Daniele 9 - Bibilia Buk na Ŋun nagon koti luŋu a

Daniele a mo ’yu Ŋun i kulya ti ŋuto kanyit

¹ A i kiŋa lo kokwe lo Dario ŋuro lo Akasuwero lo kotumit na Madai, logon a gwon a mor lo tumatyan na ŋuto ti Kaledea,

² i kiŋa lo kokwe lo saŋu nanyit nan Daniele gwon i keŋdya na bukon ti Ŋun. A nan kuruŋdye i kulyaesi ti MATAT lo jama ko nebi Yeremia kulo adi, Yerusalema mo kölöki a murwö tojo ko kiŋajin merya buryo a ’duddyö.

³ A kirut nan pakiŋdye mugun ko MATAT Ŋun, a jupu boŋgwat terekesi ko a kukuŋo mugun ko kurök, i ga ’yu na lepeŋ ko kwakwasesi, ko momolesi se ko miŋdya.

⁴ A nan kwakwaddi MATAT Ŋun lio, a nan tuŋge toronjin adi, Pon MATAT, Ŋun duma lo kukujönorikin, logon ’debba tomoret inot ko nyaŋu inot nagon ti ’duddyö kwöŋ i kilo logon nyanyar do ko ’de ’dep saresi kulök,

⁵ yi aje toroŋdya ko a koŋdya arabat, a koŋdi kulya nakwölöŋök ko a lauŋdye lauŋdya, yi aje girara kaŋo konut i saresi ko i kulya na ’duŋ do kune.

⁶ Köti yi a ko yiŋ nebijin köliŋönök kulök logon a jambu ko moran kaŋ, ko temejik kaŋ, ko merenyejin kaŋ, se ko ŋutu liŋ ti jur i karin kunök.

⁷ Pon MATAT, do gwon rigwo, ama yi gwon ko yu na kusik i lo lor, yi ŋutu ti Yuda, ko ŋutu lo si ’da Yerusalema, ko Yisaraele liŋ, lo gwon nyona ko lo gwon pajo, i jurön liŋ logon do a riköddi yi kulu kogwon lauŋdya nikaŋ nagon yi a lauŋdye do na.

⁸ Pon MATAT, yi ko moran kaŋ, ko temejik kaŋ, ko merenyejin kaŋ, yi gwon ko yu na kusik kogwon yi a toroŋdya do.

⁹ Do MATAT ŋun likaŋ, do a kayatanit lo ŋutu ko a kapitönit; kogwon yi a lauŋdya do,

¹⁰ a yi gwe a ko yiŋ gworo ilot do MATAT Ŋun likaŋ i kebbu na saresi kulok logon do a kwekin yi ko nebijin köliŋönök kulök i kutusen.

¹¹ Yi ŋutu liŋ ti Yisaraele aje lauŋdya saresi kulök, a girara kaŋo, a renyani yiŋga gworo ilot. A giket ko milye logon a wuröki i saresi ti Mose köliŋönit ilot ŋun lo aje baranyakiŋdya kayaŋ ki, kogwon yi a toroŋdya do.

¹² Do aje kon kulyaesi kulök logon do a jambu i kulya kaŋ ko i kulya ti kasarak kaŋ lo saŋu yi kulo, a do iŋge jakiŋdya yi riŋet duma; kogwon nene ŋo a ko kona i kak ’bukuluŋ gwoso nagon a konaki Yerusalema nu.

¹³ Nyena gwoso nagon a wurö i saresi ti Mose nu, ŋina riŋet a pokin kayaŋ ki, ama yi a ko mo ’yu ’busan na MATAT Ŋun likaŋ, köti yi a ko löpukuŋdyö kaŋo kayaŋ i toronjin a tirikuni to ’diri inot.

¹⁴ Nyenagon do MATAT aje ’de ’ya riŋet ajo a joŋdi kayaŋ loki, kogwon do MATAT Ŋun likaŋ a lo rigwo i ŋo liŋ nagon do kökon, ama yi a ko yiŋ gworo ilot.

¹⁵ Nyenagon pon MATAT Ŋun likaŋ, do köju a riŋuŋdya ŋutu kulök kaŋo i jur lo Ejipeto ko könin iŋgo, a karin kunök iŋge kuön tojo ko lo lor, ama soŋinana yi aje toroŋdya ko a koŋdya arabat.

