Saumajin 16 - Bibilia Buk na Ŋun nagon koti luŋu aŊuto ’dana ko MATAT i mugun 1 Pon Ŋun, tiji nan, kogwon nan ’dana konut. 2 Nan takindya do MATAT adi, Do a MATAT lio; nan ’bak nene ŋo na ’but lwölwöŋ do. 3 Nan lyölyöŋön ko ŋutu loke ti na kak, logon a lo ’but parik. 4 Se logon a wulundyö kulye ŋunyen kilo a tundijö delyaesi kase; nan ti ’buggö rubaŋgajin kase ti rima, a nan tine ’dindya karin kase na kwakwaddi nan na. 5 MATAT a koret nio na wulwe ko a ŋöde nio matet; do a ’debba gura nio. 6 Patala temesi a temaki ’e nan piriton nakwekwelen; iye, nan a wuju kak lomore na ’but parik! 7 Nan ŋuŋuŋa MATAT logon a jujuja nan lo; iŋkoi, töili lio a todinikindyo nan i tukwaje. 8 Nan a tindu MATAT ŋupi köyö i komor; a nan mo tine mijörö kogwon nye gwon koyö i könin lutaten. 9 Nyenagon töili lio a lyöŋön, köti kodudwö nio gwon ko lyöŋön; köti mugun nio yeŋon ’bak kujönö. 10 Kogwon do mo ti kolökin nan kak yu i ŋirit na mulöko, koti do mo ti tindu nan ŋuto ka-twöyönit ilot i ’burön. 11 Do a kwekindya nan kiko lo tu i ru; lyoŋön duma kata konut i komor, lyöŋesi na yeyeŋon nyin gwon konut i könin lutaten. |
Bari Bible © United Bible Societies, 1979.
Bible Society in South Sudan