Lewi 27 - Bibilia Buk na Ŋun nagon koti luŋu a

Saresi i kulya ti ŋuto lo milyekiŋdyö Ŋun nene ŋo

¹ A MATAT jambi ko Mose adi,

² Kulyani ko ŋutu ti Yisaraele adi, Ko lele ŋuto a nyesu milye adi nye ’dek tiŋdu MATAT kulye ŋutu i gwon a kanyit, a ti do kenakiŋdye lepeŋ gurut dakesi ti kilo ŋutu.

³ Nyena a do ködyö keŋdi gurut dakesi ti ŋuto lalet logon ko kiŋajin suluja i merya murek tojo ko kiŋajin merya buker kulo a pödöjin nagon temuŋdya a sekelejin merya mukanat, gwoso i temet na sekele na pirit nake na rurwan.

⁴ A ko a ŋuto nakwan, a do ködyö keŋdi dakesi kanyit a sekelejin merya musala.

⁵ A ko lepeŋ suluja i kiŋajin mukanat tojo ko kiŋajin merya murek, nyena a do ködyö keŋdi dakesi ti ŋuto lalet a sekelejin merya murek, ko ti ŋuto nakwan a sekelejin puök.

⁶ A ko lepeŋ suluja i yapa geleŋ tojo ko kiŋajin mukanat a do ködyö keŋdi dakesi ti lupudi lulalet a pödöjin nagon temuŋdya a sekelejin mukanat, a do ködyö keŋdi dakesi ti lupudi nanakwan a pödöjin nagon a temuŋdya a seleke-jin musala.

⁷ A ko lepeŋ suluja ko kiŋajin merya buker tojo ko ŋerot, nyena a do ködyö keŋdi dakesi ti ŋuto lalet a sekelejin puök wot mukanat, a ti ŋuto nakwan a sekelejin puök.

⁸ A ko lu ŋuto a lomeri ti jo dakesi na kenakin do lepeŋ kune, nyena a nye ködyö jweni ko koane i komor, a koane kenakiŋdye lepeŋ gwoso nagon nye jojo robba na.

⁹ A ko ködyö milye gwon i kulya ti turu ’buti logon ŋuto jujukin wukiŋdya MATAT a rubaŋga, nyena go liŋ gwoso kilo logon ŋutu wuwukin MATAT kilo a gelwe a kanyit.

¹⁰ A ŋuto tine bulö löpuggö turu ’buti kode togwouŋdya turu ’buti lo ’but ko loron, kode loron ko lo ’but; a ko nye ködyö a togwouŋdya turu ’buti ko turu ’buti, nyena a kilo toro ’bo murek liŋ ködyö gelwe a ti MATAT.

¹¹ A ko turu ’buti a lut logon ti jukin wuki MATAT a rubaŋga, nyena a lu ŋuto ködyö joŋdi turu ’buti lo ko koane i komor,

¹² a koane ködyö kenakiŋdye ’bulit nanyit kode a lo ’but kode a loron; nyena a mo gwe sona gwoso nagon do koane a kenakiŋdye lepeŋ.

¹³ Ama ko ŋilu ŋuto ködyö ’de ’dekan dakuŋdya lepeŋ a ti nye ködyö ’yalakiŋdye nyin swöt geleŋ na mukanat i nu kenet na kenakiŋdye do nu.

¹⁴ A ko lele ŋuto a gelakin MATAT kadi nanyit, a koane ködyö kenakiŋdye ’bulit na nu kadi kode a na ’but kode a naron, a mo gwe sona gwoso na kenakiŋdye koane nye nu.

¹⁵ A ko ŋilu ŋuto lo gelakiŋdya MATAT kadi lo ’de ’dekan dakuŋdya kadi nanyit, a ti nye ködyö ’yalakiŋdye nyin swöt geleŋ na mukanat na kine gurut na kenakin do lepeŋ kunu, a kadi ködyö gwe a nanyit.

¹⁶ A ko lele ŋuto a gelakiŋdya MATAT swöt lo melesen nanyit lomore, nyena a do ködyö kenakiŋdye lepeŋ gwoso i weya na melesen; weya na nyomot ti ’bolot saora logon temuŋdya a komer kulo ködyö kena adi jogga pödöjin nagon temuŋdya a sekelejin merya mukanat.

