Luka 20 - Bibilia Buk na Ŋun nagon koti luŋu a

Yesu a piya adi nye koŋdya kine ŋo ko kido niŋa

¹ A ko gwe sona i lele lor, na todiŋdye Yesu ŋutu i Kadi na Ŋun ko i tokujo na Loŋe Lo ’but nu, a koanejin temejik ko katodinök ti Saresi ti Mose se ko ŋutu temejik iŋge po,

² a je pije lepeŋ adi, Taki yi, do ryö kido ya nagon do koŋdi kine ŋo? Pija lo tiŋdu do ŋina kido?

³ A nye waddi lepeŋat adi, Nan köti gwon ko piyet nagon nan pije ta; nyoŋe ta nan.

⁴ Ŋina batisimo nagon Yoane babatiddye na po ki kode po ko ŋutu?

⁵ Ama a lepeŋat tokulyaki ko ’börik adi, Koyi de ruggö adi, Ŋina batisimo po ki, a nye de pije yi adi, Nyo nagon ta ti yuŋ Yoane?

⁶ Ama koyi de ruggo adi, ŋiria batisimo po ko nutu, a ŋutu liŋ de poki i gugubuja na yi ko ŋurupo; kogwon se ’diri a yeyeju adi, Yoane logon a nebi.

⁷ A kirut lepeŋat renyani adi, Yi ti den ko ŋina batisimo po ya.

⁸ A Yesu kulyani ko se adi, A ma ’di nan lo köti tine tukokin ta ko nan koŋdya kine ŋo ko kido niŋa.

Lilim lo kakuruk ti lukobi na binyo

⁹ A Yesu suluje jamakiŋdya ŋutu lo lilim adi, Lele ŋuto a ’yuddu kaden ti binyo i lukobi, a nye sarakiŋdye ko kulye kakuruk i könisi, a nye iti i lele jur, a karara ko diŋit a najo.

¹⁰ A nagon gwe a diŋit na ’butun nu, a nye soŋdi ’dupiet ko kakuruk yu anyen se kodyö tiŋdu lepeŋ kulye ludweki ti binyo. Ama a kakuruk ’biddye lepeŋ, a riköddi lepeŋ kaŋo ’bak nene ŋo i könin.

¹¹ A nye köti möŋi soŋdu köliŋönit tomurek, ama a se köti ’biddye lepeŋ, a sasaŋdi lepeŋ parik, a rikoddi lepeŋ kaŋo ’bak nene ŋo i könin.

¹² a nye koti soŋdi köliŋönit tomusala, ama a se böŋoddi lepeŋ a gubaddi lepeŋ kaŋo.

¹³ a kirut monye lukobi na binyo pije mugun adi, Nan koŋdya nyo? Nan de soson pilili liŋ lo ŋuro lo nyanyara, kode ŋona lepeŋat de twotwö lepeŋ.

¹⁴ Ama a na meddi kakuruk ŋilo ŋuro nu, a se tokulyaki ko ’börik adi, Malo ŋuto logon mo ruddya lukobi na monye. Ti yi tatune ta tatu lepeŋ, anyen ŋina luköbi böŋö gwon a nikaŋ.

¹⁵ A se gubaddi lepeŋ kaŋo a tatuje lepeŋ. Nyena a monye lukobi na binyo mo konakiŋdye lepeŋat nyo?

¹⁶ Lepeŋ mo popo i tukaŋu na kulu kakuruk, a mo sarakiŋdye ŋinu lukobi ko kulye ŋutu i könisi. A na yiŋge ŋutu kine kulya nu a se kulyani adi, Ti gwe ti gwon sona!

¹⁷ Ama a nye diŋe lepeŋat, a pije adi, Nyena na ŋo a nyo nagon a wuro adi, Ŋurupit logon ka ’dukok a renya lo aje wora a ŋurupit tutuŋet lo goŋet lo kadi?

¹⁸ Ŋutu liŋ logon a ’doro i ŋilo ŋurupit kilo mo giginya ka ’de ka ’de, ama ŋuto logon ŋilo ŋurupit a muju lepeŋ lo mo pasakani pasaka.

¹⁹ a katodinök ti Saresi ti Mose se ko koanejin temejik ga ’yi morga lepeŋ i ŋinu diŋit gwak, ama a se kujono ni ŋutu kulo, kogwon se a kurun adi nye jambu ŋilo lilim i kulya kase.

Katodinök ti Saresi a pija Yesu i kulya ti ropa na usur

²⁰ A katodinok ti Saresi dombi Yesu a soŋdi kawirak logon mirakiŋdya adi se a ŋutu ti to ’diri, anyen se ködyö morga kulyaesi lo jam nye kulo, anyen joŋ ko modir lo gwon ko kido i ’duŋokiŋdyo na putet.

²¹ A se kulyani ko Yesu adi, Katodinonit, yi deden adi do jambu ’bura koti do todiŋdyo rigwo, a do tine nyunyumbö ŋutu, ama do todiŋdyö kiko lo Ŋun ko to ’diri.

