŋ i gwon gwoso Jebak ko Salamuna,

¹² logon a kulya adi, Ti yi ruddye ta jur logon Ŋun yuggi ŋutu kanyit lo a likaŋ.

¹³ Pon Ŋun lio, kondi lepeŋat gwoso ŋutu na witö ko libibiu, gwoso ŋudi na wuköji ko köbuŋöt.

¹⁴ Nyena gwoso nagon kimaŋ ’yuŋa rudu na, gwoso nagon ŋedeŋ lo kimaŋ morga merya na,

¹⁵ iŋkoi sona, ti do riköddi se ko köbuŋöt ilot duma, tokujöndi se ko köbuŋöt wome ilot.

¹⁶ Tindi komorsikan kase i yu parik, anyen se ga ’yu karin kunök ŋon MATAT.

¹⁷ Ti se ŋupi gwe ko yu na kwe ko delya, iye, ti kulya kase dyadya ’yi dya-dya ’yu, ko ti se twatwane twatwa!

¹⁸ Ti se dendi adi do geleŋ logon karin kunök a MATAT, do logon a Katoŋanit lo kak liŋ!