Matayo 23 - Bibilia Buk na Ŋun nagon koti luŋu a

Yesu a kunyaŋu ŋutu i kulya ti katodinok ti Saresi ti Mose se ko Parusijin

¹ A kirut Yesu kulyani ko lodir lo ŋutu se ko ŋutu kanyit kajujumuk kulo adi,

² Katodinök ti Saresi se ko Parusijin ruddya todiŋdyö ko Mose i pirit.

³ Nyenagon ŋo nagon lepeŋat a sarakin ta kine kone ta koŋ ko ’depe ta ’dep; ama ko koŋdya ta gwoso na koŋdi lepeŋat na, kogwon lepeŋat jajambu a tine kon ŋo na jam se kune.

⁴ Lepeŋat toŋa ŋo logon pömöni i ’doko, a sopakiŋdye se ko ŋutu i gelya, ama lepeŋat ko ’börik ti ’bön yökiŋdyö kak ma ’di ko morin kase.

⁵ Ŋo liŋ na kon se kine kona anyen ŋutu memet. Kogwon se teteŋdya rijikijin kase logon gwon ko kulyaesi ti Ŋun i lukata nase a dumalak parik, a teteŋdi boŋgwat kase ko swalya a lojo parik;

⁶ a nyaŋi si ’da i piritön ti ŋutu lo kukwön i rorweki, ko si ’daesi ti ŋerot i kadijik momoresi,

⁷ a nyare nyar romarikin i piritön gwöriesi, a nyare nyar ŋutu i luŋgu na se a Katodinök.

⁸ Ta ködyo ti luŋu a Katodinök, kogwon ta gwon ko Katodinönit geleŋ, a ta liŋ gwe a luŋasirik.

⁹ Ta ködyö ti luŋgu lele ŋuto i kak ni a monye losu, kogwon ta gwon ko Monye geleŋ ki yu.

¹⁰ Ta ködyö ti luŋu a katojumuk, kogwon ta gwon ko Katojumunit geleŋ logon a Masia.

¹¹ Ko ŋuto logon ’dekan gwon a duma kasu kiden ti lepeŋ ködyö gwe a ’dupiet losu;

¹² ŋuto logon toduma ’yu mugun lo mo toto ’dita, ama nye lo to ’diddya mugun lo mo totodumala.

¹³ Wöidiö, ta katodinök ti Saresi ti Mose se ko Parusijin, kamumulukak! Kogwon ta a kinun ŋutu kaŋo i Tumatyan na Ki; ta ko ’börik a ko lupö nyin, a tine rukökiŋdyö ŋutu i lupö lukata logon ’de ’dekan lupö kilo. [

¹⁴ Wöidiö, ta katodinök ti Saresi se ko Parusijin, kamumulukak! Kogwon ta nyesu ŋo ti karu ’bejin, kölumbö a ta kwakwaddi diŋit a najo mumulugga. Nyenagön ko ŋina kwe ta mo ririŋa bia parik.]

¹⁵ Wöidiö, ta katodinök ti Saresi se ko Parusijin, kamumulukak! Kogwon ta wöröji i tör ko i kak anyen löpukuŋdyö ma ’di ŋuto geleŋ i keri losu; a ko lepeŋ a löpukuŋdyö kasu ni, a ta kölumbö koŋdi lepeŋ a ŋuto lo Geena lwölwöŋ ta daŋin murek.

¹⁶ Wöidiö, ta kanyömök mo ’dokeno! Ta kulya adi, Ko lele ŋuto a milyeju ’diŋdya Kadi na Ŋun, ŋina a ŋo kana; ama ko nye milyeju ’diŋdya dakap na Kadi na Ŋun, a milye lonyit morgi lepeŋ.

¹⁷ Ta ŋutu lu ’böŋ ko a mo ’dokeno! Nan nagon lwölwöŋgu parik, dakap kode Kadi na Ŋun nagon tiŋdu dakap i gwon a nake na rurwan?

¹⁸ Köti ta kulya adi, Ko ŋuto a milyeju ’diŋdya pirit ’yuret na rubaŋgajin, ŋina a ŋo kana; ama ko nye milyeju ’diŋdya ’doket na gwon i loki na ’yuret na rubaŋga na, a milye lonyit morgi lepeŋ.

¹⁹ Ta ’diri a mo ’dokeno! Nan nagon lwölwöŋgu parik, ’doket kode ’yuret na rubaŋga nagon tiŋdu ’doket i gwon a nake na rurwan?

²⁰ Ŋuto lo milyeju ’diŋdya pirit ’yuret na rubaŋgajin lo kweja adi lepeŋ a milyeju ko ’yuret na rubaŋga se ko ŋo liŋ na gwon i loki nanyit kune.

