Matayo 18 - Bibilia Buk na Ŋun nagon koti luŋu a

Ŋa logon a duma i Tumatyan na Ki

¹ A i ŋinu diŋit a ŋutu kajujumuk poŋdi ko Yesu ni, a pije adi, ŋa logon a duma i Tumatyan na Ki?

² A nye lupundye ŋuro lo ’dit kanyit ni, a togwi ’dikiŋdye lepeŋ kase i komor,

³ a kulyani adi, ’Diri nan takiŋdya ta adi, ko ta a ko löpuggö a worani gwoso lupudiet, a ta kwöŋ mo tine lupö i Tumatyan na Ki.

⁴ Nyena ŋuto logon tokoyogga mugun gwoso lo ŋuro, lepeŋ a duma i Tumatyan na Ki.

⁵ Ko ŋa lo wuju lele ŋuro gwoso lo i karin kwe wuju nan.

ŋuto lo lokuŋdya kayupönit i toroŋdya

⁶ A ko ŋuto logon a lokuŋdya lele lo kulo ŋwajik lo ’di ’dik logon a yubbö nan kulo i toroŋdya, ködyö a na ’but ko lepeŋ a toraki kijo duma kanyit i murut anyen to ’dirörö lepeŋ i tör nagulu.

⁷ Wöidiö na kak, i kulya ti ŋo nagon lokuŋdya ŋutu i toroŋdya! ’Diri ŋo nagon lokuŋdya ŋutu i toroŋdya agu ködyö popo, ama wöidiö i ŋuto logon kine ŋo po ko lepeŋ!

⁸ A ko könin ilot kode moköt ilot lo lokuŋdya do i toroŋdya, ’duŋu lepeŋ kaŋo ko gubara nye pajo; bia a na ’but ko do lupö ko ŋun yu i ru ko mugun inot a köŋu, kode a ŋöde, lwölwöŋ do gubaji ko könisi murek kode mokosi murek i kimaŋ nagon ti peŋa.

⁹ a ko koŋe ilot lo lokuŋdya do i toroŋdya, wuluddu nye kaŋo, ko gubara nye pajo; bia a na ’but ko do lupö i ru ko koŋe geleŋ lwölwöŋ do gubaji ko konyen murek i Geena nagon a kimaŋ.

Lilim lo köbilityo nagon a likin

¹⁰ Meddi ta ’bura an ta lauŋdya lele lo kilo ŋwajik lo ’di ’dik; kogwon nan takiŋdya ta adi malaikajin kase ki yu ŋupi memeddya komor na Baba lo gwon ki lu. [

¹¹ Kogwon nan Ŋuro lo ŋuto aje po i lwöggu na ŋutu logon aje likin kulo.]

¹² Ta yeyeju ada? Ko lele ŋuto gwon ko köbilu mia geleŋ, a nene nase geleŋ iŋge lyaŋan, nye ŋona ti kölökin merya buŋwan wot buŋwan kune i merya a galaddi na nagon aje lyaŋan na?

¹³ Ko lepeŋ ködyö a ryö, ’diri nan takiŋdya ta adi, lepeŋ lyölyöŋön parik ko ŋina kobilityo lwölwöŋ kunie merya buŋwan wot buŋwan nagon kwöŋ a ko lyaŋan kune.

¹⁴ Köti gwon sona adi Monye losu lo gwon ki lu ködyö ti ’dekan lele lo kilo ŋwajik lo ’di ’dik lilikin.

Luŋaser logon a konakiŋdya do arabat

¹⁵ A ko luŋösur a konakiŋdya do arabat, iti ko lepeŋ yu ko kweki lepeŋ toron nanyit, ta ko lepeŋ murek. A ko lepeŋ a yiŋ do kweja adi do aje ’bolun luŋösur.

¹⁶ Ama ko nye ti yiŋ do, joŋgi ŋuto geleŋ kode murek i pirit na geleŋ ko do, a kulya liŋ mo ririkine gwogwo i tökoresi ti katökorok murek kode musala.

