Lewi 12 - Bibilia Buk na Ŋun nagon koti luŋu a

Tokela na ŋutu wate i kulya ti keri i mukök na ta ’du

¹ A MATAT jambi ko Mose adi,

² Taki ŋutu ti Yisaraele adi, Ko nene ŋuto gwon ko pele, a nye ta ’duuŋdye ŋuro lulalet, nye ködyö gwon a lut i kulya ti keri ko perok buryo, gwoso i diŋit na perok kanyit ti yapa nu.

³ A i lor tubudök lonyit a ŋilo lupudi ködyö taweroni tawero.

⁴ Nyena a ŋina ŋuto ködyö yeŋe gwon ko perok merya musala wot musala i tokela na rima kanyit, a nye ködyö tine ’bo ’yu nene ŋo na gelwe a nake, kode lupö i pirit nake na rurwan tojo ko perok kanyit tokelesi a temakiŋdya.

⁵ Ama ko nye a yuŋunöyö ŋuro nanakwan, a nye gwe a lut ko jimalan murek, gwoso i diŋit na perok kanyit ti yapa nu; a nye ködyö joŋgi perok merya buker wot buker i tokela na rima kanyit.

⁶ A ko perok kanyit tokelesi aje temakiŋdya, kode se a ti ŋuro lulalet kode a ti ŋuro nanakwan, a nye ködyö joŋdi kilolor lo kiŋa geleŋ ko koane ni i kömit na kemia torumet a rubaŋga lo ’yu ’yura ’buluŋ, se ko tore lo luguri, kode a gure a lo rubaŋga lo toron,

⁷ a nye wukiŋdye se ko MATAT i komor, a koane toke ’yi ŋina ŋuto; a nye gwe a nake i won na rima kanyit ŋilo a saret i kulya ti nye na yupuŋdyö ŋuro kode a lulalet kode a nanakwan.

⁸ A ko lepeŋ ti jukin i tiŋdu na kilolor, nyena a ti nye joŋgi gureki murek kode torela murek ti luguriet, geleŋ a lo rubaŋga lo ’yu ’yura ’buluŋ, a lele gwe a lo rubaŋga lo toron; a koane toke ’yi lepeŋ, a nye gwe a nake.