Lewi 14 - Bibilia Buk na Ŋun nagon koti luŋu a1 A MATAT kulyani ko Mose adi, 2 ŋilo a saret i kulya ti ŋuto lo rimajin i lor tokelet lonyit. Nye ködyö jwe ko koane i komor; 3 a koane ködyö iti kaŋo i mera kata, a nye gwulu ’ye gwulu ’ya. Nyena ko ködyö twanti lo rimajin a tokela ko lu ŋuto i mugun, 4 a koane ködyö saŋi lepeŋat anyen se joŋdya kwen murek nake i kulya ti keri, nagon gwon jorun kune, ko ködini logon gwoso tika, ko boŋgo nator, ko lömuryeje, i kulya ti ŋuto logon totokela lo; 5 a koane ködyö saŋi adi ti nene geleŋ na kine kwen ’duŋökine i lukata na sape i loki na pioŋ na lelek kune. 6 A nye ’dumuŋdye kwenti na gwon jörun na, ko ködini logon gwoso tika, ko boŋgo nator se ko lömuryeje, a nye jurutö-kiŋdye lepeŋat se ko kwenti na gwon jörun na i kunu rima ti kwenti na ’duŋö i loki na pioŋ na lelek kune; 7 a nye gwataddi se daŋin buryo i ŋuto logon totokela kogwon rimajin lo; a nye ködyö tuŋge adi lepeŋ a loke, a nye kölöddi kwenti na gwon jörun na i ’daaddu mu ’diŋ. 8 A ŋuto logon totokela lo ködyö lalaji boŋgwat kanyit, a ’bariŋdi kupir kanyit liŋ, a kwöni kwö, a nye gwe a loke i kulya ti keri; a i mukök na kine kulya a nye lupöni i mera, ama a nye ködyö si ’dani kaŋo i kemia nanyit perok buryo. 9 A i lor toburyo lonyit a nye ’bariŋdi kupir kanyit kaŋo kanyit i kwe; a nye ’bariŋdi kupir kanyit ti nyekem, ko kupir kanyit ti koŋo, ko kupir kanyit liŋ. Nyena a nye lalaji boŋgwat kanyit, a kwöni kwö, a kirut nye gwe a loke i kulya ti keri. 10 A i lor tobudök lonyit a nye ködyö ’dumuŋdye yisi murek mönikön logon ’bak yuyukesi, ko kilolor nanakwan a na kiŋa geleŋ nagon ’bak yuyuket na, ko ’doket na ’bolot nagon a swöt topuökisi musala ti temet nagon a epa na ’bolot na jiö a naliliŋök a ŋola ko welet, se ko malaŋgi duma lo welet logon temuŋdya a loga. 11 A koane logon tukwöju lu ŋuto lo totokela lo tiŋdi lepeŋ se ko kine ŋo liŋ ko MATAT i komor, i kömit na kemia torumet. 12 A koane ködyö ’dumuŋdye lele geleŋ lo yisi mönikön, a wukiŋdye lepeŋ a lo rubaŋga lo lyaŋan, se ko loga lo welet i pirit na geleŋ, a kweji se a rubaŋga lo kwekweya ko MATAT i komor; 13 a lu ŋuto ködyö ’duŋge kilolor i pirit ’duŋet na rubaŋga lo toron se ko rubaŋga lo ’yu ’yura ’buluŋ i pirit nake na rurwan; kogwon rubaŋga lo lyaŋan ködyö a lo koane, gwoso rubaŋga lo toron lo; nye a loke parik lo rurwan. 14 A koane ’dumuŋdye kunie rima ti rubaŋga lo lyaŋan, a sekiŋdye se i kaböbölöŋti na swöt lo lutaten lo ŋuto lo totokela lo, ko i morinet duma lo könin lonyit lutaten, ko i morinet duma lo moköt lonyit lo lutaten. 15 A koane ’dumuŋdye nene welet na gwon i malaŋgi duma na, a nye ’bukökiŋdye lepeŋ i ’dapanit na könin lonyit kadoŋe, 16 a nye sukiŋdye morinet lonyit i welet na gwon i könin lonyit kadoŋe nu, a gwataddi nene welet ko morinet lonyit daŋin buryo ko MATAT i komor. 