Nyökit 34 - Bibilia Buk na Ŋun nagon koti luŋu a

Twan na Mose

¹ A Mose iti ki i piritön na ’daya-tak ti Moaba tojo ko mere Nebo, i kwe na Pisiŋa nagoŋ diraddu i swöt lo Yeriko. A MATAT kwekiŋdye lepeŋ lu jur liŋ, suluja i Gilada tojo ko Dan,

² ko Napatali liŋ, i lu jur lo Epuraima ko Manase, ko i jur lo Yuda liŋ tojo ko tör na ’balaŋ na gwon i swöt lo toko-tyaŋ,

³ ko jur lo Loki, ko jur lo kare, kweja adi loro lo Yeriko nagoŋ a köji na tömur, teŋ ko Soar.

⁴ A MATAT kulyani ko lepeŋ adi, Nye ŋilo jur logon nan a milyekin Abarayama, ko Yisaka, ko Yakobo adi, Nan mo titikin nyakwariat kasu. Nan aje tiŋdu do i meddya na lu jur ko konyen kulök, ama a do mo tine laŋaddu lukata.

⁵ Nyena a Mose kölipönit lo MATAT twaki nyu i jur lo Moaba, gwoso na jambi MATAT nu,

⁶ a MATAT nuŋge lepeŋ i loro i jur lo Moaba logon diraddu i swöt lo Bete-peor; ama lele ŋuto a ko den pirit na nukari lepeŋ nu tojo ko lo lor.

⁷ A Mose gwe ko kiŋajin mia geleŋ ko merya murek na twaji nye nu; a konyen kanyit gwe a ko musue, a riŋit na mugun nanyit gwe a ko ’baka.

⁸ A ŋutu ti Yisaraele gwine Mose i piritön na ’dayatak ti Moaba ko perok merya musala; a kirut perok gwiesi ko lo delyari Mose kulo tutuŋge tutuŋgö.

⁹ A Yosua ŋuro lo Nun iŋge jore ko Mulökötyo lo koŋon, kogwon Mose a sopakiŋdya könisi kanyit ko lepeŋ loki, nyena a ŋutu ti Yisaraele yiŋge lepeŋ, a koŋdi gwoso na saŋi MATAT Mose nu.

¹⁰ Suluja i nu diŋit a lele nebi gwe a ko pukun i Yisaraele gwoso Mose, logon MATAT a den a lokomor;

¹¹ a lele gwe ’bayin gwoso lepeŋ i kweyesi ko i tusörösi liŋ nagon MATAT a soŋdi lepeŋ i konakiŋdya na Paro, ko kölipönök kanyit lio, ko jur lonyit lio kunu i jur lo Ejipeto yu nu.

¹² Iŋkoi lele nebi ’bayin logon koŋdya ŋo temejik lio tokujö opesi gwoso nagon Mose a konakin ko ŋutu ti Yisaraele liŋ i komor kunu.