Kenet 36 - Bibilia Buk na Ŋun nagon koti luŋu aSaret i kulya ti toyem a karu 1 A kusik ti kötumit na merenyejin ti midijik ti ŋwajik ti Gilada, logon a ŋuro lo Makir, ŋuro lo Manase, logon a ti kötumitön ti ŋwajik ti Yosepa kulo miju nyona, a kulyani ko Mose i komor, ko i komor na temejik logon a kusik ti kötumitön ti merenyejin ti ŋutu ti Yisaraele; 2 a se kulyani adi, MATAT a sarakin duma likaŋ i tiŋdu na ŋutu ti Yisaraele lo jur a lomore lose kora ko guralan; a MATAT köti iŋge sarakin duma likaŋ i tiŋdu na kak lomore na luŋaser likaŋ Selopekada i ŋwajik kanyit nawate. 3 Ama ko ködyö se a yema ko ŋwajik ti kunie kötumitön ti ŋutu ti Yisaraele, a kak lomore nase mo ’dumajine kaŋo i lomore na komonye kaŋ, a mo ’yalakine i lomore na kötumit na poŋdi se nu; nyena a nye mo ’dumajine kaŋo kora ko guralan i lomore nikaŋ. 4 A na poŋdi kiŋa lyöŋit lo ŋutu ti Yisaraele nu, a lomore nase mo ’yalakine i lomore na kötumit na poŋdi se kata nu; a lomore nase mo ’dumajine kaŋo i lomore na kötumit na monye likaŋ. 5 A Mose saŋi ŋutu ti Yisaraele gwoso i kulyaet lo MATAT adi, Kötumit na ŋwajik ti Yosepa a jambu ’bura. 6 Kine a kulya na saŋi MATAT i kulya ti ŋwajik ti Selopekada kune adi, Ti se yemani gwoso na yeyeji se na, ama se ködyö yema ko karu ti kötumit na monye lose tuŋ. 7 A lomore na ŋutu ti Yisaraele ködyö tine leusaji i na kötumit tojo ko nene; kogwon ŋutu ti Yisaraele liŋ geleŋ geleŋ ködyö ’depa-kiŋdya i lomore na kötumit na komonye kase. 8 Ŋwajik wate liŋ geleŋ geleŋ na ’debba lomore i nene na kötumitön ti ŋutu ti Yisaraele kune ködyö gwon a wate ti karu ti kötumit na monye lose, anyen ŋutu liŋ ti ŋutu ti Yisaraele bubulö ’debba lomoriot ti komonye kase. 9 A nene lomore ködyö gwe ’bayin na leusaji kaŋo i na kötumit tojo ko nene; kogwon kötumitön liŋ geleŋ geleŋ ti ŋutu ti Yisaraele ködyö ’depakiŋdya i lomoriot kase. 10 A ŋwajik wate ti Selopekada koŋdi gwoso na saŋi MATAT Mose nu; 11 a Makela, ko Tiresa, ko Ogela, ko Mileka, ko Noa nagon a ŋwajik ti Selopekada kune iŋge yema ko ŋwajik ti luŋasirik ti monye lose. 12 se yemani i midijik ti ŋwajik ti Manase ŋuro lo Yosepa, a lomore nase yeŋe gwon i kotumit na mede na monye lose. 13 Kilo a saresi ko a jujuwesi nagon MATAT a sarakin ŋutu ti Yisaraele ko Mose i kutuk, i piriton ti Moaba nagon a ’dara nyona ko Yardene Yeriko yu. |
Bari Bible © United Bible Societies, 1979.
Bible Society in South Sudan