²¹ Köti nye lo milyeju ’diŋdya Kadi na Ŋun lo kweja adi lepeŋ a milyeju ko Kadi na Ŋun se ko Ŋun logon gwolor i lukata nanyit lo.

²² Köti nye lo milyeju ’diŋdya ki lo kweja adi lepeŋ a milyeju ko si ’daet na Ŋun, se ko Monye si ’daet.

²³ Wöidiö, ta katodinök ti Saresi ti Mose se ko Parusijin, kamumulukak! Kogwon ta ’dogga ko swöt topuökit lo nana, ko lo nabat, ko lo kumin, ama ta a kölökiŋdyö saresi lo pömöni, kweja adi, ’duŋgö na rigwo, kowon na konyen se ko yupet. Kine ŋo a se nagon ta ködyö kökon, a gwe ti kölökin kunie a ko kona.

²⁴ Ta kanyömök mo ’dokeno! Ta tiyaddu kimurte, ama a ta wilöddi kamilo adi gut!

²⁵ Wöidiö, ta katodinök ti Saresi ti Mose se ko Parusijin, kamumulukak! Kogwon ta lalaju kaŋo na kopojin ko na saan ŋin, ama kasu lukata ta a jore ko ryaggu ko i koŋdya na ŋo a ’döri.

²⁶ Do Parusityo mo ’doke! A kokwe lalane lala lukata na kopo se ko na saani, anyen kaŋo nanyit köti böŋö gwon a nake.

²⁷ Wöidiö, ta katodinök ti Saresi ti Mose se ko Parusijin, kamumulukak! Kogwon ta gwon gwoso gulömö nagon a buyala a nakwe, a metani kaŋo kwekwelen, ama i lukata nase a jore ko kuyu ti ŋutu se ko ŋo liŋ na ’burön.

²⁸ Nyena köti ŋutu met ta kaŋo a ŋutu ti löti lo rigwo, ama kasu lukata taajoreko mumulukesi se ko toronjin.

²⁹ Wöidiö, ta katodinök ti Saresi ti Mose se ko Parusijin, kamumulukak! Kogwon ta gweja gulömö ti nebijin, a tokweleŋdi gulömö ti ŋutu ti löti lo rigwo,

³⁰ a kulyani adi, Koyi köju ködyö a si ’da i diŋit na merenyejin kaŋ, a yi ködyö kwöŋ tine morakiŋdya i ’bukuŋdyö na rima ti nebijin.

³¹ Nyena ta ko ’börik lo tökoŋu kulya kasu arabat adi, ta a nyakwariat ti ŋutu logon aje tatuja nebijin.

³² Nyenagon tutuŋöddi ta ŋo nagon merenyejin kasu köju a kölökin kunu.

³³ Ta munuö, ta torela ti munuö katatuak, ta rwöddu ada i ’duŋöki i Geena?

³⁴ Nyenagon nan mo susunyukin ta nebijin, ko ŋutu lokoŋ, se ko katodinök ti Saresi. Ta mo tatatu kulye kase a ’bikikiŋdye i ködini na görö; ta mo ’bi ’bit kulye kase kasu i kadijik momoresi ko kurubasi logon a kwara, a sasaŋdi se suluja i nene köji tojo ko nene;

³⁵ anyen rima liŋ ti ŋutu logon ’bak kulya, logon a tatua i na kak kulo böŋö ropaki kasu i kusik, suluja i ’bukwe na rima ti Ebele lo ’bak kulya lo tojo i ’bukwe na rima ti Takaria, ŋuro lo Barakia, logon ta aje tatukin i kiden na pirit nake na rurwan se ko na pirit ’yuret na rubaŋgajin.

³⁶ ’Diri nan takiŋdya ta adi, kine ŋo liŋ mo kokonaki i ŋutu ti na toberon.

Yesu gwi ko Yerusalema

³⁷ A, Yerusalema, Yerusalema, ŋutu kulök a katatuak ti nebijin, a gugubuje ŋutu logon a sunyuki do kilo ko ŋurupö! Diŋitan muda nagon nan ’de ’dekan sukuŋdyö ŋwajik kulök köyö ni i pirit na geleŋ gwoso sukuri nagon sukuŋdyö torela kanyit i köpukön na, ama a ta tine ’bön!

³⁸ Mete ta, kadi nasu a kölöki ta a murwö.

³⁹ Nyena nan takiŋdya ta adi, ta mo ti met nan köti tojo ko diŋit a po nagon ta kulyari adi, Ti nye lo po i karin ti MATAT lo ’boriani ’boria.