Kenet 31 - Bibilia Buk na Ŋun nagon koti luŋu a

Sasanyesi a ropaki ko ŋutu ti Midiyan i kusik, köti ŋo na ryaryakwe a tokela

¹ A MATAT kulyani ko Mose A adi,

² Ropakiŋdye sasanya na ŋutu ti Yisaraele ko ŋutu ti Midiyan i kusik; a i mukök a do mo nukakine ko merenyejin kulök i merete.

³ A Mose takiŋdye ŋutu kulo adi, Tojubbi ta kulye kasu ko tito möriesi, anyen se tu i morö ko ŋutu ti Midiyan, i tiŋdu na ropet na MATAT ko ŋutu ti Midiyan i kusik.

⁴ A ta ködyö soŋdi ŋutu alipan geleŋ geleŋ i ŋor i kötumitön liŋ ti Yisaraele.

⁵ A i alipan ti ŋutu ti Yisaraele, a se ’dumuŋdye alipan geleŋ geleŋ i kötumitön liŋ, kweja adi ŋutu alipan puök wot murek logon a töjupu a ti ŋor.

⁶ A Mose soŋdi se i ŋor, alipan geleŋ geleŋ i kötumitön liŋ i pirit na geleŋ ko Pinasa ŋuro lo koane Elejara, logon tito nake na rurwan se ko burugijin logon kutarikin sörösi gwon kanyit i könin lo.

⁷ A se moroni ko ŋutu ti Midiyan, gwoso na saŋi MATAT Mose nu, a se rembi ŋutu lyan liŋ.

⁸ A se rembi moran ti Midiyan, logon a ko Ewi, ko Rekem, ko Sur, ko Kur, ko Reba, moran mukanat ti Midiyan i pirit na geleŋ ko ŋutu kase lo remo, a se köti rembi Balam ŋuro lo Beor ko ŋor.

⁹ A ŋutu ti Yisaraele momokaddi ŋutu wate ti Midiyan ko lupudiet kase; a se momokaddi toro ’bo kase liŋ, ko teŋon kase liŋ ti yidin, ko tito kase liŋ.

¹⁰ A se ’yurakiŋdye köjinö kase liŋ i piritön na si ’dari se kunu, ko piritön mönoesi kase liŋ köti,

¹¹ a se joŋgi ryakat liŋ se ko ŋo liŋ na momoka kweja adi ŋutu ko toro ’bo.

¹² A se joŋgi ko Mose i komor ko i komor na koane Elejara, ko na momoret na ŋutu ti Yisaraele, ’dupi, ko ŋo na momokwe, ko ryakat, i mera na gwon i piritön ti Moaba nagoŋ a ’dara, na gwon nyona ko Yardene Yeriko yu kunu.

¹³ A Mose, ko koane Elejara, ko kasarak liŋ ti momoret lupödöi köke i rum ko se i kaŋo na mera.

¹⁴ a Mose iŋge woran ko temejik ti kamörök, ko kusik ti alipan se ko kusik ti miajin logon a poŋdya i kita na ŋor kulo.

¹⁵ A Mose pipije lepeŋat adi, Ta a kölökin ŋutu wate liŋ jörun le?

¹⁶ Meddi ta, kine ŋutu a tiŋdu ŋutu ti Yisaraele i toroŋdya ko MATAT i komor, kogwon kulya ti Balam i kulya ti Peor, nyena a twanti iŋge ’dukin i kiden na momoret na MATAT.

¹⁷ Nyenagoŋ tatuje ta ŋwajik lulyan liŋ i kiden na lupudiet, ko tatuje ta ŋutu wate liŋ geleŋ geleŋ nagoŋ a den doto ko ŋutu lyan kine.

¹⁸ Ama kölöki ta kö ’disi liŋ jörun nagoŋ a ko nyuŋ den doto ko ŋutu lyan kine a kasu.

¹⁹ Ko mönuŋdye ta kaŋo i mera perok buryo; a ko ŋa losu logon a tatuja ŋuto, kode ko ŋa logon a ’bo ’yu öpu, toke ’yi ta ’börik i lor tomusala lonyit ko i lor toburyo lonyit.

²⁰ A ta ködyö toke ’yi boŋgwat liŋ, ko ŋo liŋ na tetena ko ŋobero, ko ŋo liŋ na tetena ko kupir ti yidin, se ko tito liŋ na tetena ko kaden.

²¹ A koane Elejara kulyani ko kamo-rök logon aje tu i ŋor kulo adi, ŋilo a saret lo wurö logon MATAT a saŋi Mose adi,

²² Ake ŋo na tetena ko dakap, ko pödö, ko mölwö, ko witiöt, ko bodili, ko risasi,

²³ kweja adi ŋo liŋ nagoŋ kimaŋ ti totum kine, a ta ködyö tulaŋaddi se i kimaŋ lukata a se mo gwe a loke. Ama a se ködyö köti tokelani tokela ko pioŋ nagoŋ lalarikin lut ti keri; a ŋo liŋ nagoŋ kimaŋ totum kune a ta ködyö tulaŋaddi se i pioŋ lukata.

²⁴ A ta ködyö lalaji boŋgwat kasu i lor toburyo lonyit, a ta mo gwe a loke; a i mukök nanyit a ta ködyö lupöni i mera lukata.

