Lewi 15 - Bibilia Buk na Ŋun nagon koti luŋu a

Twana logon wowon ko ŋutu i mugunya logon tiŋdu lepeŋat i gwon a lut i kulya ti keri

¹ A MATAT jambi ko Mose ko Arona adi,

² Kulyani ta ko ŋutu ti Yisaraele adi, Ko lele ŋuto gwon ko pioŋ na wowon kanyit i mugun, a ŋina won nanyit gwe a lut i kulya ti keri.

³ A ŋilo gwe a saret lo tolutwan nanyit kogwon ŋina won nanyit na mugun: kweja adi lepeŋ gwon a lut kode pioŋ nyuŋ wowon kanyit i mugun, kode ŋina won na mugun a goggu.

⁴ Dotoesi liŋ na dotori ŋilo ŋuto logon mugun wowon lo ködyö gwon a lut i kulya ti keri, ko ŋo liŋ nagon lepeŋ a si ’dari kune köti gwon a lut.

⁵ A ko ŋa lo ’bo ’yu dotoet nanyit nye ködyö lalaju boŋgwat kanyit, a kwöni kwö, a gwe a lut i kulya ti keri tojo ko sömukö.

⁶ A ko ŋa lo si ’daki i nene ŋo na si ’dari ŋuto logon mugun wowon lo, nye ködyö lalaju boŋgwat kanyit, a kwöni kwö, a gwe a lut tojo ko sömukö.

⁷ A ko ŋa lo ’bo ’yu mugun na ŋuto logon mugun wowon lo, nye ködyö lalaju boŋgwat kanyit, a kwöni kwö, a gwe a lut i kulya ti keri tojo ko sömukö.

⁸ A ko ŋuto logon mugun wowon lo a ’yitakiŋdya ŋuto logon a loke i kulya ti keri lo kamulak, ŋilo ŋuto ködyö lalaju boŋgwat kanyit, a kwöni kwö, a gwe a lut i kulya ti keri tojo ko sömukö.

⁹ A si ’daet na gwon i kusan loki na si ’dari ŋuto logon mugun wowon lo ködyö gwe a lut i kulya ti keri.

¹⁰ A ko ŋa lo ’bo ’yu nene ŋo nagon lepeŋ a si ’daki kata na gwe a lut i kulya ti keri tojo ko sömukö; a nye lo ’doggu kine tito lo ködyö lalaji boŋgwat kanyit, a kwöni kwö, a gwe a lut i kulya ti keri tojo ko sömukö.

¹¹ A ko ŋuto logon mugun wowon lo a ’bo ’yu lele ŋuto ko nye a ko lalaju könisi kanyit a kokwe, a ŋilo ŋuto lo ’bolo lo ködyö lalaji boŋgwat kanyit, a kwöni kwö, a gwe a lut i kulya ti keri tojo ko sömukö.

¹² A sape logon a ’bolo ko ŋuto logon mugun wowon lo ködyö gwalakani gwalaka; a kalabajin liŋ ködyö lalani lala ko pioŋ.

¹³ A ko ŋuto logon mugun wowon lo a tokela i won nanyit na mugun, nyena a nye ködyö kenakiŋdye mugun perok buryo a tokelesi kanyit, a lalaji boŋgwat kanyit; a kwöni kwö i pioŋ na ’do ’dokon, a gwe a loke i kulya ti keri.

¹⁴ A i lor tobudök lonyit a nye ködyö ’dumuŋdye gureki murek kode torela murek ti luguriet, a poŋdi ko MATAT i komor i kötumit na kemia torumet, a tiŋdi se ko koane;

¹⁵ a koane ködyö wukiŋdye lepeŋat; nene a na rubaŋga lo toron a nene gwe a rubaŋga lo ’yu ’yura ’buluŋ; a koane toke ’yi lepeŋ ko MATAT i komor i kulya ti won nanyit na mugun.

¹⁶ A ko kula yuŋweesi a po kaŋo ko lele ŋuto i mugun, a nye ködyö tukwöji mugun nanyit ’bukuluŋ, a gwe a lut i kulya ti keri tojo ko sömukö.

¹⁷ A boŋgwat liŋ se ko gobero liŋ logon kine kula yuŋweesi a ’dukin kata kune ködyö lalani lala ko pioŋ, a gwe a lut i kulya ti keri tojo ko sömukö.

