2 Samuele 6 - Bibilia Buk na Ŋun nagon koti luŋu a

Dawidi a tu i joŋdya na saŋduk na tomoret

¹ A Dawidi köti momori ŋutu lio lo wulwe i Yisaraele a alipan merya musala.

² A Dawidi ŋine ŋien a iti tu ko ŋutu liŋ logon gwon ko nye kulo tojo Bala-yuda, anyen tu dogga saŋduk na Ŋun nyu, Ŋinu saŋduk a gwiyö i karin ti MATAT lo kurumi logon sisi ’da i keru-bajin loki lo.

³ A se tiŋdi saŋduk na Ŋun i loki na par ludukötyo na jijikö, a joŋdi lepeŋ kaŋo i kadi na Abinadaba nagon gwon i mere loki nu; a ŋwajik ti Abinadaba logon a ko Uja ko Akio gwe a kajikök ti ŋinu par ludukötyo

⁴ nagon saŋduk na Ŋun gwon kata na; a Akio wöröjine i ŋerot na ŋinu saŋduk.

⁵ A Dawidi ko kötumit na Yisaraele liŋ lyöŋi lyöŋön ko MATAT i komor ko riŋit nase liŋ, i pupurja ko kölisi, ko tomon, ko raba-bajin, ko tiŋgiliet, ko teyejin, ko re gwoesi.

⁶ A nagon se aje ’dur i pirit gwutet na ’bolot na Nakon nu, a Uja riöddi könin i morga na saŋduk na Ŋun, kogwon dwönin kulo a köpukö.

⁷ A woran na MATAT yuköki ko Uja; a Ŋun tatuje lepeŋ nyu kogwon nye a lyaŋan; a lepeŋ twane twan nyu nyona ko saŋduk na Ŋun.

⁸ A Dawidi iŋge woran kogwon MATAT aje duyömbu Uja; a nu pirit luŋuni a Perese-uja tojo ko lo lor.

⁹ A Dawidi iŋge kujönö MATAT i ŋilu lor; a lepeŋ kulyani adi, Ada lolor nagon saŋduk na MATAT jwe köyö ni?

¹⁰ Nyena a Dawidi tine ’bön joŋga saŋduk na MATAT i köji nanyit na Dawidi; ama a Dawidi togiraddi lepeŋ a swöt i kadi na Obede-edom ŋuto lo Gata.

¹¹ A saŋduk na MATAT iŋge mönuŋdyö ko Obede-edom ŋuto lo Gata kadi ko yapala musala; a MATAT ’boroji Obede-edom ko mede nanyit liŋ.

Saŋduk na tomoret aje jwe Yerusalema

¹² A kine kulya iŋge nyönyököki mor Dawidi adi, MATAT aje ’boroja mede na Obede-edom ko ŋo kanyit liŋ kogwon kulya ti saŋduk na Ŋun. A Dawidi iti tu, a joŋdi saŋduk na Ŋun kaŋo ko Obede-edom kadi a joŋgi tojo ko köji na Dawidi lukata ko lyöŋön a duma.

¹³ A gwe sona, nagon kilu ŋutu ka ’dokök ti saŋduk na MATAT ko wöröni lasesi buker nu a lepeŋ ’duŋge dwöt ko tagwok lopir a rubaŋga.

¹⁴ A Dawidi gwoji gwoja ko MATAT i komor ko riŋit nanyit liŋ; a Dawidi iŋge pita-kiŋdya boŋgo na waratat na parere na luŋu a epoda kanyit i mukök.

¹⁵ Nyenagon a Dawidi ko kötumit liŋ na Yisaraele ’dokoddi saŋduk na MATAT wowoŋoro ko kukutaddu toriot.

¹⁶ A na ’durökiŋdye saŋduk na MATAT i köji na Dawidi nu, a Mikala ŋuro na Saula ku ’di ’ye i kwiliset, a meddi mor Dawidi lalam ko gwogwoja ko MATAT i komor; a nye poki i la-uŋdya na lepeŋ kanyit i töili.

¹⁷ A ŋutu tolupöddi saŋduk na MATAT i lukata na kemia nagon Dawidi a ’bikikin lepeŋ na, a tosi ’dakiŋdye nye kanyit i pirit; a Dawidi wukiŋdye rubaŋgajin lo ’yu ’yura ’buluŋ ko rubaŋgajin ti taliŋ ko MATAT i komor.

¹⁸ A nagon Dawidi aje tutuŋgö wukiŋdya na rubaŋgajin lo ’yu ’yura ’buluŋ ko rubaŋgajin ti taliŋ nu, a nye ’boroji ŋutu i karin ti MATAT lo kurumi.

¹⁹ A nye gwelakiŋdye lodir liŋ lo ŋutu ti Yisaraele lyan ko wate, ŋutu liŋ geleŋ geleŋ a tiki ambata ko koret na lokore, ko ludweki ti binyo lo nunutu a ambata. A ŋutu liŋ reara reara kase midijik.

²⁰ A Dawidi yitwene i ’boroja na mede nanyit. Ama a Mikala tore na Saula lupene kaŋo i rum ko Dawidi, a kulyani adi, Do mor lo Yisaraele ’diri bu ’ya mugun i lo lor, i wörö inot a limu kana i komor na köliŋönök wate ti ŋutu kulök gwoso ŋuto logon ’bak ’bulit lo wöwörö a limu kana ’bak yu na kwe le?

²¹ A Dawidi nyobbi Mikala adi, Kine kulya a kona ko MATAT i komor, logon a wuluŋdyö nan lwö-lwöŋ munyi se ko kötumit nanyit i gwon a kasaranit lo Yisaraele logon a ŋutu ti MATAT; nyenagon nan lyö-lyöŋön ko MATAT i komor.

²² A nan mo tiŋdi mugun i lawe lwölwöŋ ŋina, a do mo mete nan a ŋo lo lalawe, ama kölumbö köliŋönök nagon do a ’diŋdya kine se mo na bu ’ya nan.

²³ A Mikala ŋuro na Saula gwe ’bak ŋuro tojo ko lor lonyit twayet.