Daniele 5 - Bibilia Buk na Ŋun nagon koti luŋu aKönin a wuŋo i gorom 1 A mor Belesasar teteŋdi rorwe duma a lo kimak aliŋ geleŋ ti tumatyan nanyit, a lepeŋ möji binyo i komor na kilo ŋutu aliŋ geleŋ kulo. 2 A naguŋ Belesasar aje waŋgu binyo nu, a lepeŋ tiŋdi saret anyen tito nagon a dakap ko tito nagon a pödö nagon monye lonyit Nebukadanesar a yekun kaŋo i kadi na MATAT Yerusalema yu kune ködyö jwejwe, anyen nye mor ko kimak, ko wate kanyit se ko julin köliŋönök kanyit nawate ködyö möju ko kine tito. 3 A kirut lepeŋat joŋdi tito nagon a dakap ko tito nagon a pödö nagon a yekwe kaŋo i kadi duma nagon a kadi na Ŋun na gwon Yerusalema yu nu; a mor ko kimak, ko wate kanyit se ko julin köliŋönök kanyit nawate möji ko kine tito. 4 A lepeŋat möji binyo, a pupurje ŋunyen logon a dakap, ko a pödö, ko a mölwö, ko a witi, ko a kaden, ko a ŋurupö. 5 ’De ’de kijek a morin ti könin lo ŋuto iŋge meta i wuŋö na gorom na kadi na mor nagon a wela, komorga gwo ’diet lo lombo; a mor iŋge met ŋilu könin i wuŋö. 6 A kirut komor na mor iŋge löpuggö ka ’de, a yeyeesi kanyit iŋge todelyaju lepeŋ, a mokosi kanyit böŋdi böŋdu, a kuŋwat kanyit togwute togwut. 7 A mor maraŋgi maraŋgu parik adi ti nye lupukine ŋutu logon jwöjwöŋgu ko winikö, ko ŋutu lokoŋ ti Kaledea, se ko katökorok ti kulya. A mor kulyani ko ŋutu lokoŋ ti Babela kulo adi, Ko logon a keŋdya kilo saresi, ko a tokurukiŋdyo nan se, nye de totojupu ko boŋgo na ’bule, a nyorite logon a dakap de lilikine kanyit i murut, a lepeŋ gwe a kasaranit tomusala lo tumatyan. 8 A kirut ŋutu lokoŋ liŋ ti mor lupöni kanyit yu, ama a lepeŋat tine bulö keŋdya kilu wuresi, kode kwekiŋdya mor tökoresi kase. 9 A mor Belesasar gwe ko kujönö a duma parik, a komor nanyit iŋge löpuggö ka ’de, a ma ’di kimak ti tumatyan nanyit iŋge dyadya ’yu. 10 A ŋote mor lupöni i kadi nagon rorwe gwon kata nu, kogwon lepeŋ a yiŋ woŋon na mor se ko na kimak; a lepeŋ kulyani adi, Ti do si ’dani ŋupi pon mor! Ti yeyeesi kunök gwe ti todelya, ju do, ko ti komor inot köti gwe ti löpuggö ka ’de ko kujönö. 11 Ŋuto kata konut i tumatyan logon ko mulökötyo lo Ŋun loke. I perok ti munyi köju nu, parara, ko kuruŋdyö, ko koŋon gwoso na ŋunyen a rye ko lepeŋ, a monye ilot mor Nebukadanesar iŋge tikin lepeŋ a duma lo ’bunuk, ko lo ŋutu lo jwöjwöŋgu ko winikö, ko lo ŋutu lokoŋ ti Kaledea, se ko lo katökorok ti kulya. 12 Nyenagon ti Daniele luŋuni; lepeŋ de totokurukin do tokoret na kine kulya, kogwon lepeŋ gwon ko mulökötyo lo ’but parik ko a kadenanit, ko a lokoŋ i tökoŋu na rudweesi ko i nyönyöggu na lwönö, ko bubulö teteŋdya kulya nago. Ŋilo a Daniele logon mor a gwijö a Beletesasar lo. 13 A kirut Daniele nyömöjine ko mor i komor. A mor pipije Daniele adi, Do a ŋilu Daniele lele lo ŋutu logon köju momokwe Yuda, logon baba mor a momokun Yuda yu kulo? 14 Kogwon nan a yiŋ adi mulökötyö lo Ŋun loke kata konut, köti parara, ko kuruŋdyö, se ko koŋon na ’but a rye konut. 