Malaki 1 - Bibilia Buk na Ŋun nagon koti luŋu a

MATAT nyanyar Yakobo

¹ Ŋina a ’dolet na kulyaet lo MATAT i Yisaraele ko Malaki i kutuk.

² Nan MATAT lo kulya adi, Nan a nyar ta, ama a ta pipije adi, Do nyar yi ada? A nan MATAT waddi pija adi, Esau ti gwon a luŋaser Yakobo le? Ama nan aje nyar Yakobo

³ a nan maŋdi Esau; nan aje tiŋdu Jur lonyit lo merya i gwon a murwö, a nan kölökiŋdye Jur lonyit lomore i kijakwa ti yobu,

⁴ A ko ŋutu ti Edom kulya adi, Yi a toreki, ama a yi mo nyoggi ’duggo rubajin kaŋ, a nan MATAT lo kurumi kulyani adi, Ma ’di se a to ’duk, ama a nan mo duŋge kadijik kase kak, a ŋutu mo luŋgi se a Jur lo toron, adi a ŋutu logon MATAT a wöŋi asut.

⁵ a ta mo meddi kine kulya ko konyen kasu, a ta mo kulyani adi, MATAT logon a duma i lu swot lo koret na Yisaraele!

MATAT ririŋga koanejin

⁶ ŋuro bubu ’ya monye, a kölipönit bu ’ye matat lonyit. A ko nan a monye, a bulet nio niya? A ko nan a matat, a kujönörikin nio niya? Nan MATAT lo kurumi lo pija ta koanejin lo lauŋdya karin kwe kilo. A ta pipije adi, Yi lauŋdya karin kunök ada?

⁷ Ta a lauŋdya karin kwe kogwon ta a wukiŋdya kinyo logon a lut koyo i pirit ’yuret na rubaŋgajin. A ta waddi pija adi, Yi tolut do ada? Adi, Kogwon ta yeyeju adi, Misa na MATAT ’bayin a nene ŋo.

⁸ Ko ta wukiŋdya toro ’bo mo ’dokeno a rubaŋgajin, ŋina ’bayin a toron le? A ko ta wukiŋdya kine Ŋo nagon a bata kode a ŋilo, a ŋina ’bayin a toron le? Ko ta tiŋdu modir losu ’doket gwoso ŋina nye ŋona lyolyoŋon ko ta kode ’du ’dulukin ta ki le? ŋilo a nan MATAT lo kurumi lo pija.

⁹ Nyenagon boŋo mo ’yi ta ’busan koyo nan ŋun, anyen nan boŋo won konyen ko ta. Ko ta a Joŋdya ’dokesi gwoso kine ŋo, nan mo ’du ’dulukin ta ki le? Nan MATAT lo kurumi lo pija.

¹⁰ A na ’but kodyo ko lele losu a kiŋdu kotumiton an ta ko mokakiŋdya kimaŋ i pirit nio ’yuret na rubaŋgajin ko kana! Nan MATAT lo kurumi lo kulya adi, Nan ’bak lyoŋon ko ta, koti a nan mo tine wuju nene ’doket kasu i konisi.

¹¹ Kogwon karin kwe kukwon i kiden na gweyajin lio ti ŋutu suluja i swot lo ’yure tojo i swot lo tokotyaŋ, a bökur wukine nan i piriton lio se ko ’dokesi nake; kogwon karin kwe kukwon i kiden na gweyajin ti ŋutu, nan MATAT lo kurumi lo kulya sona.

¹² Ama ta gwon i lauŋdya na karin kwe na kulyari ta adi, Misa nio na MATAT a toluta, kinyo logon wuki koyo i misa lo ’bayin a nene ŋo.

¹³ A ta koti lauŋdye adi, ŋina gwon a dara! A ta ’doggi kume-siko ki ko nan, nan MATAT lo kurumi lo kulya. Ta Joŋdya ŋo na ryaryakwe, ko na bata, se ko na ŋilo, adi a ’dokesi! Ti nan kodyo rukuŋdye se kasu i konisi le? Nan MATAT lo pija ta.

¹⁴ Ti kamumulukanit logon a milyekiŋdyo ’dogga ko lopijot i toro ’bo kanyit lo, ama kolumbo a nye ’duŋokiŋdye MATAT ŋo lo bata, ti ŋilo ŋuto lomoni lomo; kogwon nan MATAT lo kurumi lo kulya adi, Nan logon a mor duma, a karin kwe kujonorikin kujonorikin i kiden na gweyajin liŋ ti ŋutu.