Lewi 22 - Bibilia Buk na Ŋun nagon koti luŋu a

Ŋo logon wuki a rubaŋgajin kulo ködyö gwon a loke

¹ A MATAT jambi ko Mose adi,

² Tuköki Arona ko ŋwajik kanyit adi, ti se koraddi ’börik kaŋo i ŋo nake na rurwan ti ŋutu ti Yisaraele nagon se a gelakin nan a nake kune, an lepeŋat ködyö ko toluddya karin kwe nake; nan logon a MATAT.

³ Kulyani ko se adi, Ko lon ŋuto lo nyakwariat kasu liŋ a mijörö i ŋo nake na rurwan na gelakin ŋutu ti Yisaraele nan MATAT kunu, ko nye gwon ko nene tolutet kanyit i mugun, a ti nye ködyö riköjine kaŋo ködyö i komor: nan logon a MATAT.

⁴ A ŋuto gwe ’bayin lo nyakwariat ti Arona logon a moka ko rimajin, kode logon mugun wowon, logon bubulö nyesu ŋo nake na rurwan tojo ko nye a tokela. A ko lon ŋuto lo ’bo ’yu nene ŋo nagon a toluta kogwon kulya ti ŋuto lo twan, kode a ’bo ’yu lele ŋuto logon kula yuŋweesi a po ko lepeŋ,

⁵ a ko ŋa logon a ’bo ’yu nene ŋo na koko ’yokta kak nagon bubulö toluddya lepeŋ na, kode lele ŋuto logon ködyö tiŋdu lepeŋ i gwon a lut, kode tolutwan nanyit gwon a nyo.

⁶ a lu ŋuto lo ’bo ’yu nene na kine ŋo lo ködyö gwe a lut i kulya ti keri tojo ko sömukö, a ködyö tine nyesu ŋo nake na rurwan ko nye kiyaŋ a ko tukwöju mugun nanyit.

⁷ A ko kolor a ’dororo a nye mo gwe a loke i kulya ti keri; a i mukök nye bulöni bulö nyesu ŋo nake na rurwan, kogwon a kinyo lonyit.

⁸ A nye ködyö tine nyesu ŋo nagon twan ka ’de, kode nagon a koa ko gworoŋ, i toluddya na mugun nanyit ko se: nan logon a MATAT.

⁹ Nyenagon se ködyö ’debba jujuwet nio, an se ’doggu toron i kulya ti jujuwet, a twatwane twatwa, na toluddye se jujuwet nu nan logon a MATAT logon geluŋdya se kaŋo a loke lo.

¹⁰ Lele ŋuto logon a lepetyo ködyö ti nyesu ŋo nake na rurwan. ŋuto lepetyo lo mönuŋdyö ko koane, kode a kölipönit lo roröpaki ködyö ti nyesu ŋo nake na rurwan;

¹¹ ama ko ködyö koane a gwöruŋdyö lele ŋuto ko gurut a ’dupiet, ŋilo ’dupiet lonyit bubulö nyöuŋdyö kata mora ko ’dupi logon a yuŋwe ko koane i ’baŋ kulo.

¹² A ko nene ŋuro na koane a yemaji ko lele ŋuto logon a lepetyo, nye ködyö ti nyesu ŋo na wuki a nake na rurwan.

¹³ Ama ko ködyö ŋuro na koane a karu ’be kode a paya ko lalet, a nye gwe ’bak ŋuro, a yitöni bot ko monye i ’baŋ gwoso i tukti ’disen nanyit nu, nye bubulö nyesu kinyo lo monye; ama a ŋuto lepetyo ködyö tine nyesu kata.

¹⁴ A ko ködyö lele ŋuto a nyesu ŋo nake na rurwan ’bak denet, a ti nye ködyö nyököki koane ŋo nake na rurwan nagon a ’yalaki swöt geleŋ na mukanat na ropet nanyit nyin.