17 A i nene welet na pituŋdyö kanyit i könin na, a koane sekiŋdye i kaböbölöŋti na swöt lo lutaten lo ŋuto lo totokela lo, ko i morinet duma lo könin lonyit lo lutaten, ko i morinet duma lo moköt lonyit lo lutaten, i loki na rima ti rubaŋga lo lyaŋan kune; 18 a nye sekiŋdye pitönö na welet na gwon ko koane i könin na ko ŋuto lo totokela lo i kwe. A koane toke ’yi lepeŋ ko MATAT i komor. 19 A koane wukiŋdye rubaŋga lo toron, i toke ’ya na ŋuto lo totokela lo kogwon tolutwan nanyit. A i mukök a lu ŋuto ’duŋge rubaŋga lo ’yu ’yura ’buluŋ; 20 a koane wukiŋdye lo rubaŋga lo ’yu ’yura ’buluŋ se ko ’doket na ’bolot i pirit ’yuret na rubaŋgajin loki. Nyena a koane toke ’yi lepeŋ, a nye gwe a loke i kulya ti keri. 21 Ama ko ködyö lu ŋuto a lomeri a nye tine jukin tiŋdu ŋo gwoso kine na ’dinya kine, nyena a ti nye ’dumuŋdye kilolor mönik a lo rubaŋga lo lyaŋan lo kwekweya, anyen tokelari lepeŋ, se ko swöt topuökit geleŋ na temet na epa na ’bolot na jiö a naliliŋök a ŋola ko welet a ’doket na ’bolot, se ko loga lo welet; 22 köti gureki murek kode torela murek ti luguriet gwoso nagon nye jujukin i tiŋdu na; a nene na gwe a na rubaŋga lo toron a nene gwe a na rubaŋga lo ’yu ’yura ’buluŋ. 23 A i lor tobudök lonyit nye ködyö joŋdi lepeŋat a tokelesi kanyit ko koane ni, i kömit na kemia torumet ko MATAT i komor; 24 a koane ködyö ’dumuŋdye kilolor lo rubaŋga lo lyaŋan, ko loga lo welet, a koane kweji se a rubaŋga lo kwekweya ko MATAT i komor. 25 A lu ŋuto ködyö ’duŋge kilolor logon a rubaŋga lo lyaŋan lo, a koane ’dumuŋdye kunie ti kunu rima ti rubaŋga lo lyaŋan, a sekiŋdye se i kaböbölöŋti na swöt lo lutaten lo ŋuto logon totokela lo, ko i morinet duma lo könin lonyit lo lutaten, ko i morinet duma lo moköt lonyit lo lutaten. 26 a koane ’bukö-kiŋdye nene na welet kanyit i ’dapanit na könin lonyit kadoŋe; 27 a nye gwataddi ko morinet lonyit lo lutaten nene welet na gwon kanyit i könin lonyit kadoŋe na daŋin buryo ko MATAT i komor; 28 a koane sekiŋdye nene welet na gwon kanyit i könin na i kaböbölöŋti na swot lo lutaten lo ŋuto logon totokela lo, ko i morinet duma lo könin lonyit lo lutaten, ko i morinet duma lo moköt lonyit lo lutaten, i piritön na tiki ’e rima ti rubaŋga lo lyaŋan kunu; 29 a koane sekiŋdye pitönö na welet na gwon kanyit i könin na ko ŋuto logon totokela lo i kwe, anyen tokelari lepeŋ ko MATAT i komor. 30 A lu ŋuto ködyö wukiŋdye nene na gureki kode na torela ti luguriet, gwoso nagon nye jujukin i tiŋdu na, 31 nene a na rubaŋga lo toron a nene na gwe a na rubaŋga lo ’yu ’yura ’buluŋ, se ko ’doket na ’bolot i pirit na geleŋ; a koane toke ’yi ŋuto logon totokela lo ko MATAT i komor. 32 ŋilo a saret i kulya ti ŋuto lo gwon ko twanti lo rimajin, logon ti jukin tiŋdu rubaŋgajin tokelesi kanyit. 