Lewi 24 - Bibilia Buk na Ŋun nagon koti luŋu a

Tetena na lombo

¹ A MATAT jambi ko Mose adi,

² Saŋi ŋutu ti Yisaraele i jakiŋdya na do welet nake na ludweki ti jeitun na jujukö anyen tiŋdu parara anyen lombo ködyö togwi ’diki i tule diŋitan liŋ.

³ A Arona ködyö teteŋdi lepeŋ i kemia torumet, i kaŋo na boŋgo koret na gwon i komor na ŋurupö tökoresi. A nye ködyö teteŋdi lepeŋ i tokotyaŋ tojo ko ko ’bure ko MATAT i komor ŋupi. ŋilo a saret lo wurö i yeŋon ŋupi tojo i nyakwariat kasu.

⁴ Nye ködyö ŋupi teteŋdya lombojin jojo i gwo ’diet logon tetena ko dakap nake logon gwo ’dan ko MATAT i komor.

Ambatajin na peta ko ŋun i komor

⁵ A do ködyö ’dumuŋdye ’bolot na jiö a naliliŋök, a do ködyö deŋi se a ambatajin puök wot murek; kine ambatajin geleŋ geleŋ ködyö tetena ko ’bolot nagon a swöt topuökisi murek ti wuyit nagon a epa.

⁶ A do ködyö peddi se a ’dokiŋ murek, kweja adi buker i ’doke geleŋ, i loki na misa nagon tetena ko dakap nake na gwon ko MATAT i komor nu.

⁷ A do ködyö tiŋdi bökur lokwe loke i ’dokiŋ liŋ loki, anyen mora ko ambata i gwon a koret nagon ’yuraki MATAT a toyeyeet.

⁸ Temba i lor lo sabata a Arona ködyö petakiŋdye lepeŋat jojo ko MATAT i komor kogwon kulya ti ŋutu ti Yisaraele, anyen yeŋon ŋupi a tomoret na yeŋ nyin.

⁹ A se ködyö gwe a ti Arona ko ŋwajik kanyit, a se ködyö nyesi lepeŋat i nene pirit nake na rurwan kogwon se a nake parik. Kine ambatajin a gelaki Arona i kiden na rubaŋgajin lo ’yuraki MATAT kogwon saret lo wurö anyen yeyeŋon ŋupi lo.

Kulya ti lauŋdya na karin ti ŋun ko kulya ti robba na toron

¹⁰ A ŋuro lo nene Yisaraeletyo, logon monye lonyit a Ejipetotyo lo iŋge tu kaŋo i kiden na ŋutu ti Yisaraele; a lu ŋuro logon ŋote a Yisaraeletyo lo se ko lele Yisaraeletyo iŋge mörö ko ’börik i mera lukata,

¹¹ a ŋuro logon ŋote a Yisaraeletyo lo iŋge lauŋdya karin ti ŋun, a lömbi lömbu. A lepeŋat jakiŋdye Mose lu ŋuro. Karin ti ŋote ŋilo ŋuro a Salomit, ŋuro na Dibiri na kötumit na Dan.

¹² A lepeŋat tiŋdi lu ŋuro i rereka, tojo ko se a kurun kaŋo ŋo nagon MATAT ’de ’dekan anyen konaki lepeŋ.

¹³ A MATAT jambi ko Mose adi,

¹⁴ Jo ŋilo ŋuro logon a lömbu lo kaŋo i mera kata; ko ti ŋutu liŋ logon a yiŋ lepeŋ i lömbu kulo sopakiŋdye könisi ko lepeŋ i kwe, ko ti momoret na ŋutu liŋ gugumbe lepeŋ ko ŋurupö.

¹⁵ A do kulyani ko ŋutu ti Yisaraele adi, Ko ŋa logon a lömbu ŋun lonyit a mo ’doggi toron nanyit.

¹⁶ A nye logon a lauŋdya karin ti MATAT lo ködyö tatuani tatua; a momoret na ŋutu liŋ ködyö gugubuje lepeŋ ko ŋurupö. ŋuto lo si ’da a lepetyo se ko ŋuto lo yuŋwe i jur lo ko a lauŋdya kine Karin, a ködyö tatuani tatua.

¹⁷ A ko ŋa lo tatuja ŋuto a nye ködyö tatuani tatua.

¹⁸ A nye lo tatuja turu ’buti lo ködyö joŋdya turu ’buti na gwon jörun anyen ropani ru ko ru.

¹⁹ A ko lele ŋuto a böŋöddu marate lonyit, a ti konakine lepeŋ gwoso na böŋöddi nye nu,

²⁰ kweja adi ’beleŋo ropa ko ’beleŋo, koŋe ropa ko koŋe, kele ropa ko kele; nye ködyö böböŋöji gwoso na böŋöddi nye lu ŋuto nu.

²¹ Ŋuto lo tatuja turu ’buti lo ködyö rorobba, a nye lo tatuja ŋuto lo ködyö tatuani tatua.

²² Ta ködyö gwon ko saret geleŋ i kulya ti ŋuto lo si ’da a lepetyo ko i nye lo yuŋwe i jur lo; kogwon nan a MATAT ŋun losu.

²³ Nyena a Mose jambi ko ŋutu ti Yisaraele, a se joŋdi ŋuro logon a lömbu lo kaŋo i mera kata a gugubuje lepeŋ ko ŋurupö. Nyena a ŋutu ti Yisaraele koŋdi gwoso nagon MATAT a saŋi Mose nu.