Matayo 24 - Bibilia Buk na Ŋun nagon koti luŋu a

Yesu a jambu i kulya ti turö na Kadi na Ŋun kak asut

¹ A Yesu kö ’yi Kadi na Ŋun, a nagon nye suluje tu nu, a ŋutu kanyit kajujumuk poŋdi po a kwekiŋdye lepeŋ kadijik ti Kadi na Ŋun.

² A nye waddi pija adi, Ta memet kine ŋo liŋ le? ’Diri nan takiŋdya ta adi, ŋurupit nene geleŋ molu ti kölöki ni i nene loki nagon mo ti gubaki kak.

Yöyöŋesi se ko sasanyesi

³ A na si ’dari Yesu i Mere lo Jeitun nu, a ŋutu kanyit kajujumuk poŋdi i pija na lepeŋ na gwoŋdi se ka ’de nu, adi. Taki yi diŋit nagon kine po mo kokonari, köti kweyet mo a nyo i po inot ko i ’dutet na na kak?

⁴ A Yesu waddi lepeŋat adi, Kunyar ta, an lele ŋuto tugir ta.

⁵ Kogwon ŋutu jore mo popo geleŋ geleŋ i karin kwe, a kulyani adi, Nan a Masia, a se mo tugiŋe ŋutu jore.

⁶ A ta mo yiŋge kulya ti mörö, ko lodokon ti mörö; nyena meddi ta ’bura an ta ko kujöno ta. Kogwon kine po agu ködyö kokona, ama ’dutet nyuŋ ’bak.

⁷ Kogwon jur mo mömöro ko lele jur, a tumatyan mo möröni ko nene tumatyan, a dyapan se ko rigirigilön mo gwe i piritön ka ’de ka ’de.

⁸ Kine po liŋ a popesi suluesi.

⁹ A ŋutu mo tiŋdi ta i topopa ko i tatua, a ŋutu ti jurön liŋ mo mane man ta kogwon karin kwe.

¹⁰ A ŋutu jore mo kukutörö bot, a mo tupöki ko ’börik anyen tatatua, ko a tumane tuman ko ’börik.

¹¹ A nebijin ’burönök mo puku pukun a mo togiŋe ŋutu jore.

¹² A nyaŋu na ŋutu lojore mo worani pötö kogwon toronjin a ŋdi.

¹³ Ama ŋuto logon a poŋga tojo ko ’dutet lo mo lwölwökö.

¹⁴ A lo Loŋe Lo ’but lo Tumatyan mo totokuöjine i kak ’bukuluŋ anyen tokurukiŋdyö kine kulya i ŋutu liŋ ti jurön, a kirut ’dutet mo na poŋdi.

Po Ŋga duma parik

¹⁵ Nyenagon ko ta a met po na mamana parik nagon köŋu keri, nagon nebi Daniele köju a jambu kulya kanyit, gwogwo ’dan i pirit nake na rurwan nu (ti ŋuto logon kekeŋdya lo kuru kurun),

¹⁶ a kirut ti ŋutu lo gwon Yudaya kulo wöki i merya;

¹⁷ ti ŋuto lo gwon i lo ’dek lo kadi lo gwe ti kiyuŋdya kak i ’dumaddu na po nagon kanyit kadi kune;

¹⁸ ko ti ŋuto lo gwon i melesen lo gwe ti yitwe i ’dumaddu na boŋgo nanyit.

¹⁹ Ama gwon a delya i ŋutu na gwon ko pelela, ko i se na tutunöggu i kilu perok!

²⁰ Momo ’yi ta anyen wökön nasu böŋö gwon ti gwon i diŋit na katirut kode i Sabata.

²¹ Kogwon mo gwon a poŋga duma parik, gwoso nagon ’beron a ko gwoŋdi na suluja i suluwa na kak tojo ko na diŋit, a molu tine pokin köti kwöŋ.

²² a ko ködyö kilu perok a ko nyökwe kak, a ŋuto ködyö gwe ’bayin lo lwölwökö, ama kilu perok nyökwe kak kogwon kulya ti ŋutu kanyit lo wulwe.

²³ Nyena a ko lele ŋuto kulya ko ta i ŋinu diŋit adi, Meddi ta, Masia malo! kode adi, Nye malu! an ta ko yuŋ ta po na jam lepeŋ kine.

²⁴ Kogwon Masiajin ’burönök ko nebijin ’burönök mo pupukun, a mo kweji kweyesi temejik ko po sörösi, anyen tugiŋa ma ’di ŋutu lo wulwe, ko bubulö.

²⁵ Mete ta, nan aje tukökin ta a kokwe nagon kine po a ko nyuŋ pokin nu.

²⁶ Nyenagon ko ŋutu mo kulya ko ta adi, Mete ta, lepeŋ lu mu ’diŋ, an ta ko tu ta kaŋo; a ko se mo kulya adi, Mete ta, lepeŋ lu i toŋkwet, an ta ko yuŋ ta.

