Saumajin 34 - Bibilia Buk na Ŋun nagon koti luŋu a

Ŋuto ŋuŋuŋa Ŋun kogwon nye a lo ’but

¹ Nan bubu ’ya MATAT i diŋitan liŋ; kutuk nio ŋupi ŋuŋuŋa lepeŋ.

² Nan bubu ’ya mugun parik kogwon MATAT; ŋutu lo sasanya kilo de yiŋga kune kulya a se lyöŋi lyöŋön.

³ Ta ko nan i ŋirit na geleŋ, ti yi toduma ’yi ta MATAT, ko ti yi liŋ ’dulukindye karin kanyit ki!

⁴ Nan a ga ’yu MATAT a nye iŋge ruk nan, a nye riŋundye nan kaŋo i ŋo liŋ nagon nan kukujönöri kine.

⁵ Diŋe ta lepeŋ, a malanyan kasu de bandi a nake; nyena a komorsikan kasu tine wora a natun kwöŋ.

⁶ Lo lomeri aje gwien, a MATAT iŋge yiŋ lepeŋ, a lwökundye nye kaŋo i delyaesi kanyit liŋ.

⁷ Malaikatat lo MATAT a gömökindyö mera nanyit i ŋutu logon kukuk MATAT kilo, a iŋge lwökun se.

⁸ Waŋgi ta ko dendi ta adi MATAT a lo ’but paleleŋ! Ŋuto logon a ’dana kanyit lo a kalyoŋi!

⁹ Ta ŋutu kanyit loke, kuŋge ta MATAT, se logon kukuk lepeŋ kilo ti wanya nene ŋo.

¹⁰ Torela ti kömiru yayaŋi ko kinyo, a magorani magora, ama se lo ga ’yu MATAT kilo ti wanya nene ŋo.

¹¹ Ta kilo ŋwajik, ŋo ta ko yiŋge ta nan, a nan de todinikindye ta i kugga na MATAT.

¹² Lon ŋuto logon ’de ’dekan gwon jörun, logon nyanyar si ’da diŋit a najo anyen nye bubulö meddya kulya na ’but?

¹³ Kweja adi, kunyar ŋedeŋ ilot i jambu na kulya narok, köti kunyar kutuk inot i jambu na mumulukesi.

¹⁴ Yuörö kaŋo i kulya narok, ko kondi kulya na ’but; ga ’yi gwon taliŋ, nyena kebbi mukök nanyit.

¹⁵ MATAT meddya i ŋutu lo rigwo, a lepeŋ gwe ajo i yiŋga na gwiesi kase.

¹⁶ Komor na MATAT gwon a natun ko ŋutu lo kondya arabat kilo, i ’duŋöddu na yeyeŋ nase kaŋo i na kak.

¹⁷ Ŋutu lo rigwo gwigwien, a MATAT yiŋge yiŋga, a riŋundye lepeŋat kaŋo i delyaesi kase liŋ.

¹⁸ MATAT gwon nyona ko ŋutu logon töilyet kase a ’be ’beleŋo kilo, a nye lwöggi se logon ’bak yenet kilo.

¹⁹ Ŋuto lo rigwo gwon ko yöyöŋesi jore; ama a MATAT riŋundye nye kaŋo i se liŋ.

²⁰ Nye lo tiju kuyu kanyit liŋ; lele lose ’bayin logon a ’beleŋo.

²¹ Kulya nagoŋ mo tatuja ŋuto loron; a se logon mandu ŋutu lo rigwo kulo mo ’duŋökine putesi kase arabat.

²² MATAT lwökundyö köliŋönök kanyit; a lele lose gwe ’bayin logon wokun ko lepeŋ i ’dana, logon kulya kanyit mo ’du ’duŋöki arabat.