2 Samuele 9 - Bibilia Buk na Ŋun nagon koti luŋu a

Dawidi a konakin Mepiboset ’bura

¹ A Dawidi pipije adi, Lele ŋuto ŋona kata logon a pituŋdyö ko Saula i kötumit le, anyen nan bubulö konakiŋdya lepeŋ ’bura kogwon kulya ti Yonatana?

² A lele köliŋönit gwe kata lo kötumit na Saula karin kanyit a Siba, a se lupundye lepeŋ ko Dawidi ni. A mor pipije lepeŋ adi, Do a Siba? A lepeŋ nyobbi adi, Nan a nye köliŋönit ilot.

³ A mor koti pipije adi, Lele ŋuto nyuŋ kata logon a lo kötumit na Saula, anyen nan bubulö konakiŋdya lepeŋ ’bura ko nyaŋu na ŋun? A Siba ruŋge adi, Lele ŋuro lo Yonatana nyuŋ kata, ama lepeŋ a bata mokosi.

⁴ A mor pipije lepeŋ adi, A liya lepeŋ? A Siba ruŋge mor adi, Lepeŋ lu yu Lodebar ko Makir ŋuro lo Amiele kadi.

⁵ A mor Dawidi sonyoddi luyökie, a doggi lepeŋ Lodebar yu ko Makir ŋuro lo Amiele kadi.

⁶ A Mepiboset ŋuro lo Yonatana, ŋuro lo Saula poŋdi ko Dawidi ni, a ’dorone kak rupu, a twöji twöju. A Dawidi kulyani adi, Mepiboset! A nye nyobbi adi, Nan malo, köliŋönit ilot.

⁷ A Dawidi kulyani ko lepeŋ adi, An do ko kujönö; kogwon nan de kökonakin do ’bura kogwon kulya ti monye ilot Yonatana, a nan de nyökökiŋdye do kak liŋ na merenye ilot Saula; a do de nyesi köyö i misa perok liŋ.

⁸ A nye twöji twöju, a kulyani adi, Nan köliŋönit ilot ŋona a nyo anyen do won konyen ko ŋuto logon a ’dioŋ kana gwoso nan lo?

⁹ A kirut mor luŋgi Siba köliŋönit lo Saula, a kulyani ko lepeŋ adi, Nan aje nyökökin ŋuro lo duma ilot ŋo liŋ nagon a ti Saula ko kötumit nanyit liŋ.

¹⁰ A do ko ŋwajik kulök ko köli-pönök kulök ködyö kurukiŋdye lepeŋ, a ta yekuŋdye kinyojin anyen ŋuro lo duma ilot bubulö gwon ko kinyo lo nyenyei; ama Mepiboset ŋuro lo duma ilot bubulö nyesu köyö i misa perok liŋ. A Siba gwe ko ŋwajik puök wot mukanat ko köliŋönök merya murek.

¹¹ A Siba kulyani ko mor adi, Nan köliŋönit ilot de kökon gwoso i ŋo liŋ nagon do pon mor duma liŋ a sarakin nan kine. Nyena a Mepiboset nyesi ko Dawidi i misa gwoso lele lo ŋwajik ti mor.

¹² A Mepiboset gwe ko ŋuro lo ’dit, logon karin kanyit a Mika. A ŋutu liŋ ti mede na Siba gwe a köliŋönök ti Mepiboset.

¹³ A Mepiboset si ’dani Yerusalema kogwon lepeŋ nyesu perok liŋ ko mor i misa. A mokosi kanyit murek liŋ iŋge bata.