Lewi 19 - Bibilia Buk na Ŋun nagon koti luŋu a

Saresi i kulya ti gwiliŋit loke ko torigwo

¹ A MATAT jambi ko Mose adi,

² Kulyani ko momoret liŋ na ŋutu ti Yisaraele adi, Ta ködyö gwon a loke; kogwon nan MATAT Ŋun losu a loke.

³ Ta liŋ geleŋ geleŋ ŋadi ködyö twöju ŋote nanyit ko monye lonyit, a ta ködyö ’debbi sabatajin kwe: nan a MATAT Ŋun losu.

⁴ Ko wöriööddu ta i nyömuejin kode i tetenakiŋdya na ’börik ŋunyen lo ninitö: nan a MATAT Ŋun losu.

⁵ A ko ta wukiŋdya nan MATAT rubaŋga a lo taliŋ, a ta ködyö wukiŋdye lepeŋ anyen ta böŋö rurukö.

⁶ A ŋilo rubaŋga nyeni i lor lo wukiŋdye ta nye lu, kode i kotumalu nanyit; a ko nene ŋo a pituŋdyö tojo i perok musala, a nye ködyö ’yurani ’yura ko kimaŋ.

⁷ A ko ködyö lele swöt a nyei i lor tomusala lonyit, a nye gwe a ŋo na mamana; a nye mo tine rukö,

⁸ a ŋutu liŋ geleŋ geleŋ logon a nyesu lepeŋ kulo ŋadi mo ’doggu ŋonyan nanyit, kogwon nye a toluddya ŋo nake na rurwan nio na MATAT; a ŋilu ŋuto ködyö riköjine kaŋo i ŋutu kanyit.

⁹ Ko ta ŋepa ’butun lo kak nasu, a ta ködyö tine ŋeraddu meleseno kasu tojo i goŋesi liŋ, köti a ta tine kwökwö-tuŋdyö kwökwötesi i mukök na ŋepa nasu na ’butun.

¹⁰ A do ködyö tine gaga ’yu bot na melesen inot na binyo, köti a do tine ’du ’dumba ludweki lo ’do ’do kak i luköbi inot na binyo; do ködyö kölökin lepeŋat a ti lomerika ko a ti ŋutu logon si ’da a lepelok: nan logon a MATAT Ŋun losu.

¹¹ Ta ködyö ti koko ’ya, kode mumu-lugga, kode to ’burönökin ko ’börik.

¹² A ta ködyö tine milyeju ko karin kwe a ’burönö, i toluddya na karin kwe nan ŋun losu sona: nan logon a MATAT.

¹³ Do ködyö ti ru ’ya marate ilot, kode ’dumaddu nene ŋo nanyit. Kaki-tanit lo gwögwöröki i kita lo ködyö ropaki kita nanyit i lor lo kitari nye lu, do ködyö ti göja tojo ko ko ’bure.

¹⁴ Do ködyö ti momoröju ŋuto miije kode tiŋdu nene köpuket i komor na ŋuto mo ’doke, ama do ködyö kujönö nan Ŋun ilot: nan logon a MATAT.

¹⁵ Do ködyö ti tukwölöŋgu i ’duŋgö na putet; do ködyö ti nyaŋu ŋuto lomeri kode bu ’ya ŋuto duma, ama do ködyö ’duŋgö kulya ti marate ilot ko torigwo.

¹⁶ Do ködyö ti wöwörötu i yeyegga na kulya i kiden na ŋutu kulök, a do ködyö tine ŋöökiŋdyö marate ilot ko ’burönö i ’bukwe na rima: nan logon a MATAT.

¹⁷ Do ködyö ti maŋdu luŋösur konut i töili, ama ta ködyö teten kulya kasu ko marate ilot, an do ko ’doggu toron i kulya ti lepeŋ.

¹⁸ Do ködyö ti ropa-kiŋdya toron kode gwon ko ŋisa konut i töili ko lele lo ŋutu kulök, ama do ködyö nyanyar marate ilot gwoso mugun inot: nan logon a MATAT.

¹⁹ Ta ködyö ’debba saresi kwe lo wurö. Ta ködyö ti kölökiŋdyö toro ’bo kasu i luluwatu ko lele gweyari; ta ködyö ti wekiŋdya gweyarijin murek ti nyomot kasu i meleseno, kode jupu-kiŋdya boŋgo nagon tetena ko gweyarijin murek ti waratat.