Kora na ŋo logon aje momokwe

²⁵ A MATAT kulyani ko Mose adi,

²⁶ Ta se ko koane Elejara ko kusik ti kötumitön ti merenyejin ti na momoret, keŋdi ta ŋo na momokwe kune kweja adi ŋutu ko toro ’bo, ko se muda;

²⁷ ko koraki ta ŋo na momokwe kune i swötön murek; kunie a ti kamörök logon a tu i ŋor, ko kunie a ti na momoret liŋ.

²⁸ Ko gwegwelakiŋdye ta MATAT ropet i kamörök lo tu i ŋor kulo, kweja adi geleŋ i kiden na miajin mukanat, ko i ŋutu, ko i dwönin, ko i kaineki, ko i yidin;

²⁹ ’dumuŋdye ta ŋina ropet i swot lose ko tiki koane Elejara anyen ’dokari MATAT.

³⁰ a ta ködyö ’dumuŋdye i swöt lo ŋutu ti Yisaraele geleŋ lo ’dumwe i merya mukanat liŋ, i ŋutu, ko i dwönin, ko i kaineki, ko i yidin, ko i kisuk liŋ, ko tiki ta se Lewijin logon a katiyuk ti kemia na MATAT kulo.

³¹ A Mose ko koane Elejara koŋdi gwoso na saŋi MATAT Mose nu.

³² Nyena a ŋo na momokwe na pituŋdyö i ŋo na ryakun kamörök kune gwe a yidin alipan miajin buker ko merya buryo wot mukanat,

³³ ko kisuk alipan merya buryo wot murek,

³⁴ ko kaineki alipan merya buker wot geleŋ,

³⁵ ko ŋutu alipan merya musala wot murek liŋ, kine a ŋutu wate nagoŋ a ko nyuŋ den doto ko ŋutu lyan.

³⁶ A swöt logon koraki ŋutu logon a tu i ŋor kulo, gwe a yidin alipan miajin musala ko merya musala wot buryo ko miajin mukanat,

³⁷ a yidin na ropaki MATAT kune gwe a miajin buker ko merya buryo wot mukanat.

³⁸ A kisuk gwe a alipan merya musala wot buker, a ropet na tiki MATAT na gwe a merya buryo wot murek.

³⁹ A kaineki gwe a alipan merya musala ko miajin mukanat, a ropet na tiki MATAT na gwe a merya buker wot geleŋ.

⁴⁰ A ŋutu gwe a alipan puök wot buker, a ropet na tiki MATAT na gwe a ŋutu merya musala wot murek.

⁴¹ a Mose tiŋdi koane Elejara na ropet nagoŋ ’dokari MATAT na, gwoso na saŋi MATAT Mose nu.

⁴² A i kulya ti swöt logon a lo ŋutu ti Yisaraele, logon Mose a korun i swöt lo ŋutu logon a tu i ŋor,

⁴³ a swöt logon a lo momoret gwe a yidin alipan miajin musala ko merya musala wot buryo ko miajin mukanat,

⁴⁴ ko kisuk alipan merya musala wot buker,

⁴⁵ ko kaineki alipan merya musala ko miajin merya mukanat,

⁴⁶ ko ŋutu alipan puök wot buker.

⁴⁷ A i ŋilo swot logon a lo ŋutu ti Yisaraele, a Mose ’dumuŋdye geleŋ i merya mukanat liŋ, ko i ŋutu ko i toro ’bo, a tiŋdi se Lewijin logon a katiyuk ti kemia na MATAT kulo; gwoso na saŋi MATAT Mose nu.

⁴⁸ A temejik ti ŋutu alipan ti kamörök, logon a kusik ti alipan ko kusik ti miajin kulo miju ko Mose nyona,

⁴⁹ a kulyani ko Mose adi, Yi kölipönök kulök aje keŋdya kamörök logon kayaŋ i könisi kulo, a ŋuto likaŋ lo likin gwe ’bayin.

⁵⁰ Yi aje joŋdya ’doket na tiki MATAT, kweja adi ŋo nagoŋ ŋutu liŋ geleŋ geleŋ a ryö kune, gwon a tito nagoŋ a dakap nagoŋ a re ti kidiö, ko re ti könisi, ko katiman jokesi. ko re ti swö, ko re ti murutö, anyen tokelari yi ko ’borik ko MATAT i komor.

⁵¹ A Mose ko koane Elejara wuyuŋdye kase i könisi dakap na tito na ninitö liŋ.

⁵² A temet na dakap liŋ nagoŋ a ’doket na ’doggi se MATAT kune, gwe a sekelejin alipan puök wot ŋuker ko miajin buryo ko merya mukanat. ŋutu logon a kusik ti alipan se ko kusik ti miajin lo tiŋdu.

⁵³ (Kamörök liŋ geleŋ geleŋ a momorakiŋdya ’börik momokat.)

⁵⁴ A Mose ko koane Elejara wuyuŋdye ŋina dakap i temejik ti alipan se ko ti miajin, a joŋdi nye i kemia torumet lukata anyen tiŋdu ŋutu ti Yisaraele i yeyeŋ ko MATAT i komor.