Saumajin 7 - Bibilia Buk na Ŋun nagon koti luŋu a

Ŋuto mo ’yu Ŋun anyen ’duŋökindyö ŋutet rigwo

¹ Pon MATAT Ŋun lio, nan a wökun konut i ’dana; lwöggi nan i se liŋ lo rikundyö nan kilo, riŋundye nan kaŋo kase i könisi,

² an se ko kerendya nan gwoso kömiru, logon ko a koja a ŋikoddi ŋiköddu, ama a ŋuto gwe ’bayin lo lwökun-dyö nan.

³ Pon MATAT Ŋun lio, ko nan ködyo a kon ŋo gwoso kine, ko ködyö toron kata köyö i könisi,

⁴ ko nan ködyö a konakindya toron i ŋuto logon yi si ’da ’bura ko lepeŋ lo, kode ko nan ködyö a ryaggu miriku lio ’bak kwe na kulya,

⁵ a ti miriku lio riköddi nan ko ti morgi nan, iye, ti nye ryokaddi ru nio kak i liŋo, ti nye toŋirikindye ŋele nio i ŋutu!

⁶ Pon MATAT, ŋine ki i woran inot, ’bili mugun ki i ŋoma ko kapisak kwe! Pon Ŋun, purwene i doto kogwon kulya kwe; kogwon do a sarakindya adi ti ŋutet ködyö ’duŋöni gwogwo.

⁷ Ti momoret na gweyajin ti ŋutu gömökindye do kiden; si ’dakine i si ’daet inot ki yu i tumatyan ko se.

⁸ MATAT a ka ’duŋönit lo putesi ti gweyajin ti ŋutu; ŋon MATAT, ’duŋge ŋutet lio gwoso i kulya kwe na rigwo, ko gwoso i kulya na yiyiniki na gwon köyö.

⁹ A ti tukwölöŋ na ŋutu lorok ’bakani ’baka, ama togwo ’yi ŋutu lo rigwo, kogwon do Ŋun lo rigwo tetemba yeyeesi na gwon ko ŋutu i töilyet kune.

¹⁰ Ŋun gaju nan gwoso ’buku, lepeŋ lwölwök ŋutu lo gwon gwogwo i töilyet kilo.

¹¹ Ŋun a ka ’duqönit lo rigwo, iye, nye a Ŋun logon wowori ko katoronyak perok liŋ.

¹² Ko ŋuto logon ti löpuggö, Ŋun mo jujö wale lonyit; nye aje rokundya daŋ, nye aje tetendya ajo.

¹³ Nye a tetendya tito kanyit lo tatatuja, nye a tetenakindya lepeŋ loya kanyit lo nama.

¹⁴ Meddi, ŋuto loron a ŋigga kulya nakwölöŋök, iye, nye ŋoŋoŋga lyaŋan, a nye yuŋundye kulya ’burönö.

¹⁵ Nye a tetendya meyi, a ’bokaddi nye kak, nyenagon a nye ’dorone i na meyi nagon nye a ’bok na.

¹⁶ Kulya nakwölöŋök kanyit mo yitö ko lepeŋ i kwe, a konesi kanyit nagoŋ nagon nye a konakin ŋutu kune mo ’duruki ko lepeŋ i kwe.

¹⁷ Nan tindu MATAT puresi kogwon kulya kanyit na rigwo, a nan yoloni puresi ’dindya karin ti MATAT Katoŋanit lo ki liŋ.