Luka 21 - Bibilia Buk na Ŋun nagon koti luŋu a

’Dogga na karu ’be

¹ A Yesu ko boŋgi a meddi ŋutu kwörinikö i gumba na ’dokesi kase i saŋduk na gwon i Kadi na Ŋun nagon ’dokesi guba kata;

² a nye meddi nene ŋuto nagon a lomeri ko a karu ’be i gubakiŋdya na milin murek.

³ A nye kulyani adi, ’Diri nan takiŋdya ta adi, na ŋuto nagon a lomeri ko a karu ’be na aje ’dogga bia parik lwölwöŋ ŋutu liŋ;

⁴ kogwon lepeŋat liŋ ’dumundya ’dokesi i tukwörienjin kase; ama na ŋuto ’dumuŋdya i tolomerian nanyit, a iŋge ’dogga ko gurut kanyit liŋ nyeesi.

Yesu a jambu i kulya ti turö na Kadi na Ŋun kak asut

⁵ A na jambi kulye kajujumuk kulya ti Kadi na Ŋun nu, adi nye a tokwelenyo ko ŋurupo dumalak parik ko ’dokesi na rurwan na tiki Ŋun, a Yesu kulyani adi,

⁶ Kine ŋo nagon ta memet kine, perok molu popo nagon ŋurupit nene geleŋ molu ti koloki ni i nene loki nagon mo ti gubaki kak.

Yöyöŋesi se ko sasanyesi

⁷ A se pije lepeŋ adi, Katodinönit, kine ŋo mo gwon nanu? Kweyet mo a nyo ko kine ŋo mo gwe nyona ko pokin?

⁸ A Yesu waddi adi, Kunyar ta, an ta ko totogira ta. Kogwon ŋutu jore mo popo i karin kwe a kulyani adi se a nan, ko adi, Diŋit gwe nyona ko po. Ama an ta ko keporo ta lepeŋat.

⁹ A na yiŋge ta kulya ti mörö ko woŋesi nu, ko kujönö ta, kogwon kine ŋo agu ködyö kokona, ama ’dutet nyuŋ ti po ’de ’de.

¹⁰ A kirut nye kulyani ko lepeŋat adi, Jur mo mömörö ko lele jur, a tumatyan mo möroni ko nene tumatyan;

¹¹ a rigirigilön dumalak mo gwe kata, a twana iŋgo se ko dyaŋan mo gwe i piriton ka ’de ka ’de; a ŋo kujonöesi ko kweyesi dumalak mo gwe kata i ’diko.

¹² Ama a kokwe nagon kune ŋo a ko kona nu, ŋutu mo momok ta, a sasaŋdi ta a joŋgi ta i kadijik lomoresi, ko i kadijik rerekesi, a ta mo joŋani ko moran i komor se ko i mödiron kogwon kulya ti karin kwe.

¹³ a ŋina mo gwe a komor nasu na ’but i tokurukiŋdyö na Loŋe Lo ’but.

¹⁴ Nyenagon tetenaki ta kasu i töilyet adi ta mo ti yeyeju a kokwe kiyaŋ ko ta ködyö waddu ŋutu ada,

¹⁵ kogwon nan mo titin ta kulyaesi se ko koŋon nagon lele lo merok kasu mo ti bulö teŋgu kode renya.

¹⁶ Nyena ma ’di komunyi ko koŋuti, ko luŋösurök, ko karu kasu, ko julin mojoŋ ta i putet, a se mo tatuje kulye kasu;

¹⁷ a ŋutu liŋ mo mane man ta kogwon karin kwe.

¹⁸ Ama ma ’di kupiret geleŋ kasu i kusik mo ti likin.

¹⁹ Ko ta a gwo ’dan go i ŋoŋaddu diŋit a najo a ta mo telundye ru nasu na to ’diri.

Yesu a jambu i kulya ti körö na Yerusalema

²⁰ Ama ko ta mo a met Yerusalema i tuma ko merok, nyena dene ta den adi korö nanyit gwe nyona.

²¹ A kirut ti ŋutu lo gwon Yudaya. kulo wöki i merya; ti se lo gwon i köji kata kulo iti kaŋo, ko ti se lo gwon i jur kulo gwe ti lupö lukata,

²² kogwon na a diŋit ropet na toron; anyen ŋo liŋ na wurö kune tetemakiŋdya.

²³ Ama gwon a delya i ŋutu na gwon ko pelela, ko i se na tutunöggu i kilu perok! Kogwon delya duma mo gwon i kak se ko woran duma mo pokin i lo jur.

²⁴ a se mo tatuani tatua ko baŋdujin, a se mo momokajine i jurön liŋ a ’dupi, a Lwaka mo ryoggi Yerusalema, tojo ko diŋitan kase na wulwe a temakiŋdya.

Po na Ŋuro lo ŋuto

²⁵ A kweyesi mo gwe i kolor, ko i yapa, ko i kaser, a i kak ni a jurön liŋ mo durwene durwe, a dyadyaŋgi dyadyaŋgu i kulya ti woŋon na tor se ko na yalajin;

²⁶ töilyet ti ŋutu mo rurusukö ko kujönö na möŋdi se ŋo nagon mo pokin i kak kune, kogwon riŋitön ti ki mo yeyeta.

²⁷ a kirut ŋutu mo meddi nan Ŋuro lo ŋuto popo i ’diko ko riŋit se ko minyo a duma parik.

²⁸ A na suluje kine ŋo i po nu, riuŋdye ta ’börik ki gwogwo, ko ’bili ta kusik kasu ki, kogwon ta gwe nyona ko lwökö.

Todinet i kulya ti ki ’bi

²⁹ A Yesu jamakiŋdye lepeŋat lele lilim adi, Meddi ta ki ’bi se ko kaden liŋ;

³⁰ a na suluje se wilan nu, ta ko ’borik memet ko deden adi kiser soŋinana gwe nyona.

³¹ Nyena köti na meddi ta kine ŋo i kona nu, a ta deŋdi adi Ŋun gwe nyona ko po i tumatyan.

³² ’Diri nan takiŋdya ta adi, ŋutu ti na toberon mo ti ’duddyö tojo ko kune ŋo liŋ mo a kona.

³³ Ki ko kak mo ’du ’duddyö ama kulyaesi kwe mo ti ’duddyö kwöŋ.

Gwe ta ko konyen ŋa

³⁴ Ama kunyar ta ’börik an töilyet kasu gwon pömöni ko rorweki, ko meran se ko wiwinyesi ti kak, an ŋilu lor jakakin ta adi wulek gwoso ridiket;

³⁵ kogwon ŋilu lor mo pokin i ŋutu liŋ lo si ’da i kak ’bukuluŋ kulo.

³⁶ Ti konyen kasu gwe ŋa ko momo ’yi ta i diŋitan liŋ, anyen ta böŋö wuju riŋit anyen rwöddi kine ŋo liŋ nagon mo popokin kine, ko anyen gwo ’dan köyo i komor nan ŋuro lo ŋuto.

³⁷ Temba i tuparan Yesu totodiŋdyö i Kadi na Ŋun, a i tukwaje a nye iti kaŋo a si ’dani i mere lo luŋu a Jeitun.

³⁸ A i ko ’bure kobubut a ŋutu liŋ iti ko lepeŋ yu i Kadi na Ŋun anyen yiŋga kulyaesi kanyit.