Matayo 13 - Bibilia Buk na Ŋun nagon koti luŋu a

Lilim lo kaweyanit

¹ A i ŋilu lor a Yesu lupuŋdye kaŋo kadi, a si ’dakine nyona ko tor na Galilaya.

² A ŋutu jore parik momoruŋdye kanyit ni, ko ŋina kwe a nye kije i ki ’bo kata a si ’dakine nyin, a ŋutu liŋ gwo ’de i kijit.

³ A nye jamakiŋdye se ŋo jore i lilimon adi, Kaweyanit a tu i weja na nyomot.

⁴ A gwe sona na gwoŋdi nye i weja nu, a kulye nyomot ’do ’done nyona ko kiko, a kwen poŋdi po a kwökwöddi se.

⁵ A kulye nyomot ’do ’done i kujoŋ nagon a röpökiŋdyö i lelya loki, a ’de ’de se pune pun kogwon kujoŋ ti gwon jore;

⁶ a nagon kolor gwe ki nu, a se salani sala, a teteyone teteyon kogwon kokori kase a ko ’bekoddu kak.

⁷ a kulye nyomot ’do ’done i kiden na kikwa, a kikwa iŋge ’duroddu ki, a iŋge ’di se.

⁸ A kulye nyomot ’do ’done i kak na ’but, a tore toran kunie kusik ti ’bolot kokonyen mia geleŋ, kunie ko merya buker, kunie ko merya musala.

⁹ ŋuto logon ko swo yiŋesi ti nye yiŋge kine kulya.

Kwe nagon Yesu jambu ko lilimon

¹⁰ A ŋutu ti Yesu kajujumuk iti ko lepeŋ yu, a pije lepeŋ adi, Nyo do jambu ko lepeŋat i lilimon?

¹¹ A Yesu waddi lepepat adi, Ta aje tiki i deŋdya na Iwono ti Tumatyan na Ki, ama a ko tiki lepeŋat.

¹² Kogwon ŋuto lo gwon ko ŋo lo mo ’ya ’yalaki kunie, a nye mo gwe ko ŋo jore parik; ama ŋuto logon ’bak nene ŋo lo, ma ’di ŋo na gwon ko lepeŋ na mo ’du ’dumaji kaŋo kanyit.

¹³ Ŋina a kwe nagon nan jambu ko lepeŋat i lilimon, kogwon na meddi se na, a se tine gwulu; na yiŋge se na, a se tine yiŋga ’bura a tine kuruŋdyö.

¹⁴ Kulya na ke Yisaya koju kunu kokonaki i se adi, Ta mo yiyiŋ daŋin jore ama a ta mo tine kurun asut; ta mo memet daŋin jore ama a ta mo tine gwulu;

¹⁵ kogwon toilyet ti kilo ŋutu pomoni, a swo kase yiŋge adi boriŋ, a lepeŋat iŋge muk konyen kase. Ko kodyö ti gwon sona lepeŋat kodyö memet ko konyen kase, a yiŋe yiŋ ko swo kase, a kuru kurun ko toilyet kase, a lopukuŋdye köyö ni, a nan kodyö toke ’yi se.

¹⁶ Ama ta a kalyoŋok kogwon ta a met ko konyen kasu, köti ta a yio ko swo kasu.

¹⁷ ’Diri nan takiŋdya ta adi, Nebijin jore se ko ŋutu lo rigwo jore gwon ko pusök i meddya na ŋo nagon ta a met kune, ama a tine met se, a se gwe ko pusok i yiŋga na ŋo nagon ta a yiŋ kune, ama a se tine yiŋ se.

Yesu tökoŋu tokoret na lilim lo kaweyanit

¹⁸ Nyena yiŋge ta lilim lo kaweyanit.

¹⁹ Ko ŋuto a yiŋga kulyaet lo Tumatyan, ama a gwe a ko kurun, a ŋilo loron poŋdi po a jekaddi ŋo logon aje weki kanyit i töili kulo. Nyomot lo weki i merete lo kiko kulo gwon sona.

²⁰ Nyomot logon a weki a ’do ’done i kujöŋ nagon a röpökiŋdyö i lelya loki kulo a ŋuto logon ko aje yiŋga ŋilo kulyaet a ’de ’de wuji nye ko lyöŋön.