²⁰ A ko lele ŋuto a doto ko ŋuto nagon a ’dupiet nagon lele ŋuto a yem na, a ŋina ŋuto gwe a ko nyuŋ dakaji kode a ko nyuŋ köldji a luitot, a kine kulya ködyö piyani piya. A se ködyö tine tatua, kogwon ŋina ŋuto ’bayin a luitöt;

²¹ ama a lu ŋuto ködyö joŋdi rubaŋga lo lyaŋan logon a lopijot ko MATAT ni kogwon mugun nanyit, i kotumit na kemia torumet.

²² A koane toke ’yi lepeŋ ko MATAT i komor ko lopijot lo rubaŋga lo lyaŋan kogwon toron nanyit na kon nye na; a nye pitökine pitöki i toron na kon nye na.

²³ A ko ta mo a ’dur i lu jur, a ta ’yuddi gweyarijin liŋ ti kaden lo nyenyei, nyena a ta ködyö meddi se a ŋo logon a teŋo ti nyei; iŋkoi se ködyö tiŋiki ta ko kiŋajin musala.

²⁴ a i kiŋa toiŋwan lonyit a ludweki kase liŋ ködyö gwe a loke lo rurwan, iŋkoi a rubaŋga pupuret lo MATAT.

²⁵ Ama i kiŋa tomukanat lonyit a ta bulöni bulö nyesu ludweki kase, anyen se raradan jore a kasu; nan logon a MATAT ŋun losu.

²⁶ Ta ködyö ti nyesu nene lokore nagon gwon ko rima. Ta ködyö ti jwöjwöŋgu ŋutu ko winikö kode koŋdya to ’bunun.

²⁷ ta ködyö ti ’bariŋdu komorsikan kasu kode ’duŋgö goŋesi ti kupir ti nyekema kasu.

²⁸ Ta ködyö ti ’du ’duŋujö mugunya kasu i kulya ti ŋutu lo twatwa, kode ’duŋökiŋdyö ’börik kunie mörikölö: nan logon a MATAT.

²⁹ Do ködyö ti toluddya ŋuro inot i tiŋdu na lepeŋ i gwon a kalupe, an ŋutu ti jur ’doro i toluŋ a jur jorene ko toronjin.

³⁰ Ta ködyö ’debba sabatajin kwe a ta twöji pirit nio nake na rurwan: nan logon a MATAT.

³¹ An ta ko Idpuköddu ta i ŋutu logon do ’ya ko kwen ti mulökö, kode i ’bunuk kawanak; ko do ’ya ta lepeŋat, an se tolut ta: nan logon a MATAT ŋun losu.

³² Do ködyö ŋi ki i komor na ŋutu logon kupir kase aje kwekweja, a do bu ’ye ŋuto modoŋ, a do ködyö kuŋge nan ŋun ilot; nan logon a MATAT.

³³ A ko lele ŋuto si ’da a lepetyo kasu i jur, a ta ködyö tine konakiŋdya lepeŋ arabat.

³⁴ Ŋuto lo si ’da kasu kiden a lepetyo lo ködyö gwon gwoso ŋuto lo yuŋwe kasu kiden, a do ködyö nyaŋi lepeŋ gwoso mugun inot; kogwon ta köju si ’da i jur lo Ejipeto a lepelok: nan logon a MATAT ŋun losu.

³⁵ Ta ködyö ti koŋdya arabat i ’duŋgö na putesi. Temesi kasu tugwörösi ködyö gwon jojo, kode temet na tojolan, kode mijan, kode temet nagon a wuyit.

³⁶ Ta ködyö gwon ko mijanyan nagon temba jojo, ko witiöt temesi lo temarikin jojo, ko wuyit nagon a epa nagon jojo, ko temet nagon a yin nagon jojo: nan logon a MATAT ŋun losu logon köju a joŋdya ta kaŋo i jur lo Ejipeto.

³⁷ Ta ködyö yiyiŋ saresi kwe liŋ lo wurö, ko kulya kwe liŋ na ’duŋö kune, i koŋdya na lepeŋat: nan logon a MATAT.