Katokuönit 4 - Bibilia Buk na Ŋun nagon koti luŋu a

¹ Köti a nan iŋge met konesirudesi liŋ nagon a kitarikin i kak ni. A nan meddi politan ti ŋutu lo ruda, logon ’bak kasukak! Riŋit gwon ko karudak i swot, kudyakan a kasukak ti ŋutu lo ruda gwe ’bayin.

² A nan kurundye adi ŋutu logon aje twatwa a kalyoŋok Iwolwoŋ ŋutu lo gwogwolor logon nyuŋ jorun kulo;

³ ama bia parik ŋutu logon a ko nyuŋ yuŋwe Iwolwoŋ se liŋ murek, kogwon se a ko nyuŋ meddya konesi narok na kitarikin i kak ni kune.

⁴ A kirut nan meddi daraesi liŋ ko tomirian liŋ na kita adi se pukun i tobe na ŋuto ko marate lonyit. Kine ŋo koti a köpuröt kana ko a köbuŋöt logon ti bulö moka.

⁵ Ŋuto lu ’böŋ kalabbu könisi kanyit a nyesi mugun nanyit.

⁶ Bia a na ’but ko könin jore ko taliŋ lwölwöŋ könisi murek logon jore ko daraesi ti kita ko a köbuŋöt logon ti bulö moka.

⁷ Köti a nan meddi ŋo nagon a köpuröt kana na kitarikin i kak ni:

⁸ kweja adi ŋuto logon ’bak karu kode ŋuro kode luŋaser, ama a kitani diŋitan liŋ ’bak ’dutet, a konyen kanyit tine yimönö ko tukwörienjin, a nye tine pija mugun adi, Nan kitakindya ŋa a nan renyani tulyöŋgu mugun ko nan kwe? Kine ŋo koti a köpuröt kana ko a dara na mugun.

⁹ A na ’but i gwon murek lwölwöŋ gwon geleŋ, kogwon se wuju ropet na ’but i kita nase.

¹⁰ Kogwon ko lele a ’doro a lele lo de ’bilundye marate lonyit ki; ama ko ŋuto lo gwon geleŋ a ’doro a gwe a delya kanyit kogwon ŋuto ’bayin lo ’bilundya lepeŋ ki.

¹¹ Köti ko ŋutu murek a piriki kak i pirit na geleŋ a mugunya kase yuke yuk, ama ŋuto geleŋ bubulö toyuggö mugun ada?

¹² Ko ŋuto gwon geleŋ miriku lonyit tete lepeŋ, ama ko se gwon murek se bubulö te ’ya. Pata nagon a ŋudula musala na ti bulö gindya ’de ’de.

¹³ Bia titinti logon a lomeri ko a lokoŋ lwölwöŋ mor logon a modoŋ ko a lu ’böŋ logon ti ’bön yiŋga jujuwesi.

¹⁴ Ŋuto logon a kölwe kaŋo i kadi rereket bubulö gwon a mor, iŋkoi ma ’di kanyit i tumatyan na na diŋit nye köju a yuŋwe a lomeri.

¹⁵ Nan aje met ŋutu liŋ lo gwogwolor logon wörö i kolor, a nan meddi pirit na ŋilo ŋuto i ruta ko lele titinti,

¹⁶ a nye ŋoki a kasaranit lo ŋutu jore logon ’dutet nase ’bayin. Ama se lo ŋo i mukök kilo mo ti lyöŋön ko lepeŋ. ’Diri gwak kine ŋo köti a köpuröt kana ko a köbuŋöt logon ti bulö moka.