Kenet 13 - Bibilia Buk na Ŋun nagon koti luŋu a

Ŋutu puök wot murek a sonyo i wiŋa na Kanana

¹ A MATAT kulyani ko Mose adi,

² Sonyoddi ŋutu. ko ti se wiŋe jur lo Kanana, logon nan lo tiŋdu ŋutu ti Yisaraele lo; do ködyö soŋdu ŋutu geleŋ geleŋ i kötumitön ti merenyejin kase, kweja adi ŋutu liŋ logon a temejik kase kiden kilo.

³ A Mose soŋdi lepeŋat i yöbu na Paran gwoso i saret lo MATAT, se liŋ gwon a ŋutu temejik ti ŋutu ti Yisaraele.

⁴ A kune gwe a karin kase; i kötumit na Rubena a Samua ŋuro lo Takur;

⁵ i kötumit na Simeona a Sapat ŋuro lo Kori;

⁶ i kötumit na Yuda a Kaleba ŋuro lo Yepune;

⁷ i kötumit na Yisakar a Yiŋala ŋuro lo Yosepa;

⁸ i kötumit na Epuraima a Osea ŋuro lo Nun;

⁹ i kötumit na Benyamina a Paleti ŋuro lo Rapu;

¹⁰ i kötumit na Jebulun a Gaddiele ŋuro lo Sodi;

¹¹ i kötumit na Yosepa (kweja adi i kötumit na Manase) a Gaddi ŋuro lo Susi;

¹² i kötumit na Dan a Amiele ŋuro lo Gemali;

¹³ i kötumit na Aser a Setur ŋuro lo Mikaele;

¹⁴ i kötumit na Napatali a Nakebi ŋuro lo Wopesi;

¹⁵ i kötumit na Gada a Guele ŋuro lo Maki.

¹⁶ Sekine karin ti ŋutu lo son Mose i wiŋa na lu jur kulu. A Mose gwije Osea ŋuro lo Nun a Yosua.

¹⁷ A Mose sonyoddi lepeŋat i wiŋa na jur lo Kanana, a kulyani ko lepeŋat adi, Iti ta tojo ko jur lo loki, ko iti ta tojo i jur logon a merya,

¹⁸ a ta mo meddi ko lu jur gwon ada, kode ŋutu logon si ’da nyu kulu a kaŋajin kode a lomunyak, kode se jore kode se ku ’dik,

¹⁹ köti kode lu jur lo si ’dari se lu a lo ’but kode a loron, köti kode köjinö na si ’dari se kunu a kemialan kode gwon ko mariŋan,

²⁰ köti kode lu jur a rit kode a dyaŋ, köti kode kaden kata nyu kode ’bayin. Gwe ta ko topurwan, ko baruŋdye ta kulye ludweki ti lu jur. Kilu perok köju a waŋesi ti ludweki ti binyo.

²¹ Nyena a ŋutu kulo iti tu, a se wiruŋdye lu jur suluja i yöbu na Sin tojo ko Rekoba, nyona ko lupet na Kamat.

²² A se iti tojo i jur lo loki, a se poŋdi tojo Keberon; a Akiman ko Sesai se ko Talemai logon a nyakwariat ti Anak kulo gwe nyu. (Ama a Keberon iŋge ’dukö kiŋajin buryo a kokwe na ’duköri Sona Ejipeto yu nu.)

²³ A se ko ’dure i loro Esekola, a nyu se tukuŋdye kak nene kene nagoŋ ko kwe geleŋ na ludweki ti binyo, a se diröddi lepeŋ; a se köti joŋdi kulye ludweki ti ruman ko ti ki ’biet.

²⁴ A nu pirit gwiyöni a loro Esekola kogwon nu kwe na ludweki ti binyo na tukun ŋutu ti Yisaraele kak nyu nu.

²⁵ A i mukök na perok merya iŋwan, a se yitwene yitwe i wiŋa na lu jur.

²⁶ A se iti tu a ’dure ko Mose ko Arona ko momoret liŋ na ŋutu ti Yisaraele i yöbu na Paran Kadesa yu; a se jakiŋdye lepeŋat lore se ko momoret liŋ, a kwekiŋdye se ludweki ti lu jur.

²⁷ a se takiŋdye Mose adi, Yi aje ’dur tojo i jur lo soŋdi do yi kata lu; ko köti le ko siwatat ’do ’dokon nyu, makilo ludweki kanyit.

²⁸ Ama nagoŋ ŋutu lo si ’da i lu jur kulu a kaŋajin, köjinö kase gwon ko mariŋan, ko a nagalaŋak parik; a yi iŋge met nyakwariat ti Anak nyu.

²⁹ A ŋutu ti Amalek si ’dani i jur lo loki; ŋutu ti Kiti, ko ti Yebusi, ko ti Amori sisi ’datu i jur logon a merya; a ŋutu ti Kanana si ’dani nyona ko tör na ’balaŋ ko i swöt lo diŋö ko Yardene.

³⁰ A Kaleba toyiŋaji kulu ŋutu ko Mose i komor, a kulyani adi, Ti yi iti ta ’de ’de wulek i morga na jur; kogwon yi jojo te ’ya lepeŋat.

³¹ Ama a ŋutu logon a tu ko lepeŋ kulo kulyani adi, Yi ti jukin tu i mörö ko kulu ŋutu; kogwon se a kaŋajin lwölwöŋ yi.

³² a se jakiŋdye ŋutu ti Yisaraele lore loron lo jur logon se aje wiŋa lu, adi, Jur logon yi a tu lukata i wiŋa na lepeŋ lu, gwon a jur kanyöönit lo ŋutu logon si ’da nyu kulu; a ŋutu liŋ logon yi a met nyu kulu gwe a loyurumök.

³³ Nyu köti a yi iŋge met ŋutu lojo lo lilimba (logon a ŋwajik ti Anak lo yuŋwe i ŋutu lojo lo lilimba); ama kayaŋ i metet a yi gwe gwoso ködipön, a yi köti gwe sona kase i metet.