Kenet 30 - Bibilia Buk na Ŋun nagon koti luŋu a

Saresi i kulya ti milyejin ti ŋutu wate

¹ A Mose kulyani ko temejik ti kötumitön ti ŋutu ti Yisaraele adi, Kine a kulya nagoŋ MATAT a sarakin,

² adi, Koŋuto a milyekin tiŋdu MATAT nene ŋo, kode a nyö-kiŋdyö lepeŋ milye iŋgo logon toŋa lepeŋ lo, a nye ködyö tine ’beleŋgu kulyaet lonyit; a nye ködyö koŋdi gwoso i ŋo liŋ nagoŋ lupe kanyit i kutuk kune.

³ A ko neneŋuto a milyekin tiŋdu MATAT nene ŋo, a toŋi mugun ko lele milye iŋgo, na gwoŋdi nye ko monye i ’baŋ a ŋuro ’diet nu,

⁴ a na yiŋge monye kulya ti milye lonyit kode milye iŋgo lo toŋa nu ŋuro lo, a ko monye a yiŋa taliŋ kweja adi nu ŋuro ködyö kökon milyejin kanyit, a ködyö köti koŋdi milyejin liŋ iŋgo lo toŋa lepeŋ kulo.

⁵ Ama ko monye lonyit a teggu lepeŋ i lor lo yiŋge nye lu, a nu ŋuro tine kon milyejin kanyit liŋ kode milyejin kanyit liŋ iŋgo logon toŋa lepeŋ kulo; a MATAT mo pitökiŋdye lepeŋ kogwon monye lonyit a tiŋikin lepeŋ.

⁶ A ko nu ŋuro a joŋa ko lalet i diŋit nagoŋ nye nyuŋ gwon ko milyejin kode ko kulyaesi logon lepeŋ a ramun kanyit i kutuk logon toŋa lepeŋ kulo;

⁷ a lalet lonyit ko yiŋge kine kulya, a yiŋani taliŋ ko lepeŋ i lor lo yiŋge nye lu; a nu ŋuro ködyö koŋdi milyejin kanyit, a kodyo köti koŋdi milyejin kanyit iŋgo logon a toŋa lepeŋ kulo.

⁸ Ama ko ködyö lalet lonyit a tiŋikin lepeŋ i lor lo yiŋge nye kine kulya lu, a nye tu ’baka ’yi milye lo gwon ko lepeŋ, se ko kulyaesi logon nu ŋuro a ramun kanyit i kutuk logon toŋa lepeŋ kulo; a MATAT mo pitökiŋdye lepeŋ.

⁹ Ama karu ’be, kode nakwan na yanya na, lepeŋ ködyö kökon milye kode ŋo liŋ na toŋa lepeŋ kune.

¹⁰ A ko lepeŋ a milyeju ko lalet lonyit i ’baŋ, kode toŋa mugun ko milye iŋgo,

¹¹ a lalet lonyit ko yiŋge kine kulya, a yiŋani taliŋ ko lepeŋ, a gwe a ko tiŋikin lepeŋ; a nuŋuto ködyö koŋdya milyejin kanyit liŋ, se ko milyejin liŋ iŋgo logon toŋa lepeŋ kulo.

¹² Ama ko lalet lonyit a tu ’baka ’yu se asut i lor lo yiŋge nye kine kulya lu, a nuŋuto ködyö tine kon ŋo liŋ na lupe kaŋo kanyit i kutuk i kulya ti milyejin kanyit, kode i kulya ti milyejin iŋgo logon toŋa lepeŋ kulo: lalet lonyit a tu ’baka ’yu lepeŋat, a MATAT mo pitökiŋdye lepeŋ.

¹³ A milyejin liŋ ko milyejin toresi liŋ iŋgo logon nuŋuto a milyeju anyen toko-yogga mugun kulo, lalet lonyit bubulö tiŋdu se i kona, kode lalet lonyit bubulö tu ’baka ’yu se.

¹⁴ Ama ko lalet lonyit a yiŋa taliŋ ko lepeŋ temba i lor, a nye tiŋdi milyejin ti nuŋuto liŋ kode milyejin liŋ iŋgo logon gwon ko lepeŋ kulo adi ti konani kona; nye aje tiŋdu se i kona kogwon nye a yiŋa taliŋ ko lepeŋ i lor lo yiŋge nye kulya kase lu.

¹⁵ Ama ko nye a tu ’baka ’yu se asut i mukök na yiŋge nye kulya kase nu, a lalet ködyö ’doggi toron na nuŋuto.

¹⁶ Kilo a saresi lo wurö logon MATAT a sarakin Mose kulo, i kulya ti ŋo na gwon i kiden na ŋuto lalet ko nakwan nanyit, ko i kiden na monye ko ŋuro nanyit i diŋit na gwoŋdi nye a ŋuro ’diet ko monye i ’baŋ nu.