Lewi 18 - Bibilia Buk na Ŋun nagon koti luŋu a

Kulya ti toluŋ ti gwe ti kona

¹ A MATAT jambi ko Mose adi,

² Kulyani ko ŋutu ti Yisaraele adi, Nan a MATAT ŋun losu.

³ Ta ködyö ti koŋdya gwoso na koŋdi ŋutu ti jur lo Ejipeto na si ’dari ta nyu nu, a ta ködyö tine kon gwoso na koŋdi ŋutu ti jur lo Kanana na yeyekuŋdye nan ta kata nu. A ta tine kebbu saresi kase.

⁴ A ta ködyö koŋdi kulya na ’duŋ nan kune a ’debbi saresi kwe lo wurö, a ta kebbi lepeŋat. Nan logon a MATAT ŋun losu.

⁵ Nyenagon a ta ködyö ’debbi saresi kwe lo wurö se ko kulya na ’duŋ nan kune. ŋuto logon a koŋdya se lo mo gwon jörun kogwon se: nan logon a MATAT.

⁶ Lele losu ködyö ti mijörö nyona ko karutyo nanyit nagon kötumit nase gwon geleŋ i doto ko lepeŋ.

⁷ Do ködyö ti doto ko ŋuti, anyen toyujö kwe na munyi; nye a ŋuti na yupuŋdyö do, do ködyö ti toyujö kwe nanyit.

⁸ Do ködyö ti doto ko nakwan na munyi; an kwe na munyi yu.

⁹ Do ködyö ti doto ko kiösur nagon a ŋuro na munyi kode a ŋuro na ŋuti, kode nye a yuŋwe i ’baŋ kode a yuŋwe i nene mede.

¹⁰ Do ködyö ti doto ko ŋuro na ŋuro ilot, kode ŋuro na ŋuro inot, kogwon yu na kwe nase morga do.

¹¹ Do ködyö ti doto ko ŋuro na nakwan na munyi nagon munyi lo yupuŋdyö na, kogwon nye a kiösur.

¹² Do ködyö ti doto ko kiaser munyi; kogwon nye a kötumit geleŋ ko munyi.

¹³ Do ködyö ti doto ko kiaser ŋuti, kogwon nye a kötumit geleŋ ko ŋuti.

¹⁴ Do ködyö ti toyujö kwe na luŋaser munyi, kweja adi do ködyö ti mijun nyona ko narakwan nanyit; kogwon nye a ŋuti.

¹⁵ Do ködyö ti doto ko narakwan na ŋuro ilot; kogwon nye a narakwan na ŋuro ilot, a do ködyö tine toyujö kwe nanyit.

¹⁶ Do ködyö ti doto ko nakwan na luŋösur, anyen toyujö kwe na luŋösur.

¹⁷ Do ködyö ti doto ko nene ŋuto se ko ŋuro nanyit, a do ködyö tine joŋga ŋuro na ŋuro lonyit kode ŋuro na ŋuro nanyit, anyen toyujö kwe na nu ŋuto; kogwon se a kötumit geleŋ; ŋina a toron.

¹⁸ A do ködyö tine joŋga nene ŋuto a köyini na kiaser nanyit, i toyujö na kwe nanyit nagon kiaser nyuŋ gwon kata nu.

¹⁹ Do ködyö ti ŋun nyona ko nene ŋuto i doto ko lepeŋ nagon nye nyuŋ gwon a lut ko perok kanyit ti yapa.

²⁰ A do ködyö tine doto ko nakwan na marate ilot, i toluddya na mugun ko lepeŋ.

²¹ Do ködyö ti tiŋdu lele lo ŋwajik kulök i wukiŋdya na lepeŋ ko Molek a rubaŋga, anyen toluddya karin ti ŋun ilot sona; nan logon a MATAT.

²² Do ködyö ti dotori ŋuto lalet gwoso na dotori do ko ŋuto nakwan na; ŋina a ŋo na mamana.

²³ A do ködyö tine dotori nene turu ’buti i toluddya na mugun inot ko lepeŋ, köti a nene ŋuto ködyö tine tiŋdu mugun nanyit i dotorikin ko turu ’buti; ŋina a ŋo nagon koŋu gwiliŋit lo ŋutu.

²⁴ Ta ködyö ti toluddya ’börik ko nene na kine kulya, kogwon gweyajin ti ŋutu logon nan mo gubara kaŋo kasu i komor kulo aje toluddya ’börik ko kine ŋo liŋ;

²⁵ a jur iŋge toluta, nyena ko Ŋina kwe a nan riŋge ŋonyan nanyit, a jur jauŋdye ŋutu kanyit kaŋo.

²⁶ Nyenagon ta ködyö ’debba saresi kwe lo wurö, ko kulya na ’duŋ nan kune, a ta ködyö tine koŋdya nene na ŋo na mamana kine, kode nye a ŋuto lo yuŋwe i jur kode nye a ŋuto lo si ’da kasu kiden a lepetyo lo.

²⁷ Ŋutu logon köju gwon i lu jur kulu a koŋdya ŋo liŋ na mamana kune, a jur iŋge toluta.

²⁸ An ta ko mirakiŋdya se i toluddya na jur an lu jur jaun ta kaŋo, gwoso na jauŋdye lepeŋ kaŋo lu gweyari lo ŋutu lo si ’da nyu a kokwe nasu.

²⁹ Kogwon ko ŋa logon mo koŋdya nene na kine ŋo na mamana, iŋkoi ŋutu lo koŋdya kulo ködyö riköji kaŋo i kiden na ŋutu kase.

³⁰ Nyenagon ko Ŋina kwe ’debbi ta jujuwet nio, an ta ko koŋdya lele lo kulo keriat logon mamana kulo, logon köju kokonatu a kokwe nasu, an ta ko toluddya ta ’börik ko kine ŋo. Nan logon a MATAT Ŋun losu.