²⁷ Kogwon gwoso na meme ’dekuŋdye kipya lo ki suluja i swöt lo ’yure a meme ’dekara i swöt lo tokotyaŋ nu, a po nio na Ŋuro lo ŋuto mo gwe sona.

²⁸ Ko ’burwo mo gwon ya, a logulusen mo momoraddi nyu.

Po na Ŋuro lo ŋuto

²⁹ A ’de ’de i mukök na kilu perok popesi, a kolor mo musöni musö, a yapa mo tine pararaju, a kaser ki yu mo ’do ’done kak, a riŋitön ti ki mo yeyeti yeyeta.

³⁰ A kirut kweyet nio na Ŋuro lo ŋuto mo na puku ki yu, a kötumitön liŋ ti kak mo gwine gwien jojogga kidoni kase, a se mo meddi nan Ŋuro lo ŋuto popo i ’dikolo ko riŋit se ko minyo duma parik.

³¹ A nan mo soŋdi malaikajin kwe i kuddya na tore parik, a se mo momoruŋdye ŋutu kwe lo wulwe i swötön iŋwan ti kak, suluja i ’dutet na kak tojo i nene ’dutet.

Todinet i kulya ti ki ’bi

³² Denuŋdye ta lilim lo ködini lo ki ’bi adi, ’de ’de nagon kenia kanyit wile wilan a koropo nu, a ta dene den adi kiser gwe nyona.

³³ Nyena köti, na meddi ta kine ŋo liŋ nu, a ta deŋdi adi nan gwe nyona ko po, ’diri nan gwe i kötumit.

³⁴ ’Diri nan takiŋdya ta adi, ŋutu ti na toberon mo ti ’duddyö tojo ko kine ŋo liŋ mo a kona.

³⁵ Ki ko kak mo ’du ’duddyö, ama kulyaesi kwe mo ti ’duddyö kwöŋ.

Ŋuto ti den ŋilu lor kode ŋinu diŋit

³⁶ Lele ŋuto ti den ŋilu lor ko ŋinu diŋit, ma ’di malaikajin ti ki a ko den, ma ’di nan Ŋuro a ko den, ama ka ’de Baba lo deŋdya.

³⁷ Nyena po nio na Ŋuro lo ŋuto mo gwon gwoso perok ti Noa köju kulu.

³⁸ Kogwon i kulu perok i ŋerot nagon bar a ko nyuŋ po nu, ŋutu nyenyesu ko mömoju, lepeŋat yeyemba ko yeyema, tojo ko lor logon Nija lupöri i ki ’bo kata lu,

³⁹ ama a lepeŋat gwe a ko den tojo bar a po a iŋge ’dokoro se liŋ, köti a po nio na Ŋuro lo ŋuto mo gwe sona.

⁴⁰ I ŋilu diŋit a ŋutu murek mo gwe i melesen; lele mo ’du ’dumaji, a lele mo kolökine kölöki.

⁴¹ A ŋutu wate murek mo gwe i jijö i kijo; nene mo ’du ’dumaji, a nene mo kolökine kölöki.

⁴² Nyenagon gwe ta ko konyen ŋa, kogwon ta ti den lor logon nan MATAT losu popori.

⁴³ Ta deden ’bura adi, ko monye kadi ködyö a den i nan diŋit na tukwaje kolanit pöpö, a nye ködyö aje tiju, a nye ködyö tine kölökin kadi nanyit i turöji lukata.

⁴⁴ Nyenagön ta köti ködyö gwon ajo, kogwon nan Ŋuro lo ŋuto mo popo i diŋit nagon ta a ko yeŋdi nan i po nu.

Köliŋönit lo yiyiniki i kita ko logon ti yiniki

⁴⁵ Taki ta nan, köliŋönit lo yiyiniki i kita ko a lokoŋ a ŋa, logon duma lonyit a sarakiŋdya i meddya na mede nanyit, i korakiŋdya na köliŋönök kinyo i diŋitan na ’but?

⁴⁶ Köliŋönit gwoso ŋilo a kalyoŋi, logon ko duma lonyit a ’dur a ko ryeji nye i koŋdya na kita nanyit.

⁴⁷ ’Diri nan takiŋdya ta adi, nye mo sarakiŋdya lepeŋ i meddya na ŋo kanyit liŋ.

⁴⁸ Ama ko ŋilo köliŋönit loron a kulya kanyit i töili adi, Duma liŋ a karakin diŋit a najo,

⁴⁹ a nye suluje ’biddyö köliŋönök logön kita ko lepeŋ i pirit na geleŋ kulo, a nyesi nyesu, a möji möju i pirit na geleŋ ko kamerak,

⁵⁰ a duma lo ŋilu köliŋönit mo ’dure i lor logon nye a ko yinikin lepeŋ i po lu, ko i diŋit nagon nye a ko denun,

⁵¹ a mo totoggi lepeŋ ka ’de ka ’de, a mo tiŋdi lepeŋ i parundya na pirit na ŋutu kamumulukak. A ŋutu mo gwine gwien a mo pije kala nyu.