Matayo 3 - Bibilia Buk na Ŋun nagon koti luŋu a

Yoane Kabatisanit a tokujö Loŋe Lo ’but

¹ Nyena i ŋinu diŋit a Yoane Kabatisanit lo poŋdi a tokuje i yöbu na Yudaya adi,

² Löpuŋge ta töilyet kogwon Tumatyan na Ki aje yepuŋdya.

³ Kogwon ŋilo a nye logon nebi Yisaya köju a jambu i kulya kanyit adi, Gworo lo lele ŋuto wowoŋon i yöbu adi, Yayaraki ta kiko lo MATAT jojo, rine ta gwokiot kanyit gwogwo.

⁴ A Yoane iŋge jupu boŋgo nagon tetena ko kupir ti kamilo, ko a dukukiŋdyö gom nagon a ’böriköt kanyit i mukök, a kinyo lonyit gwe a mayat se ko siwatat na mu ’diŋ.

⁵ A ŋutu ti Yerusalema ko ŋutu ti Yudaya ’bukuluŋ, se ko ŋutu ti jur ’bukuluŋ lo diŋö ko Yardene, iti ko lepeŋ yu,

⁶ a lepeŋ iŋge batiddya se i kare Yardene, a se tuŋge toronjin kase.

⁷ Ama a na meddi lepeŋ Parusijin jore se ko Sadokejin jore poŋdya i batisa nu, a nye pije se adi, Ta torela ti munuö, ŋa lo tokujöŋdu ta i woran na popo nu, anyen ta rwörwöddu le?

⁸ Koŋdi ta ŋo nagon kwekiŋdya adi ta ’diri aje löpuggö töilyet,

⁹ an ta ko yeyeju ta kasu i töilyet adi, Abarayama a merenye likaŋ. Nan takiŋdya ta adi Ŋun bubulö pipiluŋdya nyakwariat ti Abarayama ma ’di i kilo ŋurupö.

¹⁰ Ma ’di soŋinana tulu a tetenaki ajo anyen tokori kaden i kokori. Kaden liŋ logon ti radan ludweki lo ’but kilo toko kak agubani i kimaŋ.

¹¹ Nan lo batiddya ta ko piŋo anyen kwekiŋdya adi ta aje löpuggö töilyet. Ama lele ŋilo pöpö köyö i mukök logon riŋit nanyit a duma lwölwoŋ nio, logon nan ti jukin ’doggu kamuka kanyit. Lepeŋ mo batiddya ta ko Mulokötyo Loke ko kimaŋ.

¹² A nye gwe ko köbi setet kanyit i konin, a nye moseddi ’bolot liŋ lo gwon kanyit i pirit gwutet na ’bolot kulo, a yuŋdye ’bolot kanyit i gugu, ama a nye mo ’yuŋe pudi ko kimaŋ nagon ti bulö peŋa.

Batisa na Yesu

¹³ Nyena a Yesu ŋiu kaŋo i Galilaya a poŋdi Yardene ko Yoane ni i batisa ko lepeŋ.

¹⁴ Ama a Yoane ködyö möŋi teŋgu lepeŋ adi, Do ködyö lo batiddya nan, a do kölumbö lo poŋdi köyö ni!

¹⁵ Ama a Yesu waddi lepeŋ adi, Söŋinana ti gwe sona, kogwon ködyö a na ’but koyi kökon ŋo liŋ nagon Ŋun ’de ’dekan i ŋilo kiko. Nyena a Yoane ruŋge batiddya lepeŋ.

¹⁶ a nagon Yesu aje batisa nu, ’de ’de a nye poŋdi kaŋo i piŋo kata, mete, a ki iŋge ŋaju, a nye meddi Mulökötyo lo Ŋun poŋdi gwoso gure a ’duki ko lepeŋ loki;

¹⁷ mete, a gworo lo kuu ki yu adi, ŋilo a pilili liŋ lo Ŋuro lo nyanyara, logon nan a lyöŋgi parik lo.