Saumajin 118 - Bibilia Buk na Ŋun nagon koti luŋu a

Tinate lo MATAT logon a te ’ya merok

¹ Tindi ta MATAT tinate ko-gwon nye a lo ’but, kogwon nyaŋu nanyit ti ’duddyö kwöŋ.

² Ti ŋutu ti Yisaraele kulyani adi, Nyaŋu nanyit ti ’duddyö kwöŋ.

³ Ti kötumit na Arona kulyani adi, Nyaŋu nanyit ti ’duddyö kwöŋ.

⁴ Ti ŋutu logon kukuk MATAT kilo kulyani adi, Nyaŋu nanyit ti ’duddyö kwöŋ.

⁵ Na gwondi nan ko delya nu a nan luŋgi MATAT; a nye ruŋge nan a tindi nan a luitöt.

⁶ MATAT a kajunyönit lio, a nan tine kujönö. Ŋo a nyo nagon ŋuto bubulö konakindya nan?

⁷ MATAT a kajunyönit lio i ŋarakindya na nan, a nan mo meddi ŋutu lo mandu nan kilo i tela.

⁸ A na ’but i wökön ko MATAT yu i ’dana, totoŋun yinikindyö na mugun i ŋutu.

⁹ A na ’but i wökön ko MATAT yu i ’dana, totoŋun yinikindyö na mugun i kimak.

¹⁰ Ŋutu ti jurön a gömökin nan kiden; ama i karin ti MATAT a nan ri-köddi se kaŋo!

¹¹ Se a gömökindyö nan, se a tumba nan; ama i karin ti MATAT a nan ri-köddi se kaŋo!

¹² Se a dudurökin köyö gwoso siwa se tutule parik gwoso kimaŋ na kikwa; ama i karin ti MATAT a nan riköddi se kaŋo!

¹³ Nan a dukaji kak parik anyen nan ’do ’doro, ama a MATAT parakindye nan.

¹⁴ MATAT gwon a riŋit nio ko a köli lio; a nye iŋge wora a kalwökönit lio.

¹⁵ Yiŋge ta ŋutu lo rigwo kase i kemialan sisira ko lyöŋön kogwon se a te ’ya, woŋoro ki adi, MATAT lo kita ko könin lonyit lutaten lo riŋit!

¹⁶ MATAT a ’bi ’yu könin lonyit lutaten ki, MATAT a kita ko könin lonyit lutaten lo riŋit!

¹⁷ Nan mo ti twan ama nan mo ruru, a nan mo tutukökindye kitajin ti MATAT.

¹⁸ MATAT a tojumbu nan ko tömiesi, ama nye a ko pakindya nan i twan.

¹⁹ Pakindye nan kötumitön ti kulya na rigwo, a nan luŋöni lukata, a nan tindi MATAT tinate.

²⁰ Mana kötumit na MATAT; ŋutu lo rigwo lo luŋö lukata.

²¹ Nan tindu do tinate kogwon do a ruk nan, a do aje wora a kalwökönit lio.

²² Ŋurupit logon ka ’dukök a renya lo aje wora a ŋurupit tutuŋet lo goŋet lo kadi.

²³ Ŋina ŋo MATAT lo kita; a yi mete a ŋo sörit!

²⁴ Lo a lor logon MATAT a tetena-kin lo; ti yi lyöŋi ta lyöŋön ko ti yi nyolani nyola ko ŋilo lor!

²⁵ Pon MATAT, yi momo ’yu do anyen lwöggu yi! Pon MATAT, yi momo ’yu do anyen tindu kulya kaŋ i puputuru ŋerot ’bura!

²⁶ Ŋuto lo luŋö i karin ti MATAT lo ti ’boriani ’boria! Yi lo gwon i lukata na kadi na MATAT kilo a ’boroja ta!

²⁷ MATAT a Ŋun, nye aje tindu yi parara. Toŋi rubaŋga ko nekenet, joŋgi lepeŋ teŋ ko oŋgwora ti ŋirit ’yuret na rubaŋgajin.

²⁸ Do a Ŋun lio, a nan tindi do tinate; do a Ŋun lio, a nan yuöggi do.

²⁹ Tindi ta MATAT tinate kogwon nye a lo ’but, kogwon nyaŋu nanyit ti ’duddyö kwöŋ!