Lewi 23 - Bibilia Buk na Ŋun nagon koti luŋu a

Roriot lo wulwe anyen kökona

¹ A MATAT jambi ko Mose adi,

² Kulyani ko ŋutu ti Yisaraele adi, Roriot lo wulwe ti MATAT logon ta ködyö tukökin adi se a pepenesi loke, iŋkoi roriot kwe lo wulwe makilo.

³ Kita ködyö kona ko perok buker; ama lor toburyo a sabata yukaet gwak, a pepenet loke; a ta ködyö tine koŋdya nene kita; ŋilo a sabata lo MATAT kasu i midijik liŋ.

⁴ Kilo a roriot lo wulwe ti MATAT, logon a pepenesi loke logon ta ködyö laŋa i diŋitan na wulöki se kunu.

⁵ I perok puök wot Iŋwan ti yapa togeleŋ i sömukö, a gwe a Pasaka lo MATAT.

⁶ A i perok puök wot mukanat ti ŋilo yapa lo geleŋ lo gwe a rorwe lo ambata nagon ’bak kape a lo MATAT; ta ködyö nyesu ambata nagon ’bak kape ko perok buryo.

⁷ I lor lo kokwe a ta ködyö gwe ko pepenet loke; a ta ködyö tine koŋdya nene kita nago.

⁸ Ama a ta ködyö ’yurakiŋdye MATAT rubaŋga ko perok buryo; a lor toburyo lonyit gwe a pepenet loke a ta ködyö tine koŋdya kita nago.

⁹ A MATAT jambi ko Mose adi,

¹⁰ Kulyani ko ŋutu ti Yisaraele adi, Ko ta mo a ’dur i jur logon nan mo titin ta lu, a geŋi ’butun lonyit, a ta ködyö joŋdi kwe na ’bolot waŋet na kokwe na ’butun losu ko koane ni;

¹¹ a nye ködyö kweji ŋina kwe na ’bolot ko MATAT i komor anyen ta böŋö rurukö; koane ködyö kweja lepeŋ i ko ’bure lo kebbu sabata lu.

¹² A i lu lor lo kweji ta kwe na ’bolot lu, a ta ködyö wukiŋdye MATAT kilolor mönik lo kiŋa geleŋ logon ’bak yuyuket a rubaŋga lo ’yu ’yura ’buluŋ.

¹³ A ’doket na ’bolot na mora ko nye ködyö gwe a swöt topuökisi murek ti wuyit nagon a epa na ’bolot na jiö a naliliŋök a ŋola ko welet, anyen ’yuraki MATAT a ŋo na mon paleleŋ. A rubaŋga ’bu ’buket lo mora ko ’doket na ’bolot i pirit na geleŋ ködyö gwe a swöt geleŋ na Iŋwan na temet nagon a yin na binyo.

¹⁴ A ta ködyö tine nyesu ambata kode ’bolot lo kekelo, kode a lodök, tojo ko ŋilo lor gwak, tojo ko ta a joŋdya rubaŋga lo ŋun losu. ŋilo a saret lo wurö i yeŋon tojo i nyakwariat kasu i midijik kasu liŋ.

¹⁵ Suluja i ko ’bure lo kebbu sabata lo, suluja i lor logon ta joŋdi kwe na ’bolot a rubaŋga lo kwekweya lu, a ta ködyö kenakiŋdye a jimalan buryo.

¹⁶ Kweja adi ta ködyö keŋdya perok merya mukanat tojo ko ko ’bure lo kebbu sabata toburyo; a kirut a ta wukiŋdye MATAT ’doket na ’bolot ludukö.

¹⁷ A ta ködyö joŋdi kasu i midijik lukata ambatajin murek anyen kwekweya, nagon a tetena ko swöt topuökisi murek ti wuyit nagon a epa; a se ködyö gwe a ti ’bolot na jiö a naliliŋök, a se ködyö derani ko kape, gwoso kinyojin waŋesi ti kokwe logon MATAT wawaŋ.

¹⁸ A ta ködyö wukiŋdye yisi buryo logon a ti kiŋa geleŋ logon ’bak yuyukesi kulo i pirit na geleŋ ko ambatajin, se ko dwöt lo ’dit geleŋ, ko lopijoki murek; a se gwe a rubaŋga lo ’yuraki MATAT ’buluŋ, mora ko ’doket na ’bolot se ko rubaŋgajin ’bu ’bukesi, iŋkoi a rubaŋga lo ’yu ’yura anyen möara paleleŋ ko MATAT yu.

¹⁹ A ta ködyö wukiŋdye meetyo mönik a lo rubaŋga lo toron, ko yisi mönikön ti kiŋa geleŋ a ti rubaŋgajin ti taliŋ.

²⁰ A koane ködyö kweji lepeŋat ko ambata na wapesi ti kokwe i pirit na geleŋ a rubaŋga lo kwekweya ko MATAT i komor, mora ko yisi murek; a se ködyö gwe a loke ti MATAT anyen tiki koane.

²¹ A ta ködyö laikiŋdye pepenet loke i ŋilu lor gwak; ta ködyö ti koŋdya kita nago. ŋilo a saret lo wurö i yeŋon ŋupi i midijik kasu liŋ tojo i nyakwariat kasu.

