Eyobo 3 - Bibilia Buk na Ŋun nagon koti luŋu a

Eyobo a delya yuŋwe nanyit

¹ A i mukok na kine ŋo, a Eyobo ŋaji kutuk nanyit a suluje lombu lor lonyit yuŋweet.

² A nye kulyani adi,

³ Ti lor lo yuŋwe ’i nan, ko ti tukwaje logon kulya adi, Ŋuro lalet a pikarikin ko ŋote i pele lu, ti tukarani tukara!

⁴ Boŋo ti ŋilu lor gwe a mudwe; ti ŋun lo gwon ki gwe ti yeye lepeŋ, ti kolor gwe ti nyerun kata.

⁵ Ti kak gwe a mudwe logon adi ’dii, ko ti ŋilu mudwe riŋuŋdye lu lor a lose, ti ’dikolo muŋge lepeŋ, Ti kak gwe a narwo ’de ’de kijek.

⁶ Ti mudwe logon adi ’dii moke ŋilu tukwaje; ti lepeŋ gwe ti moraki i perok ti kiŋa, ti lepeŋ gwe ti kenaki i kenet na yapala.

⁷ Iŋkoi, ti ŋwajik gwe ti yuŋwe i ŋilu tukwaje. ti woŋon na lyoŋon gwe ti yiŋa kata.

⁸ Ti ŋutu logon lombu tuparan, logon jujukin toŋiju ŋilu Wum, ti se lomi lom ŋilu tukwaje.

⁹ Ti kaser ti kwökö gwe ti kobbu; ti ŋilu tukwaje yeŋdi waran na kak, ama a gwe ’bayin, ko ti gwe ti meddya baŋun na kak;

¹⁰ kogwon nye a ko ’dija pele na yaŋgo, a gwe a ko muggo konyen kwe i meddya na yöyöŋesi.

¹¹ Ko nyo nan a ko twan na yuŋwe ’i nan nu? Ko nyo nan a ko karan na lupe ’i nan kaŋo koyaŋgo i pele nu?

¹² Ko nyo nan a topiriki koyaŋgo i puŋdiat? Ko nyo nan a tiki i nöggu?

¹³ Kogwon ko kodyo nan a twan, nan kodyo a topitiki kak, a gwe taliŋ; a nan kodyo aje doto, a gwe i yukan,

¹⁴ i pirit na geleŋ ko moran ko kajujuwak kase, logon koju si ’da kak ni, logon a nyoggu ’dukokiŋdyo ’borik murwoki,

¹⁵ se ko kimak logon gwon ko dakap, logon a tojoreju kadijik kase ko podo.

¹⁶ Ko nyo nan a ko ’dela gwoso ŋuro lo yoyope, logon a ko temakiŋdya i ta ’due nanyit, gwoso lupudi logon a ko meddya parara?

¹⁷ Nyu ŋutu lorok ’bayin i ’do ’do ’ya na ŋutu koti, a ŋutu lo dara gwe i yukan yu;

¹⁸ nyu ŋutu lo rereka gwon a lui i pirit na geleŋ, lepeŋat ti yiŋ gworo lo duma lose lo ri ’dikiŋdya se i kita;

¹⁹ lo ’di ’dik ko dumalak gwon nyu, a ’dupiet gwe a luitot i könin lo duma lonyit.

²⁰ Ko nyo ŋuto logon ŋoŋoŋga a tiki i meddya na parara? Ko nyo ŋutu logon si ’da ko delya a duma kilo a tiki ru?

²¹ A se yöŋöni twan, ama a gwe ’bayin, a se ga ’yi nye lwolwoŋ ŋutu lo ’bogga kak i ga ’yu na tukworien-Jin na ’dela.

²² A se lyoŋi lyoŋon parik, a iŋge nyola na ryeji se dili nuket nu.

²³ Ko nyo parara a tiki ŋuto logon ti met kiko lonyit, logon Ŋun a gom ko mariŋ?

²⁴ A yukan na delya gwe gwoso kinyo liŋ ka ’de, a ’du ’duatu nio ’bukuŋdye kaŋo gwoso pioŋ,

²⁵ kogwon ŋo nagon nan a kujo-nori parik kune aje pokin koyo loki, a ŋo nagon nan a rigwököri kune aje ’dukin koyo.

²⁶ Nan yo yoŋo, nan ti si ’da ’bura, taliŋ ’bayin koyo ama delyaesi kata. Elipaja a ririŋga Eyobo