¹⁷ Ama ko lepeŋ a gelakiŋdya melesen nanyit suluja i lu kiŋa lyöŋit, a ti nye gwe gwoso na kenakiŋdye do nu;

¹⁸ ama ko nye a gelakiŋdya melesen I mukök na kiŋa lyöŋit nu, nyena a koane ködyö kenakiŋdye lepeŋ daket gwoso ti kiŋajin logon a pituŋdyö tojo ko kiŋa lyöŋit lo popo lu, a nyökuŋdye gurut dakesi kak i dakesi nagon do a kenakin kune.

¹⁹ A ko ŋuto lo gelakiŋdya MATAT melesen lo ködyö ’de ’dekan dakuŋdya lepeŋ, nyena a ti nye ködyö ’yalakiŋdye nyin swöt geleŋ na mukanat na gurut na kenaki lepeŋ kune, a ŋina melesen mo gwe a nanyit.

²⁰ Ama ko nye ti ’bön dakuŋdya nu melesen, kode ko nye a tugwö-rökiŋdyö lele ŋutu nu melesen, a melesen tine bulö dakwe köti;

²¹ ama i diŋit nagon melesen a kölö i kiŋa lyöŋit nu, a nye ködyö gelakine a na MATAT, gwoso melesen na rurwan, a koane wuji lepeŋ.

²² A ko ŋuto a gelakiŋdya MATAT melesen na gwörun nye na nagon ti gwon a lomore nanyit na,

²³ nyena a koane ködyö kenakiŋdye lepeŋ ’bulit nanyit tojo ko kiŋa lyöŋit, a i ŋilu lor a lu ŋuto ködyö tiŋdi ropet na kenaki lepeŋ: ŋina a ŋo na rurwan na MATAT.

²⁴ A i kiŋa lyöŋit a nu melesen ködyö nyökökine ŋuto logon nye a gwörun ko lepeŋ i könin logon nu kak a lomore nanyit lu.

²⁵ a ŋo liŋ na ken do kune ködyö gwe gwoso sekele temet na pirit nake na rurwan: kweja adi gerajin merya murek logon temuŋdya a sekele geleŋ.

²⁶ Ama ti ŋutu gwe ti gelakiŋdya MATAT kayujin ti toro ’bo, kogwon kayujin liŋ aje gelaki MATAT a kanyit; kode se a dwönin kode a köbilu.

²⁷ A ko turu ’buti a lut i kulya ti keri, nyena a ŋuto ködyö gwöruŋdye lepeŋ bot gwoso i kenet inot, a nye ködyö ’yalakiŋdye swöt geleŋ na mukanat nanyit kata; kode ko turu ’buti ködyö a ko dakwe, a ti nye tugwöröni gwoso i kenet inot.

²⁸ Nyenagon ŋo nene ’bayin na rurwan nagon ŋutu a gelakin MATAT a na rurwan, nagon bubulö tugwörö kode dadakwe, i ŋo nene na gwon ko lu ŋuto, kode a ŋuto kode a turu ’buti, kode a melesen nanyit lomore; kweja adi ŋo na gelwe a na rurwan kune liŋ ködyö gwon a na MATAT asut.

²⁹ Lele ŋuto ’bayin logon a gelwe a lo rurwan logon bubulö dakwe; nye ködyö tatatua.

³⁰ Swöt topuökit liŋ na lo jur, kode a lo nyomot ti kak, kode a lo ludweki ti kaden, se a ti MATAT; se a lo rurwan ti MATAT.

³¹ a ko lele ŋuto ’de ’dekan dakuŋdya nene topuökit nanyit, a ti nye ködyö ’yalakiŋdye swöt geleŋ na mukanat nyin.

³² A topuökisi liŋ ti kisuk ko ti yidin, iŋkoi toro ’bo nagon a topuökisi liŋ ti teŋon nagon meyaji ko ŋutu kune ködyö gwe a na rurwan ti MATAT.

³³ a ŋuto ködyö tine galun kaŋo kode turu ’buti a na ’but kode a naron, köti a nye ködyö tine löpuk lepeŋ; a ko nye a löpuk lepeŋ, nyena a toro ’bo murek liŋ na togwoe kune ködyö gwe a na rurwan liŋ; se ködyö ti dakwe.

³⁴ Kilo a saresi logon MATAT a sarakin Mose i kulya ti ŋutu ti Yisaraele i mere Sinai yu.