Katokuönit 2 - Bibilia Buk na Ŋun nagon koti luŋu a

¹ A nan kulyani ko mugun adi, Ana ’but, ti nan möŋi lyöŋön; ti nan tulyöŋgi mugun. Ama mete, kine ŋo köti a köpuröt kana.

² A nan kulyani adi, Kita na kwekweni ko lyöŋön a ŋo na tumalyan. ’Bulit na nyola a nyo?

³ A töili liŋ ga ’yi ga ’yu ko nan tulyoŋ mugun ada ko binyo, (kudyakan töili liŋ nyuŋ nyömöddu nan ko köŋon,) köti ko nan ’depakindya i tu ’böŋön ada, anyen nan böŋö denundya ko ŋo na ’but a nyo nagon ŋutu ködyö kokoni na kak, i perok ku ’dik ti gwiliŋisi kase.

⁴ Nan a kondya kitajin dumalak; nan a ’dukökindyö mugun kadijik a ’yuddi luköbiöt ti kaden ti binyo;

⁵ a nan kurukindye mugun meleseno ko meleseno ti kaden, a nan ’yuddi kata gweyarijin liŋ ti kaden logon raradan ludweki.

⁶ A nan tetenakindye mugun jora anyen popokarikin rudu lo kaden lo ’du ’duŋö.

⁷ A nan gwöröni ’dupi lyan se ko nawate, nan kata ko ’dupi logon yuŋwe köyö midi; nan köti kata ko tukwörien duma na kisuk ko na yidin, lwölwöŋ ŋutu liŋ logon köyö ŋerot Yerusalema yu kulu.

⁸ Nan köti a pepeŋ akindya mugun pödö ko dakap se ko tukwörienjin ti moran ko ti mödöriajin; a nan jondi kayolok lyan ko nawate, ko ŋo liŋ nagon ŋuto ’de ’deggi kune.

⁹ Nyena a nan iŋge kwön parik, lwölwöŋ ŋutu liŋ logon köju köyö ŋerot Yerusalema yu kulu; köti a koŋon nio yeŋe köyö.

¹⁰ Nan a ko teŋgu mugun i ŋo nagon konyen kwe ’de ’deggi; a nan gwe a ko göja mugun i ŋo nagon töili liŋ a lyöŋgi kune, kogwon töili liŋ a ryeju lyöŋon i ŋo liŋ na kitaun nan kune, a ŋina gwe a ropet nio na kitajin kwe liŋ.

¹¹ A kirut nan meddi ŋo liŋ nagon nan a kitaun ko könisi kwe, se ko dara nio na kita, mete, se liŋ a köpuröt kana ko a köbuŋöt logon ti bulö moka, a nene ŋo gwe ’bayin na rye ko ’bulit i kita na kitarikin i kak ni.

¹² A nan tindi mugun i meddya na koŋon ko na tumalyan ko na tu ’böŋön; kogwon ŋuto lo ruddya mor lo bubulö kondya nyo? Tuŋ ŋo nagon köju aje kona.

¹³ A kirut a nan meddi adi koŋon lwölwöŋ tu ’böŋön gwoso na lwöŋgi parara mudwe na.

¹⁴ Konyen ti ŋuto lokoŋ gwon ŋa, ama a ŋuto lu ’böŋ wöröni i mudwe; kudyakan a nan meddi adi ŋo geleŋ kata na ’dukin i se liŋ murek.

¹⁵ Nyena a nan kulyani ko mugun adi, ŋo na ’dukin i ŋuto lu ’böŋ na mo köti ’du ’dukin köyö; ko sona ’bulit a nyo i gwon nio a lokoŋ parik? A nan kulyani ko mugun adi, ŋina ŋo köti a köpuröt kana.

¹⁶ Kogwon ŋuto lokoŋ gwon jojo ko ŋuto lu ’böŋ a tine yeyeŋ ŋupi, a i perok lo popo a se liŋ mo böŋörikin böŋörikin asut. A, ŋuto lokoŋ twan ada jojo ko ŋuto lu ’böŋ!

¹⁷ Nyena a nan mandi gwolor nio, kogwon ŋo na kitarikin i kak ni kune totomi nan; kogwon kine ŋo liŋ a köpuröt kana ko a köbuŋöt logon ti bulö moka.

¹⁸ A nan mandi kitajin liŋ nagon nan a kitari i kak ni kune, kogwon nan ködyö kökölökin se i ŋuto logon mo ruddya nan;

¹⁹ a ŋa lo dendi kode nye ŋona mo gwon a ŋuto lokoŋ kode a lu ’böŋ? Ama a nye mo gwe a duma iŋgo liŋ logon nan a kitaun ko a kitari koŋon nio i kak ni. Kilo ŋo köti a köpuröt kana.

²⁰ Nyena a nan suluje doddya ’bak yenet i dara nio liŋ nagon nan a kitari i kak ni na,

²¹ kogwon i nene diŋit ŋuto logon kita ko koŋon ko kurundyö se ko tobodwan lo ködyö kölökindyö ŋo liŋ anyen tulyöŋgu ŋuto logon a ko kita se lo. Kilo ŋo köti a köpuröt kana ko a lorok parik.

²² ŋuto gwon ko nan ropet i kitajin kanyit liŋ ko i daraesi nagon nye a kitari i kak ni kune?

²³ Kogwon perok kanyit liŋ a ti ŋoŋga, a kita nanyit gwe a na dara; ma ’di kwaje a töili lonyit tine yukan. Kine ŋo köti a köpuröt kana.

²⁴ Nene ŋo na ’but ’bayin nagon ŋuto kökon lwölwöŋ nagon nye ködyö nyenyesu kode mömöju, a ryeji lyöŋöni ŋo lo kitaun nye kulo. A nan meddi adi kilo ŋo köti po ko ŋun i könin;

²⁵ kogwon ko lepeŋ ’bayin ŋa logon bubulö nyesu kode gwon ko lyöŋön?

²⁶ Kogwon ŋun tindu koŋon ko dendya na kulya se ko lyöŋön i ŋuto lo tulyöŋgu lepeŋ; ama a nye tindi katoronyanit kita na pependya se ko na ’du ’yu na tukwörien, tuŋ anyen kine ŋo tiki ŋuto logon tulyöŋgu nye ŋun. Kine ŋo köti a köpuröt kana, ko a köbuŋöt logon ti bulö moka.