Kenet 9 - Bibilia Buk na Ŋun nagon koti luŋu a

’Depa na rorwe lo Pasaka

¹ A MATAT kulyani ko Mose i yöbu na Sinai, i yapa togeleŋ lo kiŋa tomurek i mukök na yuörö nase kaŋo i jur lo Ejipeto, adi,

² Ti ŋutu ti Yisaraele koŋdi rorwe lo Pasaka i diŋit nanyit na wulwe.

³ I perok puök wot iŋwan ti lo yapa, i sömukö a do ködyö koŋdi rorwe i diŋit nanyit na wulwe; do ködyö koŋdya lepeŋ gwoso i saresi kanyit liŋ lo wurö ko gwoso i jujuwesi kanyit liŋ.

⁴ A Mose takiŋdye ŋutu ti Yisaraele anyen koŋdya rorwe lo Pasaka.

⁵ A se koŋdi rorwe lo Pasaka i yapa togeleŋ, i perok puök wot iŋwan ti yapa i sömukö, i yöbu na Sinai; a nutu ti Yisaraele koŋdi gwoso i ŋo liŋ na saŋi MATAT Mose kunu.

⁶ A kulye ŋutu gwe kata logon a lut i kulya ti keri kogwon se a ’bo ’yu öpu na nuto lo twan, a se tine bulö koŋdya rorwe lo Pasaka i ŋilu lor; a se poŋdi ko Mose se ko Arona i komor i ŋilu lor.

⁷ A kulu nutu pipije lepeŋ adi, Yi a lut i kulya ti keri kogwon yi a ’bo ’yu öpu na ŋuto lo twan; ko nyo yi a tiŋiki i wukiŋdya na MATAT rubaŋga i diŋit nanyit na wulwe i kiden na ŋuto ti Yisaraele?

⁸ A Mose waddi lepeŋat adi, Möŋdi ta möŋdu, nan de yiyiŋ ko MATAT de saŋu ada i kulya kasu.

⁹ A MATAT kulyani ko Mose adi,

¹⁰ Taki ŋuto ti Yisaraele adi, Ko ködyö lele ŋuto losu kode lo nyakwariat kasu a lut i kulya ti keri kogwon a ’bo ’yu öpu na ŋuto lo twan, kode nye gwon pajo i jölö a nye ködyö kona-kiŋdye MATAT rorwe lo Pasaka.

¹¹ Kweja adi se ködyö koŋdya rorwe i yapa tomurek i perok puök wot iŋwan i sömukö; a se ködyö nyesi rorwe ko ambata nagoŋ ’bak kape, ko ’dötilön nagoŋ a koropo na pötwör i pirit na geleŋ.

¹² A se ködyö tine kölökin nene pitönö i möŋdu tojo ko ko ’bure, kode ’beleŋgu lele kuyutyo lonyit; a se ködyö koŋdi rorwe gwoso i saresi liŋ lo wurö i kulya ti Pasaka kulo.

¹³ Ama ŋuto logon a loke i kulya ti keri a gwe ’bayin i jölö lo, ama ko nye a ko koŋdya rorwe lo Pasaka, a nye ködyö riköjine kaŋo ko ŋuto kanyit kiden kogwon nye a ko wukiŋdya MATAT rubaŋga i diŋit nanyit na wulwe; kweja adi nilu ŋuto ködyö ’doggu toron nanyit.

¹⁴ A ko lele lwakatyo mönuŋdyö kasu kiden, a ’deke konakiŋdya MATAT rorwe lo Pasaka, a ti nye koŋdi gwoso i saret lo wurö i kulya ti Pasaka ko gwoso i jujuwesi ti ŋilo rorwe; ta ködyö gwon ko saret geleŋ i kulya ti ŋuto lo si ’da a lepetyo ko i ŋuto lo yuŋwe i jur.

Luru a muggö kemia

¹⁵ A i ŋilu lor lo togwi ’diki ’e kemia ki lu, a luru muŋge kemia nagoŋ a kemia na ŋurupö tökoresi; a i sömukö a luru gwe i loki na kemia tojo ko ko ’bure meta gwoso kimaŋ.

¹⁶ Nyena a gwe sona i diŋitan liŋ; kweja adi luru muggö lepeŋ i tuparan, a luru logon meta gwoso kimaŋ muŋge lepeŋ i tukwaje.

¹⁷ A i diŋitan liŋ nagoŋ luru a wusaji ki i loki na kemia nu, a kirut a ŋuto ti Yisaraele ŋiörö ŋiörö; a i nu pirit na gwo ’di ’e luru nu, a ŋuto ti Yisaraele ’beggi mera nase nyu.

¹⁸ A ŋuto ti Yisaraele ŋiörö ŋiörö i saret lo MATAT, a se köti ’beggi mera nase i saret lo MATAT; a se yeŋe si ’da i mera lukata temba na si ’dari luru i kemia loki nu.

¹⁹ A na mönuŋdye luru i kemia loki perok jore nu, a ŋuto ti Yisaraele ’debbi saret lo MATAT a tine ŋiörö.

²⁰ A i kunie diŋitan a luru gwe ko perok ku ’dik i loki na kemia, a se yeŋe si ’da i mera lukata gwoso i saret lo MATAT; a se ŋiörö ŋiörö köti gwoso i saret lo MATAT.

²¹ A i kunie diŋitan a luru gwe kata suluja i sömukö tojo ko ko ’bure; a nagoŋ luru aje wusaji ki i ko ’bure nu, a se ŋiörö ŋiörö, kode ko nye a si ’da tuparan ko tukwaje, a se ŋiörö ŋiörö i nu diŋit na wusaji ’e luru ki nu.

²² A ŋutu tu Yisaraele yeŋe si ’da i mera a tine ŋiörö, kode luru a karakin i si ’da i loki na kemia perok murek, kode a yapa, kode lwölwöŋ yapa; ama ko nye a wusaji ki a se ŋiörö ŋiörö.

²³ Iŋkoi se ’beggu mera nase i saret lo MATAT, a se ŋiörö ŋiörö i saret lo MATAT. Se a ’debba saret lo MATAT gwoso na saŋi MATAT ko Mose i kutuk nu.