¹⁸ A ko lele ŋuto a doto ko ŋuto nakwan a kula yuŋweesi na poni kaŋo kanyit i mugun, a se murek liŋ ködyö tukwöji mugunya kase, a se gwe a lut tojo ko sömukö.

¹⁹ A ko nene ŋuto gwon kowon na rima kanyit i mugun nagon a ti perok kanyit ti yapa, a nye ködyö joŋgi perok buryo i tolutwan nanyit, a ko ŋa lo ’bo ’yu lepeŋ a ŋilo ŋuto ködyö gwe a lut i kulya ti keri tojo ko sömukö.

²⁰ A ŋo liŋ na dotori lepeŋ i nu diŋit na tolutwan nanyit kune gwe a lut; a ŋo liŋ na si ’dari lepeŋ kune köti gwe a lut.

²¹ A ko ŋa lo ’bo ’yu dotoet nanyit a ŋilu ŋuto ködyö lalaji boŋgwat kanyit a kwöni kwö, a gwe a lut i kulya ti keri tojo ko sömukö.

²² A ko ŋa lo ’bo ’yu nene ŋo na si ’dari nu ŋuto nu, a nye ködyö lalaji boŋgwat kanyit, a kwöni kwö, a gwe a lut i kulya ti keri tojo ko sömukö;

²³ kweja adi ŋilo ŋuto ködyö gwon a lut tojo ko sömukö ko nye a ’bo ’yu dotoet kode nene ŋo na si ’dari nu ŋuto na.

²⁴ A ko lele ŋuto a dotori lepeŋ nu, a tolutwan nanyit na ŋina ŋuto gwe kanyit i mugun, a ŋilo ŋuto ködyö gwe a lut ko perok buryo; a dotoesi liŋ na dotori lepeŋ kunu gwe a lut i kulya ti keri.

²⁵ A ko nene ŋuto gwon kowon na rima perok jore, ama se ’bayin a ti perok ti yapa, kode ko ŋina won nanyit a lwöpöddu ŋerot i diŋit na perok kanyit ti yapa, a nye ködyö yeŋe gwon a lut i kulya ti keri i kilo perok liŋ ti won nanyit.

²⁶ A dotoesi liŋ na dotori nye i perok ti won nanyit kunu ködyö gwe ko lepeŋ gwoso dotoet na tolutwan nanyit; a ŋo liŋ na si ’dari nye kunu ködyö gwe a lut i kulya ti keri, gwoso lut ti diŋit na perok kanyit ti yapa.

²⁷ A ko ŋa lo ’bo ’yu kine tito a nye ködyö gwe a lut, a lalaji boŋgwat kanyit, a kwöni kwö, a gwe a lut i kulya ti keri tojo ko sömukö.

²⁸ Ama ko nu ŋuto a tokela i won nanyit, a nye ködyö kenakiŋdye mugun perok buryo, a kirut a nye gwe a nake i kulya ti keri.

²⁹ A i lor tobudök lonyit a nye ködyö ’dumuŋdye gureki murek kode torela murek ti luguriet, a joŋgi se ko koane yu, i kömit na kemia torumet.

³⁰ A koane wukiŋdye geleŋ a na rubaŋga lo toron a nene na gwe a na rubaŋga lo ’yu ’yura ’buluŋ; a koane toke ’yi lepeŋ ko MATAT i komor kogwon won nanyit nagon tiŋdu lepeŋ i gwon a lut i kulya ti keri na.

³¹ Nyena a ta ködyö geluŋdye ŋutu ti Yisaraele kaŋo i tolutwan nase, an se ko twatwa i tolutwan nase i toluddya na kemia nio na gwon kase kiden na.

³² ŋilo a saret i kulya ti ŋuto logon pioŋ wowon kanyit i mugun, ko a lo ŋuto köti logon kula yuŋweesi a po kaŋo kanyit i mugun lo, a se tolutani ko se;

³³ köti i kulya ti ŋuto nagon a gilö kogwon perok kanyit ti yapa; kweja adi lo saret gwon a lo ŋutu liŋ kode se a ŋutu lulyan kode se a ŋutu nawate nagon gwon ko nene won na mugun, ko köti ŋilo a saret i kulya ti ŋuto logon doto ko ŋuto nakwan nagon a lut.