Saumajin 132 - Bibilia Buk na Ŋun nagon koti luŋu a

Koli lo ŋuŋurarikin kadi na Ŋun

¹ MATAT, yeyeji Dawidi, ko nye a yöyöŋö ada.

² Yeyeji ko nye a milyekin do MATAT ada; yeyeji ko nye a nyesu milye ko do Riŋit na Yakobo adi,

³ ’Diri ’diri nan mo ti luŋö köyö kadi, köti nan mo ti piriki köyö i dotoet,

⁴ nan mo ti muggö konyen kwe, nan mo ti doto,

⁵ tojo ko nan a ryekindyö MATAT ŋirit, iŋkoi, tojo ko nan a ryekindyö Riŋit na Yakobo ŋirit si ’daet.

⁶ Meddi, yi aje yiŋ kulya ti sanduk na tomoret Eparata yu, yi a ryö lepeŋ i yöbuöt ti Yaar.

⁷ Ti yi iti ta i ŋirit na si ’dari nye nu, ti yi rugwuŋöni ta kak i kwakwaddu i tiket na mokosi kanyit!

⁸ Ŋine ki ŋon MATAT, ko iti i ŋirit inot yukaet, do se ko sanduk na riŋit inot.

⁹ Ti koanejin juŋuni kulya na rigwo, ko ti ŋutu katwöyök kulök sirani ko lyöŋön!

¹⁰ Nan mo ’yu do kogwon kulya ti kölipönit ilot Dawidi, an do ko renya ŋuto ilot lo welaki a mor lo.

¹¹ MATAT a milyekin Dawidi milye iŋgo, nye mo ti löpuggö milye lonyit. Nye a milyeju adi, Nan mo tindu lele lo ŋwajik kulök i si ’daet na tumatyan inot.

¹² Ko ködyö ŋwajik kulök mo ’de ’debba tomoret nio se ko todinet nio nagon nan mo todinikin se na, nyena a ŋwajik kase mo köti si ’dani i si ’daet na tumatyan inot ŋupi ŋupi.

¹³ Kogwon MATAT a wulundyö Siona; nye a nyaŋu lepeŋ a ŋirit si ’daet nanyit kulya adi,

¹⁴ Na a ŋirit si ’daet nio ŋupi ŋupi; nan si ’da ni, kogwon nan nyanyar ŋina ŋirit.

¹⁵ Nan ’diri mo titindu ŋutu kanyit ŋo liŋ lo nyenyei; nan mo titindu lomerika kanyit kinyo logon totoyimönöju se.

¹⁶ A nan mo tojubbi koanejin kanyit ko lwökit, nyenagon a ŋutu kanyit logon twöju nan kulo mo sirani sira ko lyöŋön.

¹⁷ Nyu nan mo ŋiŋilun ŋuto lo riŋit i kötumit na Dawidi; a nan mo tetenakindye ŋuto logon nan welakin a mor lo kötumit nagon gwoso lombo lo kokobbu.

¹⁸ Nan mo tojubbu merok kanyit ko yu na kwe, ama nan sukindyö Iŋguya kanyit i kwe logon mimilyaŋgu.