Mika 5 - Bibilia Buk na Ŋun nagon koti luŋu a

¹ I na diŋit do aje gomoki kiden ko gorom nagon a mariŋ; yi ŋutu kulok aje tuma ko merok; kasaranit lo Yisaraele mo ’bi ’bito i ŋebi ko ture.

Kalwokonit lo po Beteleme mo saŋu ŋutu

² Ama ta ŋutu ti Beteleme na gwon i jur lo Eparata, ma ’di kodyo kotumit nasu a na ’dit i kiden na kotumiton ti Yuda, ama lele ŋuto mo pupukun kasu kiden a lio logon a kasaranit lo Yisaraele, logon pipiluŋdya ’beron koju nu, i perok ti ’beron kulu.

³ Nyena nye mo puŋutukin ŋutu ti Yisaraele i konisi ti merok kase, tojo ko diŋit nagon ŋuto na gogga i ta ’duuŋdyo na a Iwoggu mugun; a kirut pitono ti luŋasirik kanyit mo yitöni yito i ŋutu kase.

⁴ A nye mo gwo ’de gwo ’dan ko riŋit na MATAT i yuggu na yidin kanyit, i todumalan na karin ti MATAT Ŋun lonyit. A se mo si ’dani ’bak kujono, kogwon riŋit nanyit aje yegga tojo ko ’dutesi ti kak;

⁵ a nye mo gwe a ŋuto lo taliŋ. A ko ŋutu ti Asura a lupuŋdyo kayaŋ i jur, a ryoryöggi kujoŋ kaŋ, a yi mo topikiŋdye kayukuk buryo se ko kasarak budok i moro ko se.

⁶ A se mo saŋi jur lo Asura ko baŋdujin, a saŋi jur lo Nimeroda ko baŋdujin lo ’dutwe kaŋo; a se mo lwokuŋdye yi i ŋutu ti Asura na pöri se kayaŋ i jur i ryoryogga na lokökorit lo jur likaŋ nu.

⁷ A pitono ti ŋutu ti Yakobo i kiden na gweyajin ti ŋutu jore kulo mo gwe gwoso puŋutut lo po ko MATAT yu, ko gwoso lilima na ’don i doru loki, nagon ti karakin i mordu na ŋutu kwoŋ.

⁸ A pitono ti ŋutu ti Yakobo mo gwe i kiden na juron ko i kiden na gweyajin ti ŋutu jore, gwoso komiru i kiden na kijakwa ti mu ’diŋ, ko gwoso komiru titinti i kiden na yidin, a ko lepeŋ gwugwuoddu, a ryoka-kiŋdye yidin kak, a kekereŋdi se, a kalwokonit gwe ’bayin.

⁹ A ta mo ’bilikiŋdye konisi kasu i moro ko kaŋisak kasu, a ta mo tukaŋi merok kasu liŋ adi sit.

¹⁰ Nan MATAT lo kulya adi, I ŋilu lor nan mo tutukar kusanjin kasu i kiden nasu, a mo kökoroji arabiajin kasu lo jijiko.

¹¹ A nan mo tukaŋi köjino ti jur losu, a duŋge kak piriton kasu liŋ nago na titiyu.

¹² A nan mo tukaŋi ŋutu kasu liŋ logon a kawanak, a ta koti mo gwe ’bak kadolak ti mian.

¹³ A nan mo tukaŋi nyomuejin kasu i jur losu, se ko ŋurupo logon ta a togwi ’dikin ki i kwakwasa kulo, a ta mo koti tine dulaki kak i kwakwaddu na ŋo na teten ta ko konisi kasu kine.

¹⁴ A nan mo gwuŋdye kaden kasu ti mian logon a Asera kulo kago kasu i jur, a mo tukaŋi köjino kasu.

¹⁵ A nan mo ropakiŋdye juron logon ti yiŋ nan kilo ko tukaŋan se ko woran na pape. kasu.