²² Ko ta ŋepa ’butun lo kak nasu, ta ködyö ti ŋeraddu meleseno kasu tojo i goŋesi liŋ, köti a ta tine kwökwötuŋdyö kwökwötesi i mukök na ŋepa nasu na ’butun; do ködyö kölökin lepeŋat a ti lomerika ko a ti ŋutu logon si ’da a lepelok: nan logon a MATAT Ŋun losu.

²³ A MATAT jambi ko Mose adi.

²⁴ Kulyani ko ŋutu ti Yisaraele adi, Lor geleŋ lo yapa toburyo ködyö gwon kasu a yukaet gwak; ta ködyö laŋa lepeŋ a toyeyeet kuddya toriot, anyen gwon a pepenet loke.

²⁵ A ta ködyö tine koŋdya kita nago, a ta ködyö wukiŋdye MATAT rubaŋga lo ’yu ’yura.

²⁶ A MATAT jambi ko Mose adi,

²⁷ 1 perok puök ti lo yapa toburyo gwon a lor tokelet lo toron; nye ködyö gwon kasu a pepenet loke, a ta ködyö tokoyoggi ’börik a ta ’yurakiŋdye MATAT rubaŋga.

²⁸ a ta ködyö tine koŋdya nene kita asut i ŋilu lor gwak; kogwon nye a lor tokelet lo toron logon tokelarikin ta ko MATAT Ŋun losu i komor.

²⁹ A ko ŋa logon a ko tokoyogga mugun i ŋilu lor, a lepeŋ ködyo riköjine kaŋo i ŋutu kanyit.

³⁰ Ko ŋuto logon a koŋdya nene kita i ŋilu lor, a nan mo tukarara lepeŋ kaŋo i kiden na ŋutu kanyit.

³¹ Ta ködyö ti koŋdya nene kita asut. Ŋilo a saret lo wurö a lo nyakwariat kasu i diŋitan liŋ i midijik kasu liŋ.

³² A nye ködyö gwe kasu a sabata yukaet gwak, a ta ködyö tokoyoggi ’börik; i perok buŋwan ti yapa i sömukö, a ta ködyö ’debbi sabata losu suluja i sömukö tojo ko lele sömukö.

³³ A MATAT jambi ko Mose adi,

³⁴ Kulyani ko ŋutu ti Yisaraele adi, I perok puök wot mukanat ti ŋilo yapa toburyo gwon a rorwe lo murugujin a lo MATAT kona ko perok buryo.

³⁵ a i lor lo kokwe ködyö gwe a pepenet loke; a ta ködyö tine koŋdya nene kita nago.

³⁶ A i kulu perok buryo a ta ködyö ’yurakiŋdye MATAT rubaŋgajin; a i lor tobudök lonyit ködyö gwe kasu a pepenet loke a ’ta ’yurakiŋdye MATAT rubaŋga. ŋina a momoret duma; a ta ködyö tine koŋdya kita nago.

³⁷ Kilo a roriot lo wulwe ti MATAT, logon ta ködyö lalaikin adi se a pepenesi loke, anyen ’yu ’yuraki ’e MATAT rubaŋgajin, kweja adi rubaŋgajin lo ’yu ’yura ’buluŋ, ko ’dokesi ti ’bolot, ko rubaŋgajin lo ’du ’duŋö, ko rubaŋgajin ’bu ’bukesi, liŋ geleŋ geleŋ i perok kase;

³⁸ wat sabatajin ti MATAT, ko wat ’dokesi kasu, ko wat rubaŋgajin kasu liŋ ti milye, ko wat rubaŋgajin kasu liŋ ti tupalikan na töili logon ta wukin MATAT kilo.

³⁹ Ama i perok puök wot mukanat ti yapa toburyo, nagon ta aje kwökwö-tuŋdyö ludweki ti kak nu, a ta ködyö ’debbi rorwe lo MATAT ko perok buryo; a lor lo kokwe ködyö gwe a yukaet gwak, a lor tobudök gwe a yukaet koti gwak.

⁴⁰ A i lor lo kokwe a ta ködyö ’dumuŋdye ludweki ti kaden lo ’but ko kenia ti tömur, ko kenia ti kaden logon ko koropo jore, ko ti kaden ’biyo logon nyona ko loro kulo; a ta ködyö lyölyöŋine ko MATAT ŋun losu i komor ko perok buryo.

⁴¹ A ta ködyö ’debbi lepeŋ a rorwe lo MATAT ko perok buryo temba i kiŋa; ŋilo a saret lo wurö i yeŋon ŋupi tojo i nyakwariat kasu; a ta ködyö ’debbi lepeŋ i yapa toburyo.

⁴² A ta ködyö si ’dani i murugujin ko perok buryo; ŋutu liŋ lo yuŋwe i Yisaraele kulo si ’da i murugujin,

⁴³ anyen nyakwariat kasu böŋö kuruŋdyö adi nan aje tiŋdu ŋutu ti Yisaraele i si ’da i murugujin na joŋdi nan lepeŋat kaŋo i jur lo Ejipeto nu: nan logon a MATAT ŋun losu.

⁴⁴ A Mose iŋge nyönyökökiŋdyö ŋutu ti Yisaraele kulya ti roriot lo wulwe a ti MATAT kulo.