¹⁷ A ko nye a renya yiŋga lepeŋat, tuköki kine kulya i kanisa; ko nye a renya ma ’di kanisa koti, konaki lepeŋ gwoso lepetyo kode kapepenanit lo usur.

Toŋa ko laggu

¹⁸ ’Diri na takiŋdya ta adi, ko ta mo toŋa nyo i kak ni, ki yu a mo torani tora, ko ta laggu nyo i kak ni, ki yu a mo lakani laka.

¹⁹ Koti nan takiŋdya ta adi, ko kulye kasu murek i kak ni a ruggö piyuŋdya nene ŋo, a Baba lo gwon ki lu mo rukökiŋdye se.

²⁰ Kogwon ko ŋutu murek kode musala a momora i karin kwe a nan gwe kata kase kiden.

Lilim lo kölipönit logon ti pitökiŋdyo

²¹ A kirut a Petero poŋdi po a pije Yesu adi, MATAT, nan ködyö pitökiŋdyo luŋaser liŋ daŋin muda ko nye a konakiŋdya nan arabat? Ŋona tojo ko daŋin buryo?

²² a Yesu waddi adi, Nan a ko rukökin do adi do ködyö pitökiŋdyö tojo ko daŋin buryo, ama adi do ködyö pitökiŋdyö tojo ko daŋin merya buryo daŋin buryo.

²³ Nyenagon Tumatyan na Ki tojuki i lele mor logon ’de ’dekan deŋdya möriöt ti kölipönök kanyit.

²⁴ a na suluje nye denuŋdya kaŋo nu, a lele ŋuto jweni kanyit ni logon a kuŋö ginejin alipan jore parik.

²⁵ a nye gwe ’bak ŋo nagon nye robbi möri na ŋilo duma, nyena a duma lonyit sarakiŋdye adi ti lepeŋ gwöröjine gwöröji i pirit na geleŋ ko nakwan nanyit, ko ŋwajik kanyit, se ko ŋo kanyit liŋ, anyen ropari möri.

²⁶ Nyena a kölipönit lo ’dojone rupu ko duma lonyit i mokosi, a mamaŋdi lepeŋ adi, Böŋö pon matat, kölöki nan ko diŋit a na ’dit, nan mo roröŋ ŋo kunök liŋ.

²⁷ a duma lo ŋilu kölipönit wone konyen ko lepeŋ, nyena a nye pitökiŋdye möri na, a kölöddi lepeŋ.

²⁸ Ama a na tiri ŋilo kölipönit nu, a nye rume ko lele lo köliponok logon se kita i pirit na geleŋ lo, logon a kuŋö ginejin kanyit ku ’dik. A nye to ’yi lepeŋ i murut kulya adi, Rope ŋo nagon do a kurörö köyö kune.

²⁹ Nyena a kölipönit logon se kita i pirit na geleŋ lo, ’dorone kak ko lepeŋ i mokosi, a mamaŋdi lepeŋ adi, Böŋö kölöki nan ko diŋit a na ’dit, nan mo roröŋ do.

³⁰ Ama a nye tine ’bön, a kölumbö tiŋdi lepeŋ i kadi rereket tojo lepeŋ ködyö a robba möri na.

³¹ A na meddi kulye kölipönök logon se kita i pirit na geleŋ kulo ŋo na kona kunu nu, a se delyani delya parik, a iti ko duma lose yu, a nyönyökökiŋdye lepeŋ ŋo liŋ nagon aje kona kunu.

³² Nyena a duma lonyit lupundye lepeŋ kanyit ni, a kulyani adi, Do kölipönit loron! Nan aje pitökin möri inot liŋ na mamaŋdi do nan nu.

³³ Do köti ködyö ti won konyen ko kölipönit logon ta kita i pirit na geleŋ lo, gwoso nagon nan aje won konyen ko do na le?

³⁴ A duma lo wore woran parik, a pakiŋdye lepeŋ ko kasasanyak i könisi, tojo ko lepeŋ ködyö a robba möri na liŋ.

³⁵ Nyena köti a Baba lo gwon ki lu mo konakiŋdye ta liŋ geleŋ geleŋ sona, ko ta a ko pitökiŋdyö luŋösurök ko töilyet kasu liŋ.