Lewi 25 - Bibilia Buk na Ŋun nagon koti luŋu a

Kiŋa toburyo a yukaet gwoso sabata ko a lyöŋit

¹ A MATAT jambi ko Mose i mere Sinai adi,

² Kulyani ko ŋutu ti Yisaraele adi, Ko ta a ’dur i jur logon nan titin ta lu, a lu jur ködyö ’debbi sabata lo MATAT.

³ Ta ködyö weja meleseno kasu ko kiŋajin buker, a i kilo kiŋajin buker a ta ködyö gögöŋdi kaŋo kenia nagon ti radan ludweki i kaden kasu ti binyo kune, a ta kwökwötuŋdye ludweki kase;

⁴ ama a kiŋa toburyo ködyö gwe a sabata yukaet gwak lo kak, iŋkoi a sabata lo MATAT; a ta ködyö tine weja meleseno kasu kode gŋgoŋdya kenia nagon ti radan ludweki i kaden kasu ti binyo.

⁵ Ta ködyö ti ŋepa ŋo lo punun ka ’de lo radan kasu i meleseno, a ta ködyö tine kwökwötuŋdyö ludweki ti kaden kasu ti binyo logon a ko tokela kulo; ŋilo ködyö gwon a kiŋa yukaet gwak lo kak.

⁶ Kölumbö sabata lo kak gwon a lo kinyo losu, kweja adi a losu, ko a lo ’dupi kasu lulyan ko nawate, ko a lo kölipönök kasu lo roröpaki i kita, ko a lo ŋutu lo si ’da kasu a lepelok kulo,

⁷ ko a lo toro ’bo kasu, ko a lo kijakwa logon kata kasu kulo. Kweja adi ŋo liŋ lo radan kulo a kinyo losu.

Kiŋa tomerya mukanat a lyöŋit

⁸ A ta ködyö kenakiŋdye ’börik kiŋajin logon kak yuyukan gwoso sabata kulo daŋin buryo, kweja adi buryo daŋin buryo a kiŋajin merya Iŋwan wot buŋwan.

⁹ A kirut i perok puök ti yapa toburyo a ta ködyö soŋdi ŋutu kutaddu toriot lo wowoŋoro parik; iŋkoi ta ködyö soŋdu ŋutu kutaddu toriot kasu i jur ’bukuluŋ i lor tokelet.

¹⁰ A ta ködyö geluŋdye kiŋa tomerya mukanat a loke, a ta ködyö laikiŋdye tolien i kak ’bukuluŋ tojo i ŋutu kanyit liŋ; a ŋilu kiŋa ködyö gwe kasu a lyöŋit; a ta liŋ geleŋ geleŋ yitöni bot kasu i lomoriot ko kasu i midijik.

¹¹ A ŋilu kiŋa tomerya mukanat ködyö gwe kasu a lyöŋit. Ta ködyö ti weja kode ŋepa kata i ŋo logon a punun ka ’de, a ta ködyö tine kwökwöddu ludweki ti kaden ti binyo logon a ko tokela.

¹² Kogwon ŋilu kiŋa a lyöŋit; a nye ködyö gwe kasu a loke. Ta ködyö nyesu ŋo lo radan ka ’de i meleseno.

¹³ A i lo kiŋa lyöŋit a ta liŋ geleŋ geleŋ ködyö yitöni bot i lomoriot kasu.

¹⁴ A ko do a tugwörökin marate ilot nene kak, kode do gwörun ko marate ilot i könin, ta ködyö ti toronyakin ko ’börik.

¹⁵ Do ködyö gwöruŋdyö ko marate ilot gwoso kena na kiŋajin lo kebbu mukök na kiŋa lyöŋit, a nye ködyö tugwörökiŋdye do gwoso kena na kiŋajin radesi ti kinyojin.

¹⁶ A ko ködyö kiŋajin gwe jore a do ködyö ’yalakiŋdye ropet kata, a ko kiŋajin gwe ku ’dik a do ködyö nyökuŋdye ropet kak, kogwon a kenet na radesi ti kinyojin logon nye a tugwörökin do kulo.

¹⁷ A ta ködyö tine toronyakin ko ’börik, ama a ta ködyö kuŋge nan ŋun losu, kogwon nan a MATAT ŋun losu.

¹⁸ Nyenagon a ta ködyö koŋdi saresi kwe lo wurö, a ta ’debbi kulya na ’duŋ nan kune i koŋdya na lepeŋat; a ta mo si ’dani ’bura i ŋilu jur ’bak kujönö.

¹⁹ A ŋilu jur mo rade ludweki kanyit, a ta mo nyesi a yimönö, a mo si ’dani kata ’bura ’bak kujönö.

