Esetere 3 - Bibilia Buk na Ŋun nagon koti luŋu a

Aman ’dek mwon ko Yudayaki i tatuja na se liŋ

¹ A gwe sona i mukok na kine kulya, a mor Akasuwero toduma ’yi Aman ŋuro lo Amedata ŋuto lo Agaga, a ’dulukiŋdye lepeŋ ki, a tiŋdi lepeŋ a duma lo temejik liŋ ti miri logon gwon ko lepeŋ kulu.

² A kakitak liŋ ti miri na mor logon gwon i kötumit lupet na mor kulu dulakine kak a twoji Aman; kogwon mor a saŋu sona i kulya ti lepeŋ. Ama a Mordekai gwe a ko dulaki kak i twoju na lepeŋ.

³ Nyena a kakitak ti miri na mor logon gwon i kotumit lupet na mor kulu pipije Mordekai adi, Ko nyo nagon do a laŋgu saret lo mor?

⁴ A gwe sona, temba i perok liŋ, a se gwe i kekeŋdya ko lepeŋ, ama a nye tine ’bön yioga kulya kase, a lepeŋat takiŋdye Aman anyen se meddya kode Mordekai ŋona bubulo ruköki renyesi kanyit; kogwon lepeŋ a takiŋdya se adi nye a Yudayakityo.

⁵ A Aman ko yiŋge adi Mordekai a ko dulaki kak i twoju na lepeŋ, a Aman iŋge woran parik.

⁶ Ama a lepeŋ yeyeji adi ’bulit ’bayin i tatuja na Mordekai geleŋ. Nyena kogwon se aje tukökin lepeŋ gweyari lo Mordekai, a Aman ga ’yi tukaŋu Yudayaki liŋ logon a gweyari lo Mordekai i swötön liŋ ti tumatyan na Akasuwero.

⁷ A i yapa togeleŋ logon a yapa Nisan, i kiŋa topuök wot murek lo gwoŋdi Akasuwero a mor nu, a lepeŋat gumbe guralan na luŋu a Pur ko Aman i komor lor ko lor, a se gumbe guralan a yapa ko yapa tojo ko gura a ’dukin i yapa topuök wot murek logon a yapa Adar.

⁸ A Aman kulyani ko mor Akasuwero adi, Nene gweya na lwaka ŋina a rekin abur sisi ’datu i kiden na ŋutu ka ’de ka ’de i modoriajin liŋ ti tumatyan inot, a saresi kase tine mora ko ti kulye ŋutu, a lepeŋat tine ’debba saresi kulok pon mor, nyenagon ’bulit ’bayin anyen do mor kolokiŋdyo lepeŋat i gwon taliŋ.

⁹ Ko kodyo do nyanyar pon mor, a ti lele saret wurökine adi ti lepeŋat tukarani tukara, a nan mo tiŋdi podo nagon temuŋdya a talentajin aliŋan puök ko kamemetak ti kita inot pon mor, anyen ’delakin i pirit na tukworien inot pon mor.

¹⁰ A mor rusuŋdye katimanti joket kaŋo kanyit i morinet a tiŋdi Aman ŋuto lo Agaga ŋuro lo Amedata, miriku lo Yudayaki.

¹¹ A mor kulyani ko Aman adi, Kine podojin ko kulu ŋutu koti a ruköki do, anyen do konakiŋdya lepeŋat gwoso i ’deket inot.

¹² Nyena a kawurök ti mor iŋge luŋu i perok puök wot musala ti yapa togelen, anyen se wuŋo lele saret gwoso na takiŋdye Aman se nu. ŋilo saret a wuroki ko modirön dumalak ti miri lo mor se ko modirön lo ’di ’dik logon a kasarak ti modoriajin liŋ ka ’de ka ’de, se ko kimak ti kulu gweyajin liŋ ŋilo saret koti a wuroki i wuresi ti kunu modoriajin liŋ ka ’de ka ’de, ko i kutusen ti ŋutu kase liŋ ka ’de ka ’de i karin ti mor Akasuwero, a iŋge jokaki ko katimanti nanyit na mor.

¹³ A luyökie iŋge puputuru kine waragalan ’de ’de i modoriajin liŋ ti mor, anyen se tatuja, ko tukaŋu, ko tolikiŋdyo asut Yudayaki liŋ, teton ko muduŋin, ŋutu wate ko luŋudiet i lor geleŋ, i perok puök wot musala ti yapa topuök wot murek lo luŋu a Adar, ko ti se ryaggi toro ’bo kase.

¹⁴ A lomirakin lo ŋina waraga iŋge koraki i modoriajin liŋ ka ’de ka ’de anyen laiki a saret i gweyajin liŋ ti ŋutu, anyen se teteŋdya ’borik ajo i möŋdu na ŋilu lor.

¹⁵ A luyökie kulu woki ’de ’de gwoso i saret lo mor; a ŋilo saret koti iŋge laiki i mariŋ nago lukata na gwon Susa. A mor se ko Aman si ’dani kak i mata na yawa kase; ama a ŋutu ti köji na Susa gwe ko wiwinya parik.