²² Saret ŋona a ruk adi Kaisar bubulo ropaki usur, kode ti bulo ropaki?

²³ Ama a nye iŋge gwulu mumulugga nase, a kulyani ko lepeŋat adi,

²⁴ Kweki ta nan gurusutot. Ŋina ŋo jinoti se ko kilo wuresi a ti ŋa? A se waddi adi a ti Kaisar.

²⁵ a nye kulyani ko se adi, Ropaki ta Kaisar ŋo nagon a ti Kaisar, köti ropaki ta Ŋun ŋo nagon a ti Ŋun.

²⁶ A se tine bulo morga lepeŋ ko ŋutu i komor ko kulyaesi lo jam nye kulo; ama kölumbö a se soŋi soŋu ko waset lonyit, a se yiŋani taliŋ.

Yesu a piya i kulya ti ŋien i twan

²⁷ A kulye Sadokejin poŋdi ko Yesu ni. (Kilo ŋutu jambu adi ŋutu ti ŋien i twan.)

²⁸ A se pije lepeŋ adi, Katodinonit, Mose aje wurökiŋdyo yi ŋilo saret adi, Ko luŋaser lo lele ŋuto a twan, lo gwon ko nakwan ama a nye gwe ’bak ŋwajik, a luŋaser lo ŋuto lo twan lo kodyö ruddya ŋina karu ’be anyen yuŋwekiŋdyöluŋaser lonyit ŋwajik.

²⁹ Nyena luŋasirik kata buryo, a kayu lo iŋge yemba nakwan, a ŋilo ŋuto twane twan ’bak ŋwajik;

³⁰ a loponi ruddye ŋina karu ’be,

³¹ a tomusala köti ruddye nye, tojo se liŋ buryo köti a twatwa ’bak ŋwajik.

³² a i mukök, ŋina ŋuto köti iŋge twan.

³³ Nyenagon i toŋiyu na ŋutu lo twatwa a ŋina nakwan mo gwe a niŋa? Kogwon se liŋ buryo aje ’debba lepeŋ a nakwan.

³⁴ A Yesu waddi lepeŋat adi, Ŋutu ti na diŋit yeyemba ko yeyema,

³⁵ ama se logon jujukin toŋiyu i twan anyen gwon jörun i diŋit na popo kulo, tine yemba a köti tine yema.

³⁶ Lepeŋat koti ti twatwa kwöŋ kogwon se gwon gwoso malaikajin; se a ŋwajik ti Ŋun kogwon se köti aje toŋiyu i twan.

³⁷ Mose a kwekiŋdya ’bura adi ŋutu logon a twatwa kilo mo totoŋiyu anyen gwon jörun, kogwon i kenet nagon jambu kulya ti rudu lo tutule nu, nye luŋgu MATAT a Ŋun lo Abarayama, ko a Ŋun lo Yisaka, ko a Ŋun lo Yakobo.

³⁸ Nyenagon lepeŋ ti gwon a Ŋun lo ŋutu lo twatwa, ama a Ŋun lo ŋutu lo gwon jörun; kogwon kanyit i metet ŋutu liŋ gwon jorun.

³⁹ A kulye katodinok ti Saresi ti Mose waddi adi, Katodinönit. do aje kulya ’bura;

⁴⁰ kogwon lepeŋat kukujonö pija lepeŋ ko nene piyet.

Yesu a pija i kulya ti Masia

⁴¹ A Yesu pije se adi, Ada lolor nagon ŋutu kulya adi Masia a ŋuro lo Dawidi?

⁴² Kogwon Dawidi lepeŋ lo kulya i Buk na Saumajin adi, MATAT Ŋun a kulya ko MATAT liŋ adi, Si ’dakine köyö i konin lutaten,

⁴³ tojo ko nan a tin do merok kulök a tökit inot na mokosi.

⁴⁴ Nyenagon Dawidi luŋgu ŋilo ŋuto a MATAT lonyit, a Masia gwe a ŋuro lonyit ada?

Yesu a kunyaŋu ŋutu i kulya tikatodinök ti Saresi ti Mose

⁴⁵ A nagon ŋutu liŋ gwon i yiŋga nu, a Yesu kulyani ko ŋutu kanyit kajujumuk adi,

⁴⁶ Kunyar ta i kulya ti katodinök ti Saresi ti Mose logon nyanyar walaŋ a jupu boŋgwat najo, a nyare nyar romarikin i piritön gwöriesi. Lepeŋat nyanyar si ’da i si ’daesi ti ŋerot i kadijik momoresi, a nyaŋi si ’da i piritön ti ŋutu lokukwön i rorweki.

⁴⁷ Kilo a ŋutu logon nyesu ŋo ti karu ’bejin, kölumbö a se kwakwaddi diŋit a najo mumulugga. Lepeŋat mo ririŋa bia parik.