²⁰ Ama ko ta pija adi, Yi mo nyesu nyo i kiŋa toburyo, ko ködyö yi ti bulö weja kode kwökwötuŋdyö kinyojin kaŋ?

²¹ Nyena a nan mo sarakiŋdye ’boriet nio i ta i kiŋa tobuker, anyen ŋilu ködyö turada-kiŋdya ta ludweki logon tetemakiŋdya i kiŋajin musala.

²² A ta ködyö weji i kiŋa tobudök lonyit, ama a ta ködyö nyesi kinyojin lo ’dela ’beron; iŋkoi ta mo nyesu se tojo ko kiŋa tobuŋwan tojo ko kinyojin kanyit a toran.

²³ A kak ködyö tine tugwörö asut, kogwon kak a nio; kogwon ta po nyin a lwaka ko a ŋutu logon si ’da köyö ni a lepelok.

²⁴ a i jur lomore losu liŋ a ta ködyö rukökiŋdye ŋutu i dakuŋdya na kak.

²⁵ A ko luŋösur a wora a lomeri, a tugwöŋi lele swöt lo kak lomore nanyit, a luŋaser lonyit gwak ködyö poni i dakuŋdya na nu kak na tugwör luŋaser na.

²⁶ A ko lu ŋuto ’bak kadakanit lonyit, a molu ko nye a wora a kwörinit a nye iŋge ryö dakesi nagon tetemakiŋdya i lepeŋ,

²⁷ nyena a ti lepeŋ keŋdi kiŋajin suluja i diŋit na tugwöŋi nye lomore nanyit kulo, ko ti nye nyökökiŋdye bot pitönö ti ropesi ti kiŋajin lo pituŋdyö kulo tojo ko kiŋa lyöŋit; a kirut nye ködyö yitökine i lomore nanyit.

²⁸ Ama ko nye ti jukin nyökuŋdyö lepeŋ bot, nyena a nu kak na tugwör nye nu ködyö möŋdi ko lu ŋuto i könin lo gwöruŋdyö lepeŋ lu tojo ko kiŋa lyöŋit; a i lu kiŋa lyöŋit a nu kak kölöni kölö, a lu ŋuto yitökine kanyit i lomore.

²⁹ A ko lele ŋuto a tugwöŋu kadi i köji nagon a gömö ko mariŋ, nyena a nye bulöni bulö dakuŋdya lepeŋ i lu kiŋa gwöriet lonyit ’bukuluŋ; a nye gwe ko riŋit daket temba i lu kiŋa ’bukuluŋ.

³⁰ Ama ko nu kadi a ko dakwe i ŋilu kiŋa ’bukuluŋ, nyena a nu kadi na gwon i köji nagon a gömö ko mariŋ nu ködyö tikine ŋuto lo gwöruŋdyö lepeŋ lo a nanyit ŋupi tojo i nyakwariat kanyit, a nye ködyö tine kölö i kiŋa lyöŋit.

³¹ Ama a kadijik na gwon i turön nagon a ko gömö ko mariŋ kune ködyö kenani i pirit na geleŋ ko meleseno ti jur; kunu bubulö dakwe, a se ködyö kölöni i kiŋa lyöŋit.

³² Ama kadijik ti Lewijin na gwon i köjinö lomoriot kase kunu, Lewijin bubulö dakuŋdya se i diŋit na ’deggi se na.

³³ Ama ko ködyö lele Lewityo a ko dakuŋdya kadi nanyit, nyena a nu kadi na tugwörö i köji nase lomore na ködyö kölöni kölö i kiŋa lyöŋit; kogwon kadijik na gwon i köjinö ti Lewijin kune a lomoriot kase i kiden na ŋutu ti Yisaraele.

³⁴ Ama a piritön na gwon kana na lologga köjinö kase kune tine bulö tugwörö; kogwon a lomoriot kase ŋupi.

³⁵ A ko luŋaser ilot a wora a lomeri a tine bulö parakiŋdya mugun, nyena a do ködyö orakiŋdye lepeŋ; a nye ködyö si ’dani konut gwoso lwakatyo kode ŋuto lo si ’da a lepetyo.

³⁶ An do ko luŋgu nene wöli ko lepeŋ kode nene ’yalet, ama kujönöni ŋun ilot; anyen luŋaser ilot bubulö si ’da konut nyona.

³⁷ Do ködyö ti tiŋdu lepeŋ kuröddu gurut kunök ko wöli, kode tiŋdu lepeŋ i gwöröddu na kinyo ilot ko ’yalet.