15 Nyena ŋutu lokoŋ ko ŋutu lo jwöjwöŋgu ko winikö a nyömwe köyö ni i keŋdya nakilo wuresi anyen kwekiŋdya nan tokoret nase, ama a lepeŋat tine bulö kwekiŋdya nan tokoret na kine kulya. 16 Ama nan a yiŋ adi do bubulö kweja tökoresi, ko bubulö teteŋdya kulya nago, nyena ko do bubulö keŋdya kilo wuresi, köti ko do bubulö kwekiŋdya nan tokoret nase, do de totojupu ko boŋgo na ’bule, a nyorite logon a dakap de lilikine konut i murut, a do gwe a kasaranit tomusala lo tumatyan. 17 A Daniele renyani ko mor i komor adi, Ti ’dokesi kunök gwe a kunök, ko tiki ropesi kunök ko lele ŋuto; ama nan de kekenakin do mor kilo wuresi a kwekiŋdye do tokoret nase. 18 Pon mor, ŋun Katopanit lo ki liŋ a tikin munyi Nebukadanesar tomoran, ko toduma-lan, ko minyo, ko temejikan; 19 a gweyajin liŋ ti ŋutu, ko jurön, ko ŋutu lo jambu kutusen ka ’de ka ’de boŋdi böŋdu a kujönöni kujönö lepeŋ kogwon todumalan nagon Ŋun a tikin nye na. Nye bubulö tatuja ŋuto gwoso i ’deket nanyit, a pituŋdye logon nye a pitun gwoso i ’deket nanyit, nye bubulö toduma ’yu ŋuto kode to ’diddya ŋuto gwoso i ’deket nanyit. 20 A na bu ’ye lepeŋ mugun, a töili lonyit iŋge golon, a nye gwe ko ’du ’duŋga nu, a lepeŋ iŋge riköji kaŋo i si ’daet nanyit na tumatyan, a minyo lonyit ’dumajine kaŋo; 21 a lepeŋ riköjine kaŋo ko ŋutu kiden, a yeyeesi kanyit iŋge löpukö gwoso ti kijakutat, a nye si ’dani ko kaineki ti mu ’diŋ i pirit na geleŋ; a nyesi döru gwoso duöt, a mugun nanyit iŋge gwon a puŋutut, tojo lepeŋ a den adi Ŋun Katoŋanit lo ki liŋ logon a kasaranit lo tumatyan na ŋutu, a tiŋdi ŋuto logon nye nyanyar lo a kasaranit. 22 Ama do Belesasar ŋuro lonyit, ma ’di do ködyö a den kine kulya liŋ ama do a ko tokoyogga töili ilot, 23 a do kölumbö bu ’ye mugun ko MATAT lo ki; a luŋgi tito ti kadi nanyit konut i komor, a do se ko kimak, ko wate kunök, se ko julin köliŋönök kunök möji binyo ko kine tito. A do bu ’ye ŋunyen logon a pödö, ko a dakap, ko a mölwö, ko a witi, ko a kaden, ko a ŋurupö; kilo ŋunyen ti bulö meddya ko ti yiŋga kode deŋdya, a do kölumbö tine bu ’ya Ŋun logon tiju ru inot ko kikolin kulök liŋ lo. 24 Nyena ko ŋina kwe lepeŋ a sunyuŋdyö könin a wuŋe kulo wuresi. 25 Kulo a kulyaesi lo wurö adi; MENE, MENE, TEKELE se ko PARASIN. 26 Mana tokoret na kine kulya; MENE kweja adi Ŋun aje ken perok ti tumatyan inot ajo ko aje to ’dud-dyö lepeŋ; 27 TEKELE kweja adi do a tema ko mijan ama do ti jukin; 28 PE RESE kweja adi tumatyan inot a kora a tikine ko ŋutu ti Madai ko ti Parasa. 29 A kirut Belesasar tiŋdi saret anyen Daniele totojupu ko boŋgo na ’bule, a nyorite logon a dakap lilikine kanyit i murut, a lore lo laikine adi ti lepeŋ lo gwe a kasaranit tomusala lo tumatyan. 30 A i ŋilu tukwaje gwak a Belesasar mor lo Kaledea iŋge tatua. 31 A Dario Madaityo logon ko kiŋajin gwoso merya buker wot murek lo ruddye tumatyan. |
Bari Bible © United Bible Societies, 1979.
Bible Society in South Sudan