¹⁶ Pon MATAT, gwoso nagon do ŋupi koŋdya kulya na rigwo na, ti woran inot ko ŋoma inot boŋö löpuköddi kaŋo i köji inot Yerusalema nagon a mere ilot loke; kogwon Yerusalema ko ŋutu kulök gwe a tojowet i kiden na ŋutu liŋ logon kayaŋ nyona, kogwon toronjin kaŋ ko lyaŋesi ti merenyejin kaŋ.

¹⁷ Soŋinana pon Ŋun likaŋ, yiŋe kwakwasesi ko momolesi kwe nan köliŋönit ilot, nyena kogwon kulya kunök pon MATAT, ti komor inot gwe ŋa ko pirit inot nake na rurwan nagon a kölöki a murwö nu.

¹⁸ pon Ŋun lio, böŋö dulu swö kulök ko yiŋge yiŋga; ŋane konyen kulök ko mete piritön kaŋ nagon a körö se ko köji na luŋu ko karin kunök na; yi ’bayin mo ’yu do kogwon yi a lo rigwo, ama tuŋ kogwon do wowon konyen parik.

¹⁹ Pon MATAT, yiŋge yi böŋö; pon MATAT, pitökiŋdye yi böŋö; pon MATAT ŋane swö kulök böŋö, ko kitani kita, böŋö an do ko karakin, kogwon kulya kunök pon Ŋun lio, kogwon köji inot ko ŋutu kulök luŋu ko karin kunök.

Keesi i kulya ti jimalan merya buryo

²⁰ A nagon nan gwon i jambu ko i momo ’yu ko i tuggö na toronjin kwe se ko toronjin ti ŋutu kwe Yisaraele nu, ko i kwekiŋdya na ’dokesi kwe ko MATAT Ŋun lio i komor kogwon mere loke lo ŋun lio;

²¹ a nagon nan nyuŋ kwakwaddu nu, a ŋilu Gabariele, logon nan a met köyö i yeyeesi i daŋ togeleŋ lo, nye lo ’dauŋdye ’de ’de köyö ni i diŋit na rubaŋga lo koriri i ’doro na kolor.

²² A lepeŋ poŋdi po a takiŋdye nan adi, Daniele, nan soŋinana aje po kak ni i tiŋdu na do koŋon anyen do kukurun-dyö kulya.

²³ I diŋit na suluje do kwakwaddu nu, saret a tiki, nyena nan a po i takiŋdya na do na lepeŋ, kogwon do nyanyara parik; nyena yeyene yeye ŋilu saret ko kuru kurun ŋo na met do kune.

²⁴ Adi jimalan merya buryo logon a kiŋajin kulo a saraki a kwe na kulya ti ŋutu kulök ko i köji inot nake. Kilo jimalan a tutupesi ti lyaŋesi, ko a tu ’bakaesi ti toronjin, ko a lalaesi ti kulya narok, anyen joŋdya torigwo na yeŋ nyin, anyen kwekiŋdya adi ŋo na memeta se ko nebi a gwak, anyen welakiŋdya pirit nake parik na toto-puŋdya.

²⁵ Nyenagon dene den ko kuru kurun adi, mo gwon a jimalan buryo suluja i diŋit na tikine saret anyen Yerusalema nyönyöko ’duko, tojo ko diŋit na poŋdi ŋuto duma lo welaki. Nyena i jimalan merya buker wot murek lepeŋ mo nyonyökö ’duko ko piriton sakaesi kanyit se ko mariŋ nago, ama mo gwon i diŋit nagusu.

²⁶ A i mukök na jimalan merya buker wot murek, a ŋuto lo welaki lo mo tukarani tukara, ama nagon kajunyök kanyit ’bayin; a ŋutu ti duma lo popo lo mo tukaŋi köji se ko pirit nake na rurwan. A ’dutet nanyit mo gwe gwoso bar, a gor mo lo gwe tojo ko ’dutet se ko körösi na saraki.

²⁷ A nye mo tetena-kiŋdye ŋutu jore tomoret nago i jima geleŋ; a i swöt lo jima a nye mo teŋgi wuki na rubaŋgajin se ko ’dokesi; a manet körit mo kepoddi kine kulya tojo ko diŋit a temakiŋdya nagon kulya narok mo ’bukökiŋdyö ko lore kakö-rönit loki.