Mika 2 - Bibilia Buk na Ŋun nagon koti luŋu a

Delya i ŋutu logon ru ’ya ŋutu lomerika

¹ Wöidiö i ŋutu logon gwon kase i dotoesi a yeyeji toron ko i koŋdya na ŋo narok. Ko kak aje waran, a lepeŋat koŋdi se, kogwon se gwon ko riŋit i koŋdya na kine ŋo.

² Lepeŋat be ’ya meleseno, a riŋun-dye se, a be ’yi kadijik a ’dumaddi se ko riŋit; lepeŋat ru ’ya ŋutu ko midijik kase, a ru ’ye ŋutu ko kak jin kase lomoriot.

³ Nyenagon nan MATAT lo kulya adi, Mete ta, nan tetenakin ŋina kotumit ŋo naron, nagon gwoso gwuluŋi logon ta ti bulo wuddya muruto kasu, kode woro ko ’du ’duŋga, kogwon ŋina mo gwon a diŋit naron.

⁴ I ŋilu lor a se mo yo ’yi koli giriset logon ’dö ’döyörikin ta, a mo luluje ko delyaesi na pötwör adi, Yi aje koro asut, koret na ŋutu kaŋ aje lopuko; nye ripara kayaŋ ada! Meleseno kao a koraki karerenyak.

⁵ Nyena a ta mo gwe ’bak lele ŋuto I momoret nio na MATAT logon g ’umba guralan i temba na koret na kak ko pata.

⁶ Lepeŋat ruruddu kulya tokuesi adi, Ko ruruddu ta kulya tokuesi, ko tokujo ta kulya gwoso kine. Yu na kusik mo ti mok yi.

⁷ Ta kotumit na Yakobo, ŋuto ŋona bubulo pija adi, MATAT ’bak toili ŋŋget lo kulya le? Kine a konesi kanyit le? Kulyaesi kanyit ŋona ’bayin a lo ’but i ŋutu logon woro rigwo le?

⁸ Ama ta ŋikin i moro ko ŋutu kwe gwoso merok; ta rusun boŋgwat muisi kano ko riŋit i ŋutu logon ’bak kulya ko a ŋutu logon ti yeyeju moro.

⁹ Ta rikun wate ti ŋutu kwe kaŋo kase i kadijik na nyanyara, a ta riŋuŋdye bulet nio kaŋo asut i ŋwajik kase lo ’di ’dik.

¹⁰ ŋine ta ki ko iti ta, kogwon na ’bayin a pirit nasu yukaet, kogwon tolutan kata na tutukaŋu ŋutu ko tukaret nagon a naron bia parik.

¹¹ Ko lele ŋuto logon ko mulökötyo lo mumulugga wöwöröji jamaddu kulya ’burönö adi, Nan tokukiŋdyo ta kulya ti binyo se ko ti yawa na pötwör, lepeŋ kodyo lo gwon a nebi logon kilo ŋutu nyanyar!

¹² Ta ŋutu ti Yakobo, nan MATAT mo ’diri tutun ta liŋ, a nan mo momori pitono ti ŋutu ti Yisaraele; a nan mo momorakiŋdye lepeŋat i pirit na geleŋ gwoso köbilu i goro, ko gwoso teŋ na yidin i pirit yukit, a se mo woŋe adi, Gumm, kogwon se jore parik.

¹³ A ŋuto lo tulokiŋdyo pirit lupet i gorom lupoddi kaŋo kase ŋerot, a se burunyuŋdye kaŋo a Iwoŋoddi kotumit. A mor lose iti kase ŋerot, nan MATAT lo nyomoddu lepeŋat.