Kenet 20 - Bibilia Buk na Ŋun nagon koti luŋu a

Pioŋ na wuun kaŋo i lurutat

¹ A momoret liŋ na ŋutu ti Yisaraele ’dure i yöbu na Sin i yapa togeleŋ, a ŋutu kulo si ’dani Kadesa, a Miriama twane twan, a nukakine nyu.

² A pioŋ gwe ’bayin nagoŋ tiki nu momoret, a se momorakiŋdye ’börik i pirit na geleŋ i ŋisa ko Mose ko Arona.

³ A ŋutu kulo woŋe ko Mose adi, Bia nagoŋ yi köju a twatwa na twatwaji luŋasirik kaŋ ko MATAT i komor nu!

⁴ Ko nyo ta a tuwöruŋdyö pepenet na MATAT i na yöbu anyen ko twatwa ni yi ko toro ’bo kaŋ?

⁵ Ko nyo ta a joŋdya yi kaŋo i Ejipeto, anyen tuwöruŋdyö yi tojo ko na pirit naron? Nye ti gwon a pirit na ’bolot, kode a na ki ’biet, kode a na kaden ti binyo, kode a na ludweki ti ruman, köti a pioŋ gwe ’bayin na mamata.

⁶ A Mose ko Arona ŋiörö ŋiörö i komor na nu pepenet a iti tojo i kötumit na kemia ’torumet, a se ’do ’done kak rupu. A minyo lo MATAT puköki i se,

⁷ a MATAT kulyani ko Mose adi,

⁸ ’Dumuŋdye ŋilo ture, a ta ko Arona luŋösur pepenuŋdye ŋinu momoret, a ta saŋi lu lurutat kase i komor, a nye mo tiŋdi pioŋ kanyit, a do toworakiŋdye se pioŋ i lurutat, a do tumaddi ŋina momoret ko toro ’bo kase.

⁹ A Mose ’dumuŋdye ture ko MATAT i komor, gwoso na saŋi nye lepeŋ nu.

¹⁰ A Mose ko Arona pepenakiŋdye ŋina momoret i pirit na geleŋ i komor na lurutat, a nye kulyani ko se adi, Yiŋge ta böŋö ta karerenyak; ti yi tomoraki ta pioŋ i lo lurutat le?

¹¹ A Mose ’doggi könin lonyit ki, a ’biddye lu lurutat daŋin murek ko ture lonyit, a pioŋ wuu kaŋo jore, a momoret möji möju se ko toro ’bo kase.

¹² MATAT kulyani ko Mose ko Arona adi, Kogwon ta a ko yuŋ nan i geluŋdya na nan a loke i konyen ti ŋutu ti Yisaraele, nyena a ta mo tine tolupödöu ŋina momoret i jur logon nan aje tikin lepeŋat lu.

¹³ Kine a pioŋ ti Meriba, pirit nagoŋ ŋutu ti Yisaraele a rerenyari ko MATAT nu, a nye iŋge kweja mugun a loke kase kiden.

Ŋutu ti Edom a renya rukökiŋdyö ŋutu ti Yisaraele i lwöpöddu

¹⁴ A Mose soŋdi luyökie lo gwon Kadesa ko mor lo Edom yu adi, Luŋösurök logon a ŋutu ti Yisaraele lo kulya adi, Do a den daraesi liŋ na pokin kayaŋ ki kune,

¹⁵ adi merenyejin kaŋ köju a tu Ejipeto, a yi iŋge si ’da Ejipeto ko diŋit a najo, a ŋutu ti Ejipeto iŋge konakin yi se ko merenyejin kaŋ arabat,

¹⁶ a yi gwiki ko MATAT, a nye yiŋge gwiesi kaŋ, a nye sunyuŋdye malaikatat a toyuuŋdye yi kaŋo Ejipeto yu; a yi kulo gwe ni Kadesa nagoŋ a nene köji na gwon i ’dutet na lokökori lo kak nasu.

¹⁷ Nyenagoŋ kölöddi yi böŋö i lwöpöddu i jur losu. Yi de ti lwöpöddu i meleseno kode i luköbiöt ti kaden ti binyo, ko köti a yi de tine möju pioŋ ti kidya, ama yi de tiri kiko duma lo mor, a yi de tine girara i kadoŋe kode i lutaten, tojo yi a lwö-ŋöddu kasu i jur.

¹⁸ Ama a ŋutu ti Edom waddi lepeŋat adi, Ta ti lwö-ŋöddu, an yi ko pokin kasu ki i totoggu na ta ko baŋdujin.

¹⁹ A ŋutu ti Yisaraele kulyani ko lepeŋat adi, Yi de tu ko kiko duma, a koyi se ko toro ’bo kaŋ a möju pioŋ kasu a yi mo robbi robba; ama tuŋ ti yi lwöŋöddi ko mok, ŋo nene ’bayin.

²⁰ Ama a se renyani adi, Ta ti lwöpöddu. A ŋutu ti Edom poki jore i mörö ko lepeŋat ko riŋit a duma.

²¹ Nyenagoŋ a ŋutu ti Edom iŋge renya rukökiŋdyö ŋutu ti Yisaraele i lwöpöddu i kak nase, nyena a ŋutu ti Yisaraele wöriŋöddi kaŋo kase.

Arona a twakin i mere Or

²² A momoret liŋ na ŋutu ti Yisaraele ŋiörö kaŋo Kadesa a iti tojo ko mere Or.

²³ A MATAT kulyani ko Mose ko Arona i mere Or, i lokökorit lo jur lo Edom adi,

²⁴ Arona mo nukaki ko merenyejin kanyit i merete, a nye mo tine lupö i lu jur logon nan a tin ŋutu ti Yisaraele lu, kogwon ta a renya saret liŋ i pioŋ ti Meriba.

²⁵ ’Dumu Arona se ko Elejara ŋuro lonyit, ko jo se ki i mere Or;

²⁶ ko ti do rusuŋdye boŋgwat ti Arona, ko tojubbi Elejara ŋuro lonyit ko se; a Arona mo twaki nyu a nukakine ko merenyejin kanyit i merete.

²⁷ A Mose koŋdi gwoso na saŋi MATAT na; a se iti ki i mere Or i komor na momoret liŋ.

²⁸ A Mose rusuŋdye boŋgwat ti Arona kune, a tojubbi Elejara ŋuro lonyit ko se. A Arona twane twan nyu i kwe na mere. A Mose ko Elejara kiyene kak i mere.

²⁹ A na meddi momoret liŋ adi Arona aje twan nu, a kötumit na Yisaraele liŋ gwine Arona ko perok merya musala.