33 A MATAT jambi ko Mose ko Arona adi, 34 Ko ta mo a ’dur i jur lo Kanana logon nan a tiŋdu ta a lomore lu, a nan tiŋdi twanti logon tiŋdu nene kadi i buggi i lu jur losu lomore, 35 nyena a ŋuto logon nu kadi a nanyit lo ködyö poni i takiŋdya na koane adi, Meta gwoso lele twanti kata koyo kadi. 36 Nyena a koane ködyö saŋi adi ti se wuddye wuddya i nu kadi a kokwe na lupöri nye i gwulu ’yu na ŋilu twanti nu, an ŋo liŋ na gwon i nu kadi ko jama adi se a lut i kulya ti keri; a i mukök a koane. lupöni lukata i gwulu ’yu na nu kadi. 37 A nye gwulu ’ye lu twanti; a ko lu twanti gwon i gorom na kadi a kutesi naŋem kode nator, a ko nye a gwulu ’yu adi nye a kutoddu lukata, 38 nyena a koane ködyö lupöni kaŋo i nu kadi tojo i kotumit na kadi, a nye kiŋdi nu kadi ko perok buryo. 39 a koane mo poni köti i lor toburyo lonyit, a meddi meddya; a ko ŋilo twanti nyalakaddu ŋerot i gorom na kadi, 40 nyena a koane saŋi adi ti se lukuru kaŋo ŋurupö lo gwon ko ŋilo twanti kata kulo, ko ti se gubara lepeŋat kaŋo i nene pirit nagon a lut i kaŋo na köji; 41 a nye tiŋdi lukata na kadi i wöworo i mara liŋ, a se ködyö ’bukörö lilinyesi kanyit na wowor se kune kaŋo tojo i nene pirit nagon a lut i kaŋo na nu köji; 42 a se ’dumuŋdye kulye ŋurupö a tiŋdi se i pirit na kilu ŋurupö, a nye ’dumuŋdye kunie lilinyesi a liliŋdye nu kadi. 43 A ko ŋilo twanti a nyöggu pukun i nu kadi, i mukök na lukuddi nye kulu ŋurupö kaŋo nu, ko na wowororikin kadi ko na lilinyöri nye nu, 44 nyena a koane ködyö iti i gwulu ’yu; a ko lu twanti nyalakaddu ŋerot i nu kadi, a ŋilo gwe a buggi lo nyönyööddu i nu kadi; a ŋiŋu kadi gwe a lut i kulya ti keri. 45 A nye ködyö dukaki nu kadi kak, ko ŋurupö kanyit, ko kaden kanyit se ko lilinyesi kanyit liŋ; a nye yekaddi lepeŋat kaŋo i ŋinu köji tojo i nene pirit nagon a lut. 46 Köti ŋuto logon a lupö i nu kadi i diŋit nagon nye nyuŋ gwon kinu nu, lepeŋ ködyö gwon a lut i kulya ti keri tojo ko sömukö; 47 a nye logon a piriki i nu kadi lo ködyö lalaji boŋgwat kanyit; a nye logon a nyesu i nu kadi lo ködyö lalaji boŋgwat kanyit. 48 Ama ko koane a po a gwulu ’ye gwulu ’yu, nyena mete, ko ŋilu twanti a ko nyalakaddu ŋerot, a koane ködyö tuŋge adi nu kadi a nake i kulya ti keri, kogwon ŋilo twanti aje tokela. 49 A nye ’dumuŋdye kwen murek, ko ködini logon gwoso tika, ko boŋgo nator, ko lömuryeje anyen tokelarikin nu kadi, 50 a nye ’duŋge nene kwenti geleŋ i lukata na sape i loki na piŋö na lelek kune, 51 a nye ŋogi ködini logon gwoso tika, ko lömuryeje, ko boŋgo nator, se ko kwenti na gwon jörun na i pirit na geleŋ, a jurutökiŋdye lepeŋat i rima ti kwenti nagon aje ’duŋö na ko i piŋö nagon lelek kunu, a nye gwaddi nu kadi daŋin buryo. 52 A nye toke ’yi nu kadi ko rima ti kwenti, ko piŋö na lelek kunu, se ko kwenti na gwon jörun na, ko ködini logon gwoso tika, ko lömuryeje, se ko boŋgo nator na; 53 a nye kölöddi kwenti na gwon jörun na i ’daaddu kaŋo köji kata tojo mu ’dio; nyena nye ködyö toke ’ya ŋinu kadi sona, a nye gwe a nake i kulya ti keri. 54 Ŋilo a saret i kulya ti twanti lo rimajin, ko i kulya ti ŋo na pupuri. 55 ko i kulya ti buggi lo gwon i boŋgo kode i kadi, 56 ko i kulya ti gwoŋön kode totoset kode ’do ’dotet, 57 anyen kwekiŋdya kode nye ŋona a lut kode nye ŋona a nake. Nye ŋilo saret i kulya ti rimajin. |
Bari Bible © United Bible Societies, 1979.
Bible Society in South Sudan