³⁸ Nan logon a MATAT Ŋun losu, logon a joŋdya ta kaŋo i jur lo Ejipeto i tiŋdu na ta jur lo Kanana, anyen nan gwon a Ŋun losu.

³⁹ A ko luŋaser ilot a wora a lomeri, a tugwörökiŋdye mugun konut, a do ködyö tine tokitaju lepeŋ gwoso ’dupiet;

⁴⁰ nye ködyö gwon konut gwoso köli-pönit lo roröpaki köti gwoso ŋuto lo si ’da a lepetyo. A nye ködyö kitakiŋdye do tojo ko kiŋa lyöŋit;

⁴¹ a kirut nye iti kaŋo konut, se ko ŋwajik kanyit i pirit na geleŋ, a nye ködyö yitöni bot kanyit mede, a nye yitökine i lomore na merenyejin kanyit.

⁴² Kogwon lepeŋat a kölipönök kwe logon nan a jon kaŋo i jur lo Ejipeto; a se ködyö tine tugwörö gwoso ’dupi.

⁴³ A do ködyö tine saŋu ko tukaŋan, ama do ködyö kujönö Ŋun ilot.

⁴⁴ A ko gwe gwoso i kulya ti ’dupi kulök ko ’dupi kunök nagon kata konut: do bubulö gwöruŋdyö ’dupi lulyan ko nawate i jurön logon kasu i mara.

⁴⁵ Do köti bubulö gwöruŋdyö se i ŋutu logon si ’da a lepelok ko ta kilo se ko i midijik kase na gwon kasu, nagon ŋwajik kase a yuŋwe kasu i jur kilo; lepeŋat ködyö bubulö gwon a lomoriot kasu.

⁴⁶ a ta ködyö tiŋdi ŋwajik kasu i ruddya na se a lomoriot ŋupi kasu i mukök; a ta bulöni bulö tokitaju se a ’dupi. Ama ta ködyö ti tumatyan ko luŋösurök logon a ŋwajik ti Yisaraele, kweja adi ŋadi ti saŋu luŋaser ko tukaŋan.

⁴⁷ A ko lele lwakatyo kode ŋuto lo si ’da kasu a lepetyo lo a wora a kwörinit, a ko luŋaser ilot logon diŋö ko lepeŋ a wora a lomeri, a tugwörökiŋdye mugun i lwakatyo kode i ŋuto lo si ’da kasu a lepetyo, kode i lele meetyo lo ŋilu lwakatyo,

⁴⁸ nyena i mukök na tugworo nanyit a nye bulöni bulö dakwe; kweja adi lele lo luŋasirik kanyit bubulö dakuŋdya lepeŋ,

⁴⁹ kode lele luŋaser lo monye, kode ŋuro lo luŋaser monye bubulö dakuŋdya lepeŋ, kode lele lo meetyo lonyit bubulö dakuŋdya lepeŋ; kode ko nye a wora a kwörinit nye bubulö dakuŋdya mugun.

⁵⁰ A nye ködyö kenakiŋdye ŋuto lo gwörun-dyö lepeŋ lo suluja i kiŋa lo tugwörökiŋdye lepeŋ mugun lu, tojo ko kiŋa lyöŋit, a ropet na gwörit nanyit ködyö gwe gwoso i kena na kiŋajin; a diŋit na gwoŋdi nye ko lu monye lonyit nu ködyö kenakine gwoso diŋit na köli-pönit lo roröpaki.

⁵¹ A ko kiŋajin nyuŋ gwon jore, a nye ködyö nyökökiŋdye ropet daket nanyit i nu ropet kata na ropaki ’e lepeŋ nu gwoso i kena nase.

⁵² Ama ko kiŋajin ku ’dik lo pituŋdyö tojo ko kiŋa lyöŋit, a nye ködyö keŋdi ko lu ŋuto i pirit na geleŋ; a nye ködyö nyökökiŋdye lu ŋuto gurut dakesi kanyit gwoso ti kiŋajin logon a pituŋdyö i kita nagon nye a kon na.

⁵³ A nye ködyö gwe ko lepeŋ gwoso kölipönit lo roröpaki temba i kiŋa; a ŋilu ŋuto ködyö tine saŋi lepeŋ ko tukaŋan a ta memeddya.

⁵⁴ Ama ko nye a ko dakwe i ŋilo kiko, a nye ködyö kölöni kölö i kiŋa lyöŋit, lepeŋ ko ŋwajik kanyit i pirit na geleŋ.

⁵⁵ Kogwon ŋutu ti Yisaraele a kölipönök kwe, iŋkoi se a ’dupi kwe logon nan a joŋ kaŋo i jur lo Ejipeto kulo: nan logon a MATAT ŋun losu.