²¹ A nye gwe gwoso nyomotti logon kokori a ko ’bekoddu kak, ama a mönuŋdye diŋit a na ’dit, ama i diŋit nagon lepeŋ a yöyöŋö ko a sasanya kogwon kulya ti lo kulyaet nu, ’de ’de a nye kukutorö bot.

²² Nyomot logon a weki a ’do ’done i kiden na kikwa kulo ŋilo a ŋuto logon a yiŋga lo kulyaet, a wiwinyesi ti na kak, ko nyaŋu na tukworien ’deŋ lo kulyaet, a nye gwe a pudi.

²³ Ama nyomot lo weki i kujön na ’but kulo a ŋuto logon a yiŋga ŋilo kulyaet a kuru kurun. Lepeŋ ’diri totoran ludweki, kunie kusik ti ’bolot ko konyen mia geleŋ, kunie ko merya buker, kunie ko merya musala.

Lilim lo liabe

²⁴ A Yesu tukokiŋdye se lele lilim adi, Tumatyan na Ki gwon gwoso ŋuto logon wekiŋdya nyomot lo ’but kanyit i melesen;

²⁵ a nagon ŋutu liŋ aje doto nu, a miriku lo poŋdi a wekiŋdye liabe i ’bolot kata a iti tu.

²⁶ Nyena a ’bolot gwugwuŋge gwugwuggo, a gwe a losim, a liabe koti ’duruŋdye ki.

²⁷ a köliponok ti ŋilo ŋuto poŋdi ko lepeŋ ni, a pije adi, Duma likaŋ, do a ko wekiŋdya nyomot lo ’but konut i melesen le? Liabe kulo po ya?

²⁸ A nye waddi adi, Miriku lele aje koŋdya na ŋo. A kölipönök kulo pije lepeŋ adi, Do ’de ’dekan yi tu i ’boja na se?

²⁹ Ama a nye renyani adi, ’Bayin, kogwon na ’boji ta liabe nu, an ta böŋo ’dutuŋdyö kulye ’bolot ko se i pirit na geleŋ.

³⁰ Ti se liŋ ’duröddi i pirit na geleŋ tojo ko ŋera nase. A i diŋit ŋeret a nan mo takiŋdye kaŋerak adi, A kokwe pepene ta liabe, ko totorone ta se a kusikön anyen ’yu ’yura, ama momore ta ’bolot köyö i gugu.

Lilim lo nyomotti lo kiteta

³¹ A Yesu koti jamakiŋdye se lele lilim adi, Tumatyan na Ki gwon gwoso nyomotti lo kiteta logon lele ŋuto a ’dumun, a gubakiŋdye kanyit i melesen;

³² ŋilo nyomotti a lo ’dit parik lwölwöŋ nyomot liŋ, ama ko aje ’duŋö a gwe a duma lwölwöŋ ’dötilön liŋ ti melesen a worani a ködini, nyena a kwen poŋdi i saka i kenia kanyit.

Lilim lo kape

³³ A Yesu koti jamakiŋdye se lele lilim adi, Tumatyan na Ki gwon gwoso kape logon nene ŋuto a ’dumun, a polakiŋdye i pelela musala ti lojiet lo wi ’di tojo liŋ a yu.

Yesu jambu i lilimön

³⁴ Yesu jamakiŋdya lodir lo ŋutu kine kulya liŋ i lilimön; nye a ko jamakiŋdya lepeŋat nene ŋo ’bak lilim.

³⁵ Anyen kulya na jam nebi köju kunu kodyö kokona, adi, Nan de jambu i lilimön, a nan de tuŋge kulya nagon a ’dela suluja i gweya na kak.

Yesu a tökoŋu tokoret na lilim lo liabe

³⁶ A kirut Yesu kö ’yi lodir lo ŋutu, a nye lupöni kadi; a ŋutu kanyit kajuju muk iti ko lepeŋ yu, a kulyani ko lepeŋ adi, Tokuruki yi lilim lo liabe lo gwon i melesen.

³⁷ A nye waddi adi, Kaweya-nit lo nyomot lo ’but a nan ŋuro lo ŋuto.

³⁸ Melesen gwon a kak na. Nyomot lo ’but gwon a ŋwajik ti Tumatyan; liabe a ŋwajik ti ŋilo loron;

³⁹ a miriku lo weja liabe lo gwe a ka-ŋöönit; diŋit ŋeret gwon a ’dutet na kak; a kaŋerak gwe a malaikajin.

⁴⁰ Nyenagon gwoso nagon liabe a pepena a ’yurani ’yura ko kimaŋ na, nyena köti a mo gwe sona i ’dutet na na kak.

⁴¹ A nan Ŋuro lo ŋuto mo soŋdi malaikajin kwe, a se mo pepenuŋdye kaŋo i Tumatyan nio ŋo liŋ nagon tiŋdu ŋutu i köpukö, se ko ŋutu liŋ lo koŋdya arabat kilo,

⁴² a mo gubakiŋdye se i namet na kimaŋ; a se mo gwine gwien a mo pije kala nyu.

⁴³ a ŋutu ti loti lo rigwo mo kobbi kobbu gwoso kolor i tumatyan na Monye lose. ŋuto lo gwon ko swö yiŋesi ti nye yiŋge kine kulya.

Lilim lo tukwörien na ’dela

⁴⁴ Tumatyan na Ki gwon gwoso tukwörien nagon a ’delaki i melesen. A ŋuto iŋge ryö a köti yiköki nye kak; nyena a nye gwe ko lyöŋon, a iti tu, a tugwoŋi ŋo kanyit liŋ, a nye gwöruŋdye ŋina melesen.

Lilim lo margarita na gwöro go

⁴⁵ Koti Tumatyan na Ki gwon gwoso ŋuto katujaranit logon gaga ’yu ŋurupo nakwekwelen na luŋu a margaritajin.

⁴⁶ A nye ko ryeji nene geleŋ nagon joŋga gurut jore parik, a nye iti tu, a tugwöŋi ŋo kanyit liŋ, a gwöruŋdye ŋina margarita.

Lilim lo ku ’yi

⁴⁷ Köti Tumatyan na Ki gwon gwoso ku ’yi nagon a gubaki i tor kata a munuki i kiden na ki ’bojin murek, a iŋge momok gweyarijin liŋ ti somot.

⁴⁸ a ku ’yi ko jorene, a kalokak pikuŋdye nye i kijit, a se si ’dakine kak a nyumbe lo ’but i kupöjin, ama a lorok gubani kaŋo.

⁴⁹ A mo gwe sona i ’dutet na kak. A malaikajin mo poŋdi i nyumbo na ŋutu lorok i kiden na ŋutu lo ’but,

⁵⁰ a mo gubakiŋdye sei namet na kimaŋ; a se mo gwine gwien a mo pije kala nyu.

Ŋo ludukö ko go ti ’beron

⁵¹ Ta aje kurun kine ŋo liŋ le? A se waddi lepeŋ adi, lye, yi aje kurun.

⁵² A nye kulyani ko lepeŋat adi, Nyenagon katodinok liŋ ti Saresi ti Mose logon a todiniki kulya ti Tumatyan na Ki gwon gwoso monye ’baŋ logon ’dumuŋdya ŋo ludukö ko ti ’beron kanyit i pirit ’delet.

Ŋutu ti Najareta ti ’bön Yesu

⁵³ A Yesu ko tutuŋge jambu kilo lilimon a nye kö ’yi ŋinu pirit.

⁵⁴ a nye iti kanyit köji, a todiŋdye kase i kadi momoret, a ŋutu iŋge soŋu, a totopine adi, Lo ŋuto ryo ŋina koŋon ya se ko kine kitajin sorosi?

⁵⁵ ŋilo ’bayin a ŋuro lo kaworonit lo bau le? Ŋote nanyit ’bayin luŋu a Maria le? Yakobo ko Yosepa ko Simona ko Yuda ŋona ’bayin a luŋasirik kanyit?

⁵⁶ Kiasirik kanyit liŋ ŋona ’bayin kayaŋ kiden le? Lepeŋ ryö kine ŋo liŋ ya?

⁵⁷ A se iŋge ryo kulya ti lepeŋ a kopuket. Ama a Yesu kulyani ko lepeŋat adi, Nebi ti bula kanyit köji, ko kanyit midi, ama ŋutu bubu lepeŋ i kunie piriton.

⁵⁸ A lepeŋ gwe a ko koŋdya kitajin sorosi jore nyu kogwon se a ko yuŋ lepeŋ.