Saumajin 74 - Bibilia Buk na Ŋun nagon koti luŋu a

Ŋutu mo ’yu Ŋun i lwöggu na jur lose

¹ Pon Ŋun, nyo do a ŋaju yi asut? Ko nyo woran inot a tulekin i yi yidin nagon do yuyuk kune?

² Yeyeji momoret inot nagon do aje gwörun köju ’beron nu, nagon do a dakun anyen gwon a kötumit inot lomore na! Yeyeji mere Siona logon do aje si ’da kata lo.

³ Wöröjine i rubajin nagon aje tukara asut kune. Merok aje köŋu ŋo liŋ i ŋirit nake na rurwan!

⁴ Merok kulök aje rumön i kiden na ŋirit momoret inot; se aje ’bi ’yu beresi kase anyen kwekindya adi se a te ’ya.

⁵ Se meta gwoso ŋutu lo toggu kaden ko tuluö.

⁶ Se joŋga tuluö ko ’bokesi a gwagwalaggi ŋo liŋ lo gigiru kilo i ŋirit na geleŋ.

⁷ Se aje ’yurakindya pirit nake inot na rurwan ko kimaŋ; se aje toluddya ŋirit nagon karin kunök yeŋon ’dinya kata na, a dukakindye lepeŋ kak.

⁸ Se aje jambu kase i töilyet adi, Ti yi muyukakindye se kak asut; a se iŋge ’yuŋa kadijik ti Ŋun liŋ i lo jur nagon ŋutu momora kata kune.

⁹ Yi tine met kweyesi kaŋ; nebi gwe ’bayin köti, ŋutu gwe ’bayin kayaŋ kiden logon deden ko kine kulya mo joŋga diŋit ŋoman.

¹⁰ Pon Ŋun, diŋit ŋoman nagon kaŋisak ’dö ’döju? Merok laundya karin kunök ŋupi le?

¹¹ Nyo do a nyökörö könin ilot lutaten? Ŋutundye lepeŋ kaŋo konut i ku-ku ’di ko tukaŋi se.

¹² Do Ŋun gwon a mor lio suluja ’beron, do kokondya lwökisi i kiden na na kak.

¹³ Do aje koŋa tör na ’balaŋ ko riŋit inot; do aje gwagwalaggu kusik ti somot temejik i törön;

¹⁴ Do aje mumuyugga Kijakutat duma i tupesi logon gwon ko kusik jore lo, do aje tindu lepeŋ a kinyo lo nyenyei i ŋutu lo si ’da i yöbu.

¹⁵ Do aje ŋaju konyen ti pioŋ ko luruki anyen ’do ’dokon, do aje towere ’yu karya dumalak.

¹⁶ Tuparan gwon a ilot, ko tukwaje a ilot köti; do a tetenakindya pararajin ko kolor.

¹⁷ Do aje tetenakindya lokökoritan liŋ ti kak; do aje tetenakindya ja ’be ko meliŋ.

¹⁸ Pon MATAT, yeyeji miriku i ’dö ’döju, yeyeji köti ŋutu logon ti twöju do logon laundya karin kunök kilo.

¹⁹ An do ko wukindya ru na gureki kunök i kutusen ti gwuruŋin; an do ko böŋöri ru na ŋutu kulök lomerika ŋupi.

²⁰ Yeyeji kulya ti tomoret inot, kogwon konesi nagoŋ jore kokona i piritön ti kak nagon a mudwe kune.

²¹ Ti ŋutu lo rudaki kak gwe ti tiki yu na kwe; ti ŋutu lomerika ko lo yöŋö ŋo kilo pupurje karin kunök.

²² Pon Ŋun, ŋine ki, jundye kulya kunök; yeyeji ko ŋutu logon ti twöju do kulo ’dö ’dö do tuparan liŋ!

²³ An do ko böŋö merok kulök i woŋon ko do; ko böŋö woŋon na ŋutu logon woŋoro ki i diŋitan liŋ ko do kilo!