Lewi 17 - Bibilia Buk na Ŋun nagon koti luŋu a

Rubaŋgajin ködyö ’duŋö i kömit na kemia torumet ’bayin i nene pirit kwöŋ

¹ A MATAT jambi ko Mose adi,

² Kulyani ko Arona ko ŋwajik kanyit, ko ŋutu liŋ ti Yisaraele adi. ŋina a ŋo nagon nan MATAT aje sarakin adi,

³ Ko lon ŋuto lo kömit na Yisaraele a ’duŋgö dwöt, kode kilolor, kode meetyo i mera, kode a ’duŋgö i kaŋo na mera,

⁴ a nye tine joŋdya lepeŋ i kömit na kemia torumet, i wukiŋdya na lepeŋ a rubaŋga lo MATAT i komor na kemia na MATAT, a toron na rima mo konakine lu ŋuto; kweja adi lepeŋ a ’bukuŋdyö rima, a lu ŋuto ködyö riköjine kaŋo i kiden na ŋutu kanyit.

⁵ Kine kulya saraki sona anyen ŋutu ti Yisaraele böŋö joŋdya rubaŋgajin kase lo ’duŋ se mu ’diŋ kulo ko MATAT ni, ko koane ni i kömit na kemia torumet, i ’duŋgö na se a rubaŋgajin ti taliŋ ti MATAT.

⁶ A koane ködyö gwatakiŋdye rima i pirit ’yuret na rubaŋgajin ti MATAT i kömit na kemia torumet, a ’yuŋe welet a ŋo na möara paleleŋ ko MATAT yu.

⁷ Nyena a se molu köti tine ’duŋökiŋdyö rubaŋgajin kase a ti lopijoki mulökö logon se a biryeni ’börik gwoso ŋutu kalupök kulo. A ŋilo gwe kase ŋupi a saret lo wurö temba i nyakwariat kase liŋ.

⁸ A do ködyö kulyani ko se adi, Ko lon ŋuto lo kömit na Yisaraele kode lele lo lwaka lo si ’da kase kiden, logon wukiŋdya rubaŋga lo ’yu ’yura ’buluŋ kode a lele rubaŋga,

⁹ a nye tine joŋdya lepeŋ i kömit na kemia torumet i ’duŋökiŋdyö na lepeŋ ko MATAT, a lu ŋuto ködyö riköjine kaŋo i ŋutu kanyit.

Ŋutu a teŋo i nyesu na rima

¹⁰ A ko lele ŋuto lo kömit na Yisaraele kode lo ŋutu logon si ’da kase kiden a lepelok lo a nyesu kunie rima, a nan mo tiŋdi komor nio a naron ko lu ŋuto logon a nyesu rima lo, a nan mo riköddi lepeŋ kaŋo i kiden na ŋutu kanyit.

¹¹ Kogwon ru na mugun gwon i rima; a nan aje tiŋdu ta kine rima i pirit ’yuret na rubaŋgajin loki i toke ’ya na ta; kogwon rima nagon a ru na mugun gwon a tokelesi.

¹² Nyenagon nan aje kulya ko ŋutu ti Yisaraele adi, Lele ŋuto ’bayin kasu kiden logon ködyö nyesu rima, kode lele ŋuto ’bayin logon si ’da kasu kiden a lepetyo lo logon ködyö nyesu rima.

¹³ A ko lon ŋuto lo ŋutu ti Yisaraele, kode a ŋuto logon si ’da kase kiden a lepetyo lo, logon a togoraddu a iŋge tatuja kijakutat kode kwenti logon bubulö nyei lo, a ŋilu ŋuto ködyö ’buköro rima kanyit kaŋo a yiŋge se ko kujöŋ.

¹⁴ Kogwon ru na ŋo liŋ gwon i rima kase; nyenagon nan aje kulya ko ŋutu ti Yisaraele adi, Ta ködyo ti nyesu rima ti nene ŋo na gwon jörun, kogwon ru na ŋo liŋ gwon i rima kase; a ko ŋa lo nyesu lepeŋat a ködyö riköjine kaŋo.

¹⁵ A ŋutu liŋ logon a nyesu ŋo na twan ka ’de, kode ŋo na kokoa ko gwuruŋin, kode nye yuŋwe i jur kode a ŋuto lo si ’da a lepetyo, a ŋilo ŋuto ködyö lalaji boŋgwat kanyit, a tukwöji mugun, a gwe a lut i kulya ti keri tojo ko sömukö; a kirut nye mo gwe a loke.

¹⁶ Nyena ko nye a ko lalaju se kode a ko tukwöju mugun, a nye mo ’doggi ŋonyan nanyit.