Kagai 2 - Bibilia Buk na Ŋun nagon koti luŋu a

Kwelen na kadi ludukotyo na MATAT

¹ A i kiŋa tomurek lo mor Dario, i perok merya murek wot geleŋ ti yapa toburyo, a kulyaet lo MATAT lupuŋdye ko nebi Kagai i kutuk adi,

² Pine ko Jerubabela ŋuro lo Salatiele modir lo Yuda, ko Yosua ŋuro lo Yosadak koane duma, ko pitono ti ŋutu liŋ adi.

³ Ko ŋa logon kasu kiden logon koju a met na kadi i kwelen nanyit na ’beron? Ta sopinana a met lepeŋ gwon ada? Ta ti met nye a ŋo kana le?

⁴ Nyenagon nan MATAT lo kulya adi, Jerubabela, gwe do a iŋgo; Yosua nuro lo Yosadak koane duma, gwe do a iŋgo; koti nan MATAT lo kulya adi, Ta nutu liŋ ti lo jur, gwe ta a iŋgo; iŋkoi, nan MATAT lo kurumi lo kulya adi, Kitani ta kita, kogwon nan lo gwon ko ta,

⁵ gwoso na milyekiŋdye nan ta nu i diŋit na pöri ta kaŋo i Ejipeto nu. Mulökötyo lio yeŋon kasu kiden; ko kujono ta.

⁶ Kogwon nan MATAT lo kurumi lo kulya adi, I diŋit a na ’dit koti a nan de boboŋdi ki ko kak ko tor se ko kak nateyon;

⁷ a nan de boboŋdi gweyajin liŋ ti ŋutu, a tukworienjin ti gweyajin liŋ mojwenijwe, a nan mo to-joreji ŋina kadi ko po lokwekwelen, nan MATAT lo kurumi lo kulya.

⁸ Podo a kwe ko dakap a kwe, nan MATAT lo kurumi lo kulya.

⁹ A kwelen na na kadi ludukotyo mo gwe a duma Iwolwoŋ kwelen na kadi na koju nu, nan MATAT lo kurumi lo kulya, a nan mo tiŋdi taliŋ i na pirit, nan MATAT lo kurumi lo kulya.

Nebi pipija koanejin

¹⁰ A i kiŋa tomurek lo Dario, i perok merya murek wot iŋwan ti yapa tobu-ŋwan, a kulyaet lo MATAT lupuŋdye ko nebi Kagai i kutuk adi,

¹¹ MATAT lo kurumi lo kulya adi, Pine koanejin ko saret lo kine kulya gwon ada, adi,

¹² Ko lele ŋuto a ’doggu lokore nake na rurwan i lukata na boŋgo nanyit najo, a kume lonyit lo boŋgo iŋge ’bo ’yu ambata kode luparate, kode binyo, kode welet, kode lele gweyari lo kinyo, ŋina ŋo na ’bolo na ŋona wowora a nake na rurwan le? A koanejin waddi adi, ’Bayin.

¹³ A Kagai pipije adi, A ko lele ŋuto logon a toluta ko öpu na ŋuto logon aje twan lo iŋge ’bo ’yu nene na kine ŋo, a ŋina po na ’bolo na ŋona wowora a lut te? A koanejin waddi adi, Iŋkoi, wowora a lut.

¹⁴ A Kagai kulyani adi, MATAT lo kulya adi, Kanyit i metet kilo ŋutu gwon sona, ko lo jur, se ko kitajin kase liri; a po nagon se a wukin i na pirit kune gwe a lut.

¹⁵ Suluja i lo lor tojo ko ŋerot, yeyeji ta ko kulya kasu gwon ada a kokwe nagon lele ŋurupit ’dikikine i lele ŋurupit i kadi na MATAT.

¹⁶ Koti a kokwe na kine kulya nu, ko lele ŋuto a poŋdya i ’dome lo ’bolot logon kodyo temuŋdya a temesi merya murek ama a ko gwe a puök ka ’de; a ko lele ŋuto a poŋdya i mu ’da-jin ti binyo i joŋga na temesi merya mukanat a nye ko ryeŋdi a merya murek ka ’de.

¹⁷ Nan aje gwut ta se ko ŋo liŋ lo kur ta kilo ko kobuŋot toliliket, ko buggi, se ko torok ti kudu; ama a ta gwe a ko lopukuŋdyo koyo ni, nan MATAT lo kulya.

¹⁸ Yeyeji ta suluja i lo lor tojo ko ŋerot, suluja i perok merya murek wot iŋwan ti yapa tobuŋwan. Suluja i lu lor logon ŋutu ’boggi togwi’diesi ti kadi nio na MATAT, yeyeji ta kine kulya adi,

¹⁹ Kinyo nyuŋ kata i gugu le? A kaden ti binyo, ko ti ki ’bi, ko ti ruman, ko ti jeitun nyuŋ ti radan le? ’Bayin sona, suluja i lo lor tojo ko ŋerot nan mo ’bo ’boro ta.

MATAT a wuluŋdyo Jerubabela

²⁰ A kulyaet lo MATAT poki ko Kagai daŋ tomurek i perok merya murek wot iŋwan ti ŋilo yapa adi,

²¹ Tambi ko Jerubabela modir lo Yuda adi, Nan gwe nyona ko böŋdu na ki ko kak,

²² ko i sopuggo na si ’daesi ti tumatya-njin; nan gwe nyona ko tukaŋu na riŋiton ti tumatyanjin ti gweyajin ti ŋutu, ko i sopuggo na arabiajin lo jijiko se ko ŋutu lo joŋga se kulo; a kusanjin se ko kajoŋak kase mo ’do ’done kak a twatwa, luŋasirik kase lo tatuja ko baŋdujin.

²³ Nan MATAT lo kurumi lo kulya adi, I lu lor a nan mo joŋgi do Jerubabela koliponit lio, ŋuro lo Salatiele, nan MATAT lo kulya, a nan mo rusu-kiŋdye do koyo i morinet gwoso kati-manti joket; kogwon nan aje wulun do. Kilo a kulyaesi kwe ti MATAT lo kurumi.