Jakaria 11 - Bibilia Buk na Ŋun nagon koti luŋu a

Ŋutu temejik karudak mo nyökwe kak

¹ Do Libanon, ŋane ŋa kötumi. A tön kunök, anyen kimaŋ böŋö tototum kaden kulök logon gwoso tika!

² Do ködini saru, luluje lulujö kogwon ködini logon gwoso tika lo aje ’doro kak, kogwon kaden lokwekwelen aje körö! Ta kaden ti Basan ti mian, luluje ta lulujö kogwon yöbu nagon a rudu aje toko kak!

³ Yiŋge ta kayukuk i lulujö, kogwon minyo lose aje körö! Yiŋge ta kömiruöt i rumön, kogwon yöbu na Yardene aje körö!

Kayukuk logon ’bak ’bulit

⁴ MATAT Ŋun lio lo kulya adi, Yuggi teŋ na yidin nagon tatatua.

⁵ A kagwörök kase ’duŋge se ’bak kujönö, a katugwörök kase kulyani adi, Ti MATAT purani pura kogwon yi gwe a kwörinikö. A kayukuk kase tine won konyen ko se.

⁶ Kogwon MATAT lo kulya adi, Nan mo köti tine won konyen ko ŋutu ti lo jur. Nan mo pakiŋdya ŋutu liŋ geleŋ geleŋ i könisi ti kayukuk kase, ko i konisi ti moran kase; a se mo köŋi na kak, a nan mo tine lwökuŋdyö nene ŋo kase i könisi.

⁷ Nyena a nan nebi yukukiŋdye katu-jarak ti yidin nu teŋ na yidin nagon tata-tua. A nan ’dumuŋdye turya murek, a nan gwije lele a Töili lo ’but, a gwije lele a Katomoranit, a nan yuggi teŋ na yidin.

⁸ A nan riköddi kayukuk musa-la i yapa geleŋ. A töili liŋ gwe ti ŋoŋga kulya ko se, a kata nase köti gwe pötwör ko nan.

⁹ a nan kulyani ko yidin adi, Nan mo ti yuggu ta. Nye nagon ’dek twan na, ti nye twane twan; nye nagon ’dek tukara na, ti nye tukara-ni tukara; ko ti se nagon a pituŋdyö kine tunyeni ko ’börik.

¹⁰ A nan ’dumuŋdye ture liŋ lo luŋu a Töili lo ’but lo, a nan ’deŋgi lepeŋ, adi i ’beleŋgu na tomoret na tetenakin MATAT i gweyajin ti ŋutu na.

¹¹ A nye iŋge ’beleŋo i ŋilu lor, nyena a katujarak ti yidin logon meme-ddya nan kilo iŋge kurun adi ŋilo a kulyaet lo MATAT.

¹² A nan kulyani ko se adi, Ko meta a na ’but kasu, a ta tiki ta nan ropesi kwe; ama ko ’bayin sona, ti gwe. A se temuŋdye pödöjin merya musala a ropesi kwe.

¹³ A MATAT kulyani ko nan adi, Gubara ŋina ropet nakwekwelen nagon se a ropakin do na i pirit ’delet na gurut. Nyena a nan ’dumuŋdye kine podöjin merya musala, a nan gubakiŋdye se i pirit ’delet na gurut i kadi na MATAT.

¹⁴ A nan ’deŋgi lele ture liŋ lo luŋu a Katomoranit lo, adi i ’beleŋgu na toluŋaseran i kiden na Yuda ko na Yisaraele.

¹⁵ A MATAT kulyani ko nan adi, Köti ’dumuŋdye tito yukisi ko mira-kiŋdye kayukunit logon ’bak ’bulit.

¹⁶ Kogwon mete, nan MATAT gwon i ’bilikiŋdya kayukunit i ŋilu jur logon ti yeyeju yidin nagon a likin kune, a nye tine ga ’yu yidin nagon a rekin, kode toke ’ya yidin nagon a bata, kode tunyeju se nagon a na ’but, ama a nye nyesi lokore na yidin nagon a napir, a iŋge koko ’yu ma ’di sulukwakan kase,

¹⁷ Wöidiö kayukunit logon ’bak bulit, logon a kölökiŋdyo yidin! Baŋdu mo totok könin lonyit se ko koŋe lonyit lutaten; a könin lonyit mo batani bata asut, a koŋe lonyit lutaten mo gwe a mo ’doke asut.