¹⁵ A koanejin ködyö tine toluddya ŋo nake na rurwan nagon ŋutu ti Yisaraele a wukin MATAT kune,

¹⁶ anyen kine ŋo nake na rurwan tine nyei abur, i tiŋdu na kulo ŋutu i wukiŋdya na rubaŋga lyaŋet kogwon lyaŋan nase; kogwon nan a MATAT logon a geluŋdya koanejin kaŋo a loke lo.

¹⁷ A MATAT jambi ko Mose adi,

¹⁸ Kulyani ko Arona ko ŋwajik kanyit se ko ŋutu liŋ ti Yisaraele adi, Ko lon ŋuto lo kömit na Yisaraele kode ŋuto logon si ’da a lepetyo i Yisaraele, logon a wukiŋdya rubaŋga lonyit, kode nye a lo milye, kode a lo tupalikan na töili logon a wuki MATAT a rubaŋga lo ’yu ’yura ’buluŋ,

¹⁹ ko ta ’de ’dekan adi anyen ta rurukö, ta ködyö wukiŋdya mönik logon ’bak yuyuket, kode nye a lo dwönin kode a lo köbilu, kode a lo melon.

²⁰ Ta ködyö ti wukiŋdya nene ŋo nagon ko yuyuket, kogwon nan mo ti rukökin ta nye.

²¹ A ko ŋa lo wukiŋdya MATAT lele rubaŋga lo taliŋ lo ’dumwe i kisuk kode i yidin, anyen temakiŋdya milye kode gwoso rubaŋga lo tupalikan na töili, ŋilu turu ’buti köbyö gwon a loke anyen rurukö, lepeŋ ködyö gwon ’bak yuyuket.

²² A ta ködyö tine wukiŋdya MATAT toro ’bo logon a mo ’dokeno, kode a bata, kode a gwutö, kode gwon ko ’butöt na wowon, kode ko twanti lo pupuri, kode ko totosesi; ta ködyö ti ’yurakiŋdya se MATAT i pirit ’yuret na rubaŋgajin.

²³ Ta bubulö wukiŋdya kode dwöt, kode kilolor logon mugun nanyit a ko ’duŋö gwogwo a gwe a lojo kode a lorutut lo a rubaŋga lo tupalikan na töili, ama nan mo ti rukökin ta nye a rubaŋga lo milye.

²⁴ A ta ködyö tine wukiŋdya MATAT turu ’buti logon tulu kanyit a miyika, kode a joka, kode a nonota, kode a toso, a ta gwe ti ’duŋökin lepeŋ a rubaŋga kasu i jur.

²⁵ A ta köti ködyö tine wukiŋdya nene na ŋo nagon ta a ryö ko lwaka i könisi kune a kinyo liŋ lo ŋun losu. Kogwon se gwon ko yuyukesi, kogwon se a mimiyika, a nan mo tine rukökin ta se.

²⁶ A MATAT jambi ko Mose adi,

²⁷ Ko dwöt kode köbilityo kode meetyo a yuŋwe, a nye ködyö gwe ko ŋote nanyit perok buryo; a i lor tobudök lonyit lu a nye ruköni rukö a rubaŋga lo ’yuraki nan MATAT.

²⁸ Ta ködyö ti ’duŋgö kiteŋse ko tore lonyit, kode köbilityo se ko tore lonyit i lor geleŋ.

²⁹ A ko ta ’duŋgö rubaŋga logon tiki ’e nan MATAT tinate lo, a ta ködyö ’duŋge nye anyen ta böŋö rurukö.

³⁰ A nye ködyö nyeni i lor geleŋ, a ta ködyö tine pitun nene tojo ko ko ’bure: nan logon a MATAT.

³¹ Nyena a ta ködyö ’debbi saresi kwe sona a koŋdi lepeŋat: nan logon a MATAT.

³² A ta ködyö tine toluddya karin kwe nake, ama a nan ködyö gelwene a loke lo rurwan i kiden na ŋutu ti Yisaraele; nan logon a MATAT lo geluŋdya ta kaŋo a loke,

³³ logon a joŋdya ta kaŋo i jur lo Ejipeto anyen gwon a ŋun losu lo: nan logon a MATAT lo.