Matayo 16 - Bibilia Buk na Ŋun nagon koti luŋu a

ŋutu pija kweyet

¹ A Parusijin se ko Sadokejin lopoŋdi, a se pije Yesu anyen kwekiŋdya se kweyet na po ki, möŋu lepeŋ.

² A nye waddi adi, I sömukö ta kulya adi, Kak mo gwon a nake kogwon ki a nator.

³ A i ko ’bure a ta kulyani adi, I lo lor kudu ’do ’don, kogwon ki a nator ko ’di ’dikto. Ta deden gwulu ’yu ki, ama ta ti bulö gwulu ’yu kweyesi ti kune diŋitan.

⁴ Toberon na ŋutu lorok logon a paju Ŋun kulo gaga ’yu kweyet, ama kweyet mo ti kweki lepeŋat, ka ’de kweyet na nebi Yona. Nyena a nye kö ’yi lepeŋat a iti tu.

Kape ti Parusijin se ko ti Sadokejin

⁵ A nagon ŋutu kanyit kajujumuk aje lwöpöddu i nu pele na tör, a se iŋge böŋo i joŋga na ambatajin.

⁶ A Yesu kulyani ko se adi, Kunyar ta, meddi ta ’bura kogwon kape ti Parusijin se ko ti Sadokejin.

⁷ A se tokulyaki ko ’börik adi, Lepeŋ a jambu kine kulya kogwon yi a ko joŋdya ambatajin.

⁸ Ama a Yesu iŋge den ŋo na jam se kune, a pije lepeŋat adi, Ta ŋutu logon ko yupet a na ’dit, ko nyo ta tokulyakin ko ’börik adi, Yi ’bak ambatajin?

⁹ Ta a ko nyuŋ gwulu kine kulya le? Ta ŋona a böŋö ambatajin mukanat nagon kokoraki i ŋutu alipan mukanat kune le? Ta a ’du ’dumun kupöjin muda?

¹⁰ Ta ŋona a böŋö ambatajin buryo nagon kökoraki i ŋutu alipan iŋwan kune le? Ta a ’du ’dumun kupöjin muda?

¹¹ Ada lolöŋ nagon ta ti kurun adi nan ti jambu ko ta i kulya ti ambatajin? Kunyar ta kape ti Parusijin se ko ti Sadokejin.

¹² Nyena a se iŋge kurun adi lepeŋ ti kunyaŋu se i kulya ti kape ti ambata, ama lepeŋ kunyaŋu se i kulya ti todinesi ti Parusijin se ko ti Sadokejin.

Petero a tuggö adi Yesu a Masia

¹³ A Yesu ko ’dure i kak na Kaisaria Pilipo, a nye pije ŋutu kanyit kajujumuk kulo adi, Ŋutu jambu adi, Nan Ŋuro lo ŋuto a ŋa?

¹⁴ A se waddi adi, Kulye ŋutu kulya adi do a Yoane Kabatisanit, kulye adi, do a Eliya, kulye adi, do a Yeremia, kode a lele lo nebijin.

¹⁵ A nye köti pije lepeŋat adi, Ama ta ko ’börik kulya adi nan a ŋa?

¹⁶ A Simona Petero waddi adi, Do a Masia, Ŋuro lo Ŋun lo gwon jörun.

¹⁷ a Yesu nyobbi adi, Simona ŋuro lo Yona, do ’diri a kalyöŋönit! Kogwon ŋuto lo na kak a ko kwekin do kine kulya, ama tuŋ Baba lo gwon ki lu nye lo kwekiŋdya do.

¹⁸ Nyena nan takiŋdya do adi, Do a Petero lurutat, a nan mo gweyuŋdye kanisa nio i ŋilo lurutat, a riŋitön ti twan mo tine te ’ya ŋina momoret na kayupok.

¹⁹ a nan mo tiŋdi do ŋaesi ti Tumatyan na Ki, ko do mo toŋa nyo i kak ni, ki yu a mo torani tora, ko do laggu nyo i kak ni, ki yu a mo lakani laka.

²⁰ a kirut nye kukuji ŋutu kanyit kajujumuk parik adi, An ta tukökin lele ŋuto adi nan a Masia.

Yesu a jambu kulya ti tatua nanyit

²¹ Suluja i ŋinu diŋit, a Yesu suluje kwekiŋdya ŋutu kanyit kajujumuk adi nye ködyö agu tutu Yerusalema i ŋoŋga na ŋo jore ko ŋutu temejik i könisi, ko i kiŋanejin temejik, ko i katodinok ti Saresi ti Mose, a se mo tatuje lepeŋ, a i lor tomusala lonyit a nye mo toŋiyuni toŋiyu i twan.

²² a Petero joŋgi lepeŋ a swöt, a suluje ririŋga lepeŋ adi, Ti kine kulya gwe pajo ko do pon MATAT! Se ti bulö pokin konut kwöŋ.

²³ Ama a Yesu wöriŋöni wöriŋö, a kulyani ko Petero adi, Iŋgo Satani, kölöki nan! Do gwon köyö a kopuket, kogwon do ti yeyeju gwoso na yeyeji Ŋun na, ama do yeyeju gwoso na yeyeji ŋutu na.

²⁴ A kirut Yesu kulyani ko ŋutu kanyit kajujumuk kulo adi, Ko ŋuto logon ’de ’dekan gwon a kakeponit liŋ a ti nye paji mugun, ko ti nye ’dumuŋdye ködini nanyit na görö a kepoddi nan.

²⁵ Kogwon ko ŋuto logon ’dek Iwoggu ru nanyit, a ŋilo ŋuto mo tolikiŋdye ru nanyit, ama ŋuto logon tolikiŋdyö ru nanyit kogwon kulya kwe lo mo ryoryo lepeŋ.

²⁶ Kogwon ’bulit a nyo i ŋuto logon a ryeju ŋo liŋ ti kak a kanyit, a tolikiŋdye ru nanyit gwak? Kode ŋuto ködyö tiŋdu nyo anyen dakuŋdya ru nanyit?

²⁷ Kogwon nan Ŋuro lo ŋuto mo popo ko malaikajin kwe i pirit na geleŋ i minyo lo Baba, a kirut a nan mo ropakiŋdye ŋutu liŋ gwoso i konesi kase.

²⁸ ’Diri nan takiŋdya ta adi, Kulye ŋutu kata i kulo ŋutu logon gwogwo ’dan ni kulo, logon mo ti waŋ twan a kokwe na meddi se nan Ŋuro lo ŋuto